Churicunamanda ama alejaringapaca ¿imatata taitacunaca rurana can?

“PAPITO, quiquinga ashtaca cosascunatami yachashcangui”. Shina nijpica ¿nachu ninanda cushijushcangui? Chai ratopica, taita caimandaca orgullosomi sintiririangui. Y quiquinba churigu quiquinba consejocunata catishpa ali causajta ricushpacarin ashtahuan contentomi sintiririangui (Proverbios 23:​15, 24).a

¿Quiquinba churiguca cunangamanllu quiquinmandaca lo mismota pensan? ¿O ña tiempo yalishcamandachu ñana lo mismota pensan? Quiquinba churigu viñashpapash quiquinmanda ama alejarichunga ¿imatata rurana capangui? Chaita nara yachajushpallata taitacuna ima jarcaicunata charishcata primeroca ricupashunchi.

Quimsa jarcaicuna

1. TIEMPOMI FALTAN. Ashtaca llactacunapica, taitacunami familiataca mantinin. Chaimi taitacunaca trabajashpa casi punlla enterota huasipica na yalin. Chaimandami huahuacunahuan cangapaca asha tiempogutalla charin. Por ejemplo, Francia llactapica chairallami shuj encuestata rurarca. Chaipica taitacuna cada punlla menos de 12 minutostalla paipa huahuacunahuan yalishcatami nin.

CAIPI YUYAPAI: ¿Mashna tiempotata quiquinba churiguhuanga yalinata yachapangui? Shuj o ishcai semanata anotapai cada punlla quiquinba churiguhuan mashna tiempota yalishcata. Imata anotashcata ricushpaca, talvez na crita ushapanguimanllu.

2. ALI EJEMPLOTACA NA CHARIPASHCANGUICHU. Huaquin jaricunaca paipa taitacunahuanga apenas parlashpami viñashca. Francia llactapi causajuj Jean-Marieca “ñuca taitahuanga na ashta parlanllu carcani” ninmi. Chaica ¿imashinata paitaca afectarca? Paica ninmi: “Shina viñaimandaca nunca na pensashca problemacunatami charishcani. Por ejemplo, ñuca huahuacunahuan imagumandapash tiarishpa aligutapacha parlaitaca na ushanichu, ñucapaca dificilpachami can” ninmi. Cutin shuj jaricunaca, paicunapa taitacunahuan ashaguta masta parlashpapash paicunahuanga na alipacha amigocuna canllu. 43 añosta charij Philippeca ninmi: “Ñuca taitaca ñucata juyashcataca na ricuchita ushanllu carca. Chaimandami ñucapash, ñuca churiguta juyashcata ricuchingapaca ninanda esforzarina tucushcani” nin.

CAIPI YUYAPAI: ¿Quiquinba taitahuan imashina viñashcaca quiquinba churiguta imashina tratanapi afectajun yapanguichu? ¿Quiquinbashchu quiquinba taitapa ali o nali costumbrecunata catipashcangui? Chaitaca ¿imacunapita cuenta japipashcangui?

3. PANDA PENSAMIENTOCUNA. Huaquin llactacunapica mamacunami huahuacunataca viñachina can y na taitacunaca viñachinachu can ninmi. Lucaca Europa llactapimi viñarca. Paica ninmi: “Gentecunaca huarmicunami huahuacunataca cuidana can nishpami pensan carca” nishpa. Cutin shuj llactacunapi taitacunaca huahuacunata shinllita tacurishpa yachachitallami yachachin. Georgeca África llactapimi viñarca. Paica ninmi: “Ñuca llactapi gentecunaca, huahuacunaca taitacunata na respetangachu nishpami huahuacunahuan pugllanataca na yachan. Chaimandami ñuca churiguhuan asha ratogutallapash yalinaca ñucapaca dificilpacha can”.

CAIPI YUYAPAI: Quiquinba comunidadpi taitacunaca ¿imashinata can? ¿Huarmicunallami huahuacunataca viñachina can nishpachu yachachin? ¿Huahuacunata juyashcata ricuchichunllu yachachin? ¿O huahuacunata juyashcata ricuchijpica imapash malotashnachu ricun?

Huahuacunata charishpa y cai jarcaicunata charishpaca ¿imatata rurai ushapangui? Cati yuyaicunata ricupashun.

