Taucacunami ima pasanata yachangapaj munan

Ima horapash tapuripashcanguichu, shamuj punllacunapica ñucapash, ñuca familiapash ¿imashi tucushun? ¿Imagupash na faltashpa, alicha causashun o faltajlla, llaquillacha causashun? ¿Rucuyangacamanlla causashun o joven cashpallatacha huañushun? nishpa. Pundamandapachami gentecunaca shina pensarishca.

Mundo enteropi ima pasajujta ricushpami huaquin estudiashcacunaca jipacunaman ima pasanata nishca. Huaquinbica pactarishcami. Cutin huaquinbica nimapi na pactarishcachu. Caru llactacunaman mensajecunata cachangapaj sistemata inventashca, Guglielmo Marconi inventorca, 1912​pica nircami: “Chai sistemacuna tiashcamandami guerracunaca ñana tianga” nishpa. Discocunata grabaj Decca Record nishca companiapi shuj trabajadorca, guitarrahuan tocaj grupocunataca gentecunaca ñana uyangapaj munanllu yashpami, 1962​pica Beatles nishca grupota na contratarca.

Cutin shujcunaca, jipaman ima pasanata yachangapaj munashpami, estrellacunata, planetacunata estudiaj astrólogo nishcacunapaman rin, horóscopo nishcacunata revistacunapi, comerciocunapi liin. Shujcunacarin, barajacunata ricujcunapaman o maquita liinata yachajcunapamanmi rin.

Ñaupa punllacunapica, jari curacunapa, huarmi curacunapa dioscuna imata nijta yachangapaj munashpami gentecunaca chai curacunapaman rin carca. Lidia llactamanda rey Cresopash Persia llactamanda rey Cirohuan macanajushpa ima pasanata yachangapaj munashpami, Delfos nishca templopi curamanga valishca cosascunata cararca. Jatun llactaca mishai tucungami nijta uyashpami, rey Cresoca mishagrinimi yashpa rey Cirohuan macanajungapaj rirca. Shinapash pairami mishai tucurca.

Pi mishanata na clarota nishca cajpipash, ishcandimandaca shujca mishanallatami carca. Na clarota nijpimi, rey Cresoca tucuchi tucurca. Cunanbi gentecunapash ¿imata pasashca? Maicunaman rishpapash ¿cabalta yachai ushashcachu?