¿Maipita cabalguta yachajuita ushapanchi?

Ashtaca huatacunatami gentecunaca, ungüicuna imashina shujman shujman yalin cashcataca na yachashpa causarca. Chaimi ashtaca millón gentecunaca ungüicunamanda huañurca. Shinapash ashtaca huatacuna jipami cientificocunaca imamanda ungüicuna tiashcata yachai chayarca. Paicunaca bacterias, virus nishcacunamanda ungüicuna tiashcatami cuenta japirca. Chaita yachanami ungüicuna ama japichun, ungüicunamanda cuidaringapapash imata rurana cashcata yachachun ayudashca. Shinallata gentecuna ashtaca tiempota sano causachun ayudashca.

Cai cati tapuicunata yachanaca minishtirishcami can. Cai tapuicunamandaca ¿imatata yachapangui?

• Diosca ¿pita can?

• Jesusca ¿pita can?

• Diospa Reino o Gobiernoca ¿imata can?

• Shamuj punllacunapica ¿imashinashi causashun?

Ashtaca millón gentecunaca, cai tapuicunapa respuestacunata yachashcamandami cunanbica ali causanajun. Cai tapuicunapa respuestacunata yachanami quiquindapash ali causachun ayudanga.

¿CABALGUTA YACHAITA USHARINLLU?

Imagumandapash cabalta yachaitaca usharingacha yashpami talvez pensaripangui. Shinapash ima cierto cajta, ima na cierto cajta yachanaca cunanbica shinllimi can. ¿Imamandata shina nipanchi?

Ashtaca gentecunami gobiernocunapa nishcacunapi, jatun empresacunapa nishcacunapi, telepi, radiopi, o Internetpi nishcacunapica ñana crin. Gentecunaca ciertotacha nijun o paicunapa yuyaitallachu villajun nishpami pensarin. Ashtacacuna na cabalta yachachishcamanda, llullashpa yachachishcamandami gentecunaca ima cierto cajta, ima na cierto cajtaca na yachai ushan. Chaimi gentecunaca ñana imacunapipash confian.

Shina cashpapash minishtirishca tapuicunapa cabal respuestacunatami tarita ushapangui. Chaipaca ¿imatata rurana capangui? Imashinami shuj tapuicunapa respuestacunata yachangapaj informacionda mascapangui, shinallatami chai minishtirishca tapuicunapa respuestacunataca mascana capangui.

¿IMASHINATA CABALGUTA YACHAITA USHAPANCHI?

Cada punllami imagumandapash cabalta yachangapaj informacionda mascapanchi. Por ejemplo, Jessica huarmiguca micunacunata randijushpami chai micunacuna manita charishcata o na charishcataca siempre ricuna can. Jessica huarmiguca ninmi: “Ñuca ushiguca manitaca nimamanda na micuita ushanllu. Chaita micushpaca ñuca ushiguca huañuitami ushan. Chaimandami micunaguta rurangapaj imagutapash nara randishpallata fundapi imacunatalla nijta ricuni. Jipamanga chai micunacuna imacunahuanlla rurashcata yachangapami informacionda mascani. Chai micunata ruraj empresamanbashmi cayani. Shinallata chai empresa micunacunata alita o nalita rurajta yachangapami Internetpi informacionda mascani” nishpa.

Importante tapuicunapa respuestacunataca, talvez cada punllaca na mascajupanguichu. Shinapash Jessica huarmigushna cabalta yachangapaca ¿imatata rurana capanchi?

• Ashtahuan informacionda mascana capanchi.

• Ashtahuan yachangapaj esforzarina capanchi