Punda tiempopi, cunan tiempopi esclavocunaca ¿imashinata salvari ushashca?

Blessinga shuti huarmitaca ajchata rutushpa trabajachun nishpami Europaman pusharca. Shinapash 10 punllacunata llaquinaita macashpa, paipa familiatapash llaquichishun nishpa manllachishpami culquimanda jaricunahuan cachun obligarca.

Blessingga 200 ó 300 eurocunatami cada tuta ganana carca. Shinallami chai pushtuta ricuj huarmi 40 mil eurocunatab pagachun obligashtaca pagaita ushana carca. Blessingga ninmi: “Ashtaca viajemi pacajushpa rinata yarcani. Ñuca familiata llaquichinata manllashpami na imatapash rurai usharcani” nishpa. Blessingda shinami, mundo enteropi casi 4 millón gentecunatapash culquimanda esclavocunatashna jarihuan, huarmihuan cashpa trabajachun obligan. Shinami chai ruraicunaca shuj jatun negocio cuenda tucushca.

Casi 4 mil huatacuna huashamanga, shuj jaricunaca paicunapa chaira viñaj huauquitami esclavota shina jatushpa cacharca. Chai jovenga Josemi carca. Shinami Joseca Egiptopi charij gentecunapa huasipi sirvishpa causarca. Blessinghuan chimbapurajpica Josetaca huasi dueñocunaca callaripica alimi tratarca. Jipamanga huasi dueñopa huarmi paihuan cachun nishpa inguitajujpi, José na nijpimi chai huarmica llullashpa violangapami munahuarca nishpa juchachirca. Chaimandami Josetaca carcelpi vicharca (Génesis 39:1-20; Salmo 105:17, 18).

Joseca punda tiempomanda esclavomi. Cutin Blessingga cunan tiempomanda esclavami can. Pundamandapachami gentecunataca esclavocuna cachun jatun cashca. Blessingbash, Josepash shinallatami llaquichi tucushca. Cai negociopica tucuita yalimi culqui ashtahuan importante can. Chaimandami gentecunataca mercaderiatashna ricun.

GUERRA TIAJPICA ESCLAVOCUNACA SHUJ JATUN NEGOCIOMI TUCUN

Guerracuna tiajpimi esclavocunata charinaca ashtahuan fácil carca. Por ejemplo Egiptomanda faraón Tutmosis III Canaán llactata llaquichishpaca 90 mil gentecunatami prezo aparca. Paicunataca minacunapi trabajachun, templocunata rurachun, larcacunata rurachunmi esclavocunatashna charirca.

Roma llacta mandajujpi guerracuna tiajpica ashtaca esclavocunami tian carca. Huaquinbica esclavocunata ashtahuan charinamandami guerracuna callarin carca. Casi 2 mil huatacuna huashamanga, Roma llactapi causajcunamandaca chaupica esclavocunami carca. Egiptomanda, romamanda esclavocunaca llaquinaitami sufrin carca. Roma llactapi minacunapi trabajaj esclavocunaca 30 huatacunatallami causai ushana carca.

Tiempo yalijpipash esclavocunata imashina tratanaca na cambiashcachu. Casi 1600 huatamanda, 1900 huatacamanga Africahuan, América llactahuan esclavocunata jatuna, randinaca tucui negociocunamanda yalimi culquita ganachin carca. UNESCO nishca organizacionga ninmi, Casi 30 millón jaricuna, huarmicuna, huahuacunapashmi secuestrashpa jatui tucushca. Chai gentecunamanda ashtacacunaca Atlántico mar yacuta yalinajushpami huañushcanga nishpa. Atlántico mar yacuta yalita ushashpa salvarishca Olaudah Equiano esclavoca ninmi: “Huarmicuna llaquinaita caparijujta uyana, ña huañunallacuna quejarinajujta uyanaca, manllanaimi carca. Chaipi imashinapacha cashcataca pipash yaitallapash na yaita ushanllu” nishpa.

Gentecunata esclavo shina charinaca, punda tiempopillaca na tiashcachu. Cunan punllacunapipashmi tian. Mundo enteropi trabajadorcunata ricuj shuj organizacionga ninmi, casi 21 millón gentecunami esclavocuna shina trabajan. Huaquingunaca ashalla culquita, shujcunacarin nima culquitapash na chasquishpami trabajan. Paicunaca mina ucucunapi, ladrillo fabricacunapi, nali purij huarmicuna trabajaj pushtucunapi, gentecunapa huasicunapi, shuj fabricacunapipashmi esclavocuna shina trabajan nishpa. Esclavocunatashna trabajachina na legal cajpipash ashtahuan mirashpa catijun shinami ricurin.

LIBRE CANGAPACA ¿IMATATA RURASHCA?

