Yapata llaquilla sintirishpa yalijujpi

Brasil llactamanda Adrianaca ninmi: “Tucui ratopimi yapata pinarishpa llaquilla yalin carcani, huañungapaj imatapash ruranshnami yarihuarca” nin.

¿QUIQUINBASHCHU Adrianashna sintirishpa, huañungaparapash munapashcangui? Adrianaca yapata llaquilla, pinarishca, paillami sintirin carca. Paica depresión grave nishca ungüitami charirca.

Japonmanda Kaoru shuti jarita ima pasashcata ricupashun. Paica, paipa mayoriashca ungushca taitamamatami cuidarca. Paica ninmi: “Chai tiempopimi ñuca trabajopica ninanda trabajachihuanajurca, shaijushcami sintirijurcani. Micuitapash na micunayarcachu, puñuitapash na ushajurcanichu. Chaimandami huañungaparapash munarcani” nin.

Nigeria llactamanda Ojebode shuti jarica ninmi: “Siempremi llaquilla yalin carcani, imagumandapash huacajunllami carcani. Shina sintirijuimandami huañuchiringapaj munarcani” nin. Ojebode, Kaoru, Adrianapash na huañuchirircachu, shinapash cada huatami casi ochocientos mil gentecuna huañuchirin.

¿IMATA AYUDAI USHANGA?

Paicunamandallata huañuchirishcacunamandaca, taucacunaca jaricunami can. Taucacunaca pinganayachimandami ayudataca na mascashca. Jesusca, huañujuj gentecunami doctorcunataca minishtin nirca (Lucas 5:31). Quiquinbash llaquillapacha sintirijushpaca ayudata mascanami capangui. Depresionda charij tauca gentecunaca doctorcunapa tratamientocunata catishpami alillata tucushca. Chaitami Ojebode, Kaoru, Adrianapash rurarca. Cunanbica paicunaca alillatami sintirishca.

Depresionda mishangapaca huaquin doctorcunaca jambicunata ufiachun, psicologocunapaman richunmi mandan. Shinallata cai ungüita charijcunaca familiacuna amigocunapash intindichun, pacienciahuan ayudachunmi minishtin. Tucuita yali amigoca Jehová Diosmi can. Paica Bibliahuanmi ashtacata ayudan.

¿IMAHORAPASH TUCURINGACHA?

Depresión ungüita charijcunaca ashtaca tiempotami tratamientocunata catina can. Ñaupaman catingapami, paicunapa causaipi huaquin cambiocunata rurana can. Quiquin cai ungüita chimbapurajushpaca, shamuj punllacunapi ali causaigu tianatami crina capangui. Caitami Ojebodeca shuyajun. Chaimi paica nin: “Isaías 33:24pi shimicuna pactarinataca yariami shuyajupani. Chaipica pipash ñana ‘ñucaca huañujunimi’ ningachu” ninmi. Taita Diosca cai Alpataca ‘mushujtami’ rurasha, chaipica ima “nanaipash”, llaquilla sintirijunapash ñana tiangachu ninmi (Apocalipsis [Revelación] 21:1, 4). Quiquinga ñana cunanbishna llaquilla sintiripanguichu, yaritallapash ñana yaripanguichu (Isaías 65:17).

Bibliapa cai textocunami ayudai ushapanga

Imashina sintirijta Taita Diosca yachanmi.

‘Mandaj Taita Dios ñucami, cangunapaj ali lado maquimanda pushaj cani. Ñucami: “Na manllanachu canguichi, ñucami ayudasha” nini’ (Isaías 41:13).

Jehová Diosca ñucanchicuna imashina sintirijushcata alipacha intindimandami, ayudangapaj munan.

Bibliapa nishcacunapi yuyapai.

Eliasca ‘huañungapaj munashpami cashna nijurca: “Mandaj Dioslla, caicamanllami causangapaj munani. Ñuca causaita quichuhuailla’ (1 Reyes 19:4).

Ojebodeca ninmi: “Cai textopi yuyanami ayudahuarca. Profeta Eliasca ñucashnallatami sintirijushcarca” nin.

Diospa sirvijcunamanda Bibliapi yachajupai.

Jesusca Pedrotaca nircami: “Crishpa aliguta catichunmi, canmandaca Diosta ninanda mañarcani” nishpa (Lucas 22:32).

Quimsacaman Jesustaca na rijsinichu nishca jipaca Pedroca ninandapacha llaquirishpami huacarca. Kaoruca ninmi: “Jehovapash, Jesuspash Pedromanda preocuparijta yachanaca, ashtacatami animahuarca”.

Cunanbishnaca ñana llaquilla sintiripanguichu, yaritallapash ñana yaripanguichu (Isaías 65:17)