Quiquinba churigu uchillagu cajpillatami aprovechana capangui

Huahuacunaca siempremi taitacunashna cangapaj munan. Chaimandami uchillagu cajpillata aprovechana capangui. Chaipaca ¿imatata rurana capangui? Churiguhuan cangapaca ¿maimandata tiempota llujchigripangui?

Usharijpica siempremi huasi ruraicunapi ayudahuai nina capangui. Por ejemplo, fichanaguta, uchilla rastrilloguta cushpami ayudahuai nina capangui. Shina nijpica, quiquinba churiguca, ashta cushijushpami ayudangapaj munanga. Porque quiquinga paipaca imapash héroe cuendami capangui. Churigu ayudajujpica talvez na uchalla tucuchita ushanguichu. Pero quiquinba churiguhuanga ashtahuan ali amigomi tucungui y trabajanatapashmi paimanga yachachijupangui. Bibliaca ña unaitami taitacunataca, huasi ruraigucunata rurashpami huahuacunahuan parlangapaj y paicunata yachachingapaca aprovechan canguichi nishca (Deuteronomio 6:​6-9). Chai consejoca cunangamanmi sirvin.

Quiquinba churiguhuanga imaguta rurashca jahuapash paihuan pugllanami capangui. Shina rurashpaca ashtaca beneficiocunatami charipangui. Huaquin estudiashca gentecunaca ninmi, taitacunahuan pugllashpa viñashca huahuacunami imaguta rurangapapash paicunapa munai dispuesto can y na manllanllu.

Michel Fize shuti investigadorcarin ninmi: “Taitacunahuan pugllashpami huahuacunaca ashtahuan fácil taitacunahuanga imacunatapash parlanlla” nin. Pugllanajushpami taitacunaca imagutapash nishpa o rurashpa huahuacunataca juyashcata ricuchin. Y chaimi huahuacunapash lo mismotallata ruranata yachajun. Alemania llactapi causajuj Andreca ninmi: “Ñuca churigu uchilagu cajpica, ishcandimi ninanda pugllan carcanchi. Paita ugllajpimi paipash ugllanata yachajurca”.

Puñuchigrijushpapashmi huahuagucunahuan ashtahuan ali amigo tucungapaj aprovechai ushapangui. Por ejemplo, cada tutami shuj historiaguta liita ushapangui. Shinallata pai imamanda cushilla o preocupado cashcata parlajujpica ali uyapangui. Shina rurajpimi viñashpapash quiquinhuan facillla parlashpa catinga.

Churigu gushtashca temamanda parlapangui

Huaquin jovengunaca paicunapa taitacuna paicunahuan parlangapaj esforzarijpipash na parlangapaj munanshnallami ricurin. Si imaguta tapujpipash, nimata na contestangapaj munajta sintishpaca, ñucahuanga nimata na parlangapaj munanllu nishpaca na pensanachu capangui. Shina pasajpica ña cutin shuj cosascunata rurashpa paihuan parlangapami esforzarina capangui. Shina rurajpica, talvez quiquinhuan parlangapaj munangami.

Francia llactamanda Jacques shuti runagupaca paipa churi Jerômehuan parlanaca huaquinbica dificilmi carca. Pero parlachun obliganapa randica, paihuanmi futbolta pugllai callarirca. Paica ninmi: “Futbolta pugllashca jipaca, samangapami jihuapi tiarin carcanchi. Chaimi ñuca churiguca imacunamanda preocuparijushcata parlan carca. Ñuca churiguhuan pugllana y paihuan canami alipacha amigocuna tucuchun ayudarca” ninmi.

Pero si quiquinba churigu deportecunata na gushtajpica ¿imatata rurai ushapangui? Andreca paipa churiguhuan estrellacunata ricushcata yarishpami cashna nin: “Sillacunata canllaman llujchishpami, al aire libre siririn carcanchi. Alipacha arroparishpa y mishqui yacuguta ufiashpami tutacunaca cielota ricunajun carcanchi. Chai ratocunapica estrellacunata pi rurashcata, ima preocupaciongunata ñucanchi charishcata o casi tucuitami parlan carcanchi” nin (Isaías 40:​25, 26).

Quiquinba churigupa gustocunatallata na charishpaca ¿imatata rurai ushapangui? Quiquinba gustocunatami ladoman saquina capangui (Filipenses 2:​4). Ian shuti runaguca Sudáfrica llactapimi causan. Paica ninmi: “Ñuca churitapash yalimi deportecunataca gushtani. Paica aviongunahuan, computadoracunahuan pugllanatami gushtan. Chaimandami chai cosascunamanda interesaringapaj esforzarircani. Paitaca avionguna volajta ricungapami apan carcani. Y computadorapi avionda volachishpami pugllan carcanchi. Chai cosascunata rurashpa ishcandi yalimandami, ñuca churiguca imacunatapash ñucahuanga facillla parlan carca” ninmi.

Ali sintirichunmi ayudana capangui

¿Nachu quiquinba churiguca ima horapash imagutapash rurai ushashpaca “ricui papito ricui” nishpa cayashca? Ña joven tucushpaca, talvez ñana directamente shina ningachu. Pero ashtahuan jipaman shuj ali persona tucungapaca quiquinba ayudatami minishtinga.

Jehová Dios imata rurashcata ricupashun. Paipa Churi Jesús cai alpapi cajpi y shuj importante obrata rurai callarigrijujpica, Jehová Diosca paipa Churiguta juyashcata ricuchingapami “caimi, ñuca juyashca Churigu. Paimandami ninanda cushijuni” nirca (Mateo 3:17; 5:48). Quiquinba churigutaca yachachishpa, tacurishpami viñachina capangui (Efesios 6:​4). Shina rurashpapash, imagutapash ali nijpi o imagutapash ali rurajpica felicitanami capangui.

Huaquin jaricunapa taitacunaca paicuna imata ali rurashcataca na ricunllu carca. Sino solo imapi pandarishcatallami ricun carca. Chaimi paicunapapash huahuacunaman juyashcata ricuchina y paicunata felicitanaca shinlli can. ¿Quiquinbashchu shinallata capangui? Shina cajpica, quiquinba churiguta valorashpami pai ali sintirichun ayudangapaj ashtahuan esforzarina capangui. Chaipaca ¿imatata rurana capangui? Punda parrafocunapi parlashca Lucaca, 15 añosta charij paipa churi Manuelhuanmi huasi ruraicunata ruranata yachan. Paica ninmi: “Huaquinbica canlla rurailla y imagupi ayudachun minishtishpapash cayahuanguilla nishpami saquini. Casi siempremi paica imagutapash sololla ruranlla. Shina rurashpaca paillatami contento, ashtahuan ali sintirin. Ali rurashcata ricushpami felicitanata yachani. Y si pai munashcashna imagutapash na rurai ushajpica, chaita rurangapaj esforzarishcamandami felicitanata yachapani” nin.

Ashtahuan importante metacunata pactachichun ayudashpami quiquinba churigutaca ali y valorashca sintirichun ayudana capangui. Pero quiquin munashca tiempopi chai metacunata na uchalla pactachi ushajpica ¿imatata rurai ushapangui? Y si paipa metacuna quiquin munashca metacunamanda diferente cajpica ¿imata rurana capangui? Shina cajpica ñucachu yapata exigijuni nishpami pensarina capangui. Punda parrafocunapi parlashca Jacquesca ninmi: “Ñuca churitaca pai pactachi ushanalla metacunata charichunmi ayudapani. Pero ñuca munashca metacunata pactachichunga na exiginichu, sino paipa munashca metacunata pactachichunmi ayudani. Pai munashca metacunataca pai ushashca tiempopimi pactachina can nishpami pensarini” nin. Quiquinba churigu imata pensajta aliguta uyashpa, imaguta ali rurajpipash felicitashpa y pai munashcashna na rurai ushajpipash animashpami quiquinba churigutaca paipa metacunata pactachichun ayudaita ushapangui.

Shina rurashpapash quiquinba churiguhuanga na siemprechu alipacha caita ushapanguichi, imapash problemacunaca ricuringami. Shinapash quiquinba churiguca, tiempo yalijpipash talvez quiquinmandaca na alejaringapaj munangachu. Porque tucuicunallatami ñucanchi ali sintirichun, ali causachun ayudajuj gentecuna ñucanchi ladopi cachun munanchi.

[Nota]