Shina llaquinaita sufrichishcamandami ashtaca esclavocunaca libre cangapaj munashpa macanajushca. Jesús cai Alpaman shamuchun casi 73 huatacuna faltajpica, shuj alipacha macanajuj Espartaco shuti jarimi 100 mil esclavocunahuan Roma llactata llaquichingapaj munarca. Shinapash na mishai usharcachu. Cutin 1800 huatacunapica Española shuti islamada esclavocunaca paicunata trabajachij dueñocunapa contrami shayarirca. Azúcar plantaciongunapi esclavocunata llaquinaita sufrichishcamandami paicunaca guerrata callarichirca. Chai guerraca casi 13 huatacunatami pararca. Shinami 1804 huatapica Haití llactaca esclavocuna shina causanamandaca libre quedarca.

Shinapash israelitacuna Egipto llactamanda salvarishcami tucui tiempomanda yali rijsishca can. Casi 3 millón gentecunami esclavo shina causashcamanda salvarishpa libre quedarca. Chaimandami salvaringapaca pipash ayudachun minishtirca. Bibliapica ninmi: ‘Egiptopi causajcunaca, israelitacunataca shinllitapachami sirvichishpa charirca’ nishpa (Éxodo 1:11-14). Shuj faraonga, israelitacuna ama mirachun nishpami gulpi huahuacunata huañuchichun mandarca (Éxodo 1:8-22).

Israelitacunata Taita Dios salvashcamandami tucuimanda yali ashtahuan ali can. Taita Diosca Moisesmanga nircami: ‘Paicunapa ninan llaquicunataca, ñucami yachani. Egiptomanda cacharichingapami’ shamujuni nishpa (Éxodo 3:7, 8). Chaimandami cunangaman mundo enteropi judiocunaca paicunata salvashcata yaringapaj cada huata Pascua fiestata ruran (Éxodo 12:14).

ESCLAVO SHINA CAUSANACA PARA SIEMPREMI TUCURINGA

Bibliapica ninmi: ‘Taita Diospaca imatapash cashcatapacha na ruranapash na tianllu’, Diosca na cambiashcachu (2 Crónicas 19:7; Malaquías 3:6). Taita Diosca Jesustami ‘shungu faquirinshna llaquirishpa causajcunatapash cushichichun, prezu tiajcunamanbash ñami cachari tucugringuichi nishpa villachun’ cachamurca (Lucas 4:18). Gentecuna trabajashpa esclavo shina causajcunata salvanamandaca na parlajurcachu. Jesusca cai Alpapi causajcunata juchamanda, huañuimanda salvangapami shamurca. Jesusca nircami: “Chai na llullashpa villashcami, cangunataca cacharichinga” nishpa (Juan 8:32). Cunan punllacunapica Jesuspa yachachishcacunami ashtaca gentecunata shuj shuj ruraicunamanda salvashpa catijun (“¿Imashinata shuj viciopa esclavo canamanda salvarirca?” nishca recuadrota ricupangui).

Imashinami ricunchi Joseta, Blessingdapash esclavocuna shina causaimandaca Taita Diosmi salvashca. José esclavo shina causashcamanda ashtahuan yachangapaca Bibliapi Génesis capítulo 39manda 41​caman liipangui. Blessing huarmigu esclava shina causashcamanda salvarishcapash ali cashcatami yachajugrinchi.

Europapi shuj llactamanda llujchishpa cachajpimi Blessingga España llactaman rirca. Chaipimi testigo de Jehovacunata rijsishpa Bibliamanda yachajui callarirca. Paipa causaipi cambiangapami tucui shunguhuan munarca. Chaimandami shuj trabajota mascarca. Shinallata punda paita esclava shina charishca huarmihuanbash cada quilla paganata rebajachun nishpami parlarca. Shuj punllaca chai huarmica Blessingda telefonopi cayashpami imatapash ñana dibihuanguichu, perdonahuai nirca. Blessing huarmiguta esclava shina charishca huarmihuanga ¿imata pasashcarca? Paipashmi testigo de Jehovacunahuan Bibliamanda yachajui callarishcarca. Blessingga ninmi: “Taita Diosmanda cabalta yachanaca imamandapash cacharichinshnami na yashcapi ayudaita ushan” nishpa.

Jehová Diosca israelitacunata Egipto llactapi llaquinaita tratajta ricushpaca ninandami llaquirirca. Cunanbipash nali ruraicunata ricushpaca shinallatami llaquirin. Esclavo shina causanamanda salvaringapaca gentecunaca tucui cambiachunmi minishtin. Chaitaca Taita Diosmi pactachinga, Bibliapica ninmi: “Ashtahuangarin ñucanchica, jahua pachatapash, cai pachatapash mushujtami rurasha nishcatami shuyanajunchi. Chaipimi, imatapash cashcatapacha ruranaca causajun” nishpa (2 Pedro 3:13).