¿Huacanaca alichu can?

¿Ima hora irquilla cashcata yaringuichu? Ñapash ali tucushcamandaca tal vez na yaringuichu. Cutin huañui tiajpica uchalla ali sintiritaca na ushanchichu. Huañuimanda parlashpaca Alan Wolfelt shuti doctorca shuj libropica escribircami: “Huañui tiajpica cungaitaca na usharinllu. Shinapash tiempohuan, rijsicunapa ayudahuanga asha ashami alillata sintirin” nishpa.

Bibliapi huaquin ejemplocunata ricupashun. Abrahanga paipa huarmi Sara huañujpimi ninandapacha huacashpa unaipi alillata sintirica.a Jacobpash paipa churi Joseta shuj millai animalmi huañuchishca yashpami “tauca punllacunata llaquilla carca”. Familiacunapash Jacobta ayudaitaca na usharcachu. Ashtaca huatacuna jipapash Jacobca paipa churi Josemandaca llaquillami carca (Génesis 23:2; 37:34, 35; 42:36; 45:28).

Cunan punllacunapipash huañui tiajpica shinallatami gentecunaca llaquirin. Huaquinguna ima nijta ricupashun.

• 60 huatacunata charij Gail shuti huarmiguca ninmi: “Ñuca cusa Robertca 9 de julio de 2008​tami shuj accidentepi huañurca. Chai punllapash desayunashca jipaca ugllarishpa, muchashpami ashtacashcaman nishpa rirca. Ñami 6 huatacuna yalishca. Shinapash ninandami llaquirini. Ima horapash ali sintiri ushashachu imacharipash” nin.

• 84 huatacunata charij Etienne shuti runaguca ninmi: “Ñuca huarmigu huañushcamandaca ñami 18 huatacuna yalishca. Shinapash nara cungapashcanichu. Ñucahuan caipi cashcanman yanimi. Purijushpa imapash juyailla cosasguta ricushpaca pensanimi, ñuca huarmigu caipi cashpaca cushijupanmanmi carca” nishpa.

Huaquingunaca huaquin tiempo jipalla o unaipimi alillata sintiri ushan. Chaimandami huañui tiajpica na shina sintirijunachu can nishpaca na pitapash rimajuna canchi. Shinallata na pensanachu canchi, ñucaca na huacanachu cani nishpa. Shinapash huañui tiajpica ¿imashinata alillata sintiri ushanchi?