¿Imashinata alillata sintirishun?

Huañui tiajpica huaquingunaca consejanmi na huacanachu can nishpa. Cutin shujcunaca huacanami can ninmi. Shinapash Bibliaca ni maijan lado na tucunllu. Cunanbi ashtaca investigaciongunaca Biblia ciertota nijushcatami intindichin.

Huaquin llactacunapica ninmi, jaricunaca na huacanachu can nishpa. Shinapash shujcunapa ñaupajpi huacanataca ¿pingai tucunachu canchi? Huaquin doctorcunaca ninmi, huañui tiajpi huacanaca alimi can nishpa. Chaimandami huañui tiajpi llaquirijuna, huacajunaca alillata sintirichun ayudan. Aguantarinaca huaquinbica ashtahuan nalimi can. Bibliapica na nijunllu, huañui tiajpica na huacanachu can o jaricunaca na huacanachu can nishpa. Jesusta yaripashun. Paipa ali amigo Lázaro huañujpica gentecunata causachita ushashpapash gentecunapa ñaupajpi huacanataca na pinganayachishpami huacarca (Juan 11:33-35).

Ashtacacunaca cungashcapi huañui tiajpimi llaquilla sintirishcamanda culiraitara culiran. Huaquingunaca shujcuna imacunatapash nishpa nali sintichijpimi culira sintirin. Sudáfrica llactamanda Mike shuti runaguca ninmi: “Ñuca taitaca ñuca 14 huatacunata charijpimi huañurca. Anglicana nishca Iglesiamanda pastor misata cujushpaca nircami, Taita Diosca ali gentecunata cielopi minishtijushpami ali gentecunataca cieloman apan” nishpa.a Ñuca taitata ninanda minishtinajushcamandaca chaita uyashpaca ashtacatami culirarcani. Chai shimicunata nishcamanda ña 63 huatacuna yalishca cajpipash cunangamanmi culirani” nishpa.

Cutin shujcunaca familiacuna cungashcapi huañujpimi paicunallata culparishpa pensai callarin: “Ñuca caita o chaita rurajpica na huañunmanllu carca” nishpa. Huaquinbicarin, parlashpa culirarishca caimandami ashtahuan nali sintirin.

Huañui tiajpi culira sintirijushpa o quiquinllata culparijushpaca quiquinda ali uyashpa, huañui tiajpi familiacuna imashina sintirijta intindichishpa ayudaj amigota mascashpami paihuan parlana capangui. Bibliapica ninmi: “Ali cumbaguca paipa cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin” nishpa (Proverbios 17:17).

Chai ratocunapica Jehová Diosmi ñucanchipa ashtahuan ali amigo can. Paica ñucanchita ‘ayudangapaj’ munashpami ricuriajun. Chaimandami paiman ñucanchi shungu ucupi ima tiashcataca parlana canchi (1 Pedro 5:7). Shina rurashpami ‘casilla ali causaita Taita Dios caramujpi yuyaicunapipash’ ali sintirishun (Filipenses 4:6, 7). Ashtahuangarin, Bibliapi textocunahuan Jehová Dios ayudachun saquipai. Quiquinda ayudaj textocunata escribishpa chaicunata de memoria yachajupai (recuadrota ricupangui). Ashtahuanbachaca tutacuna quiquinlla cashpa na puñui ushajujpimi chai textocunata yarinaca ashtacata ayudanga (Isaías 57:15).

40 huatacunata charij shuj runagupa huarmica chairallami cancerhuan huañurca. Huaquinbica paillami sintirin, paitaca Jehovata mañanami ashtacata ayudashca. Chai runaguca ninmi: “Jehovahuan parlashpaca na ñucalla sintirinichu. Tutacuna rijcharishpa na puñui ushashpaca Bibliata liishpa, liishcapi pensarishpa Jehovaman tucuita parlashpami alillata sintirini. Shinami ñuca yuyaicunapipash, shungupipash tranquilo sintirishpa puñui ushani” nishpa.

Vanessa shuti cuitsagutapash Jehovata mañanami paipa mama huañujpica ayudarca. Paica ninmi: “Llaqui llaqui cashpaca ushashcata huacashpami Jehovapa shutitaca cutin cutin nijun carcani. Jehová Diosca ñuca mañashcata uyashpami ayudahuarca” nishpa.

Huañui tiajpi llaqui apashca gentecunata ayudaj doctorcunaca ninmi, huañui tiashca jipaca shuj gentecunata ayudanami ali sintirichun ayudan nishpa. Shinami paicunallata animarishpa alillata sintirin (Hechos 20:35). Jesusta ashtaca catijcunaca nishcami, chai llaqui punllacunapica shujcunata ayudanami cutin cushilla sintirichun ayudashca nishpa (2 Corintios 1:3, 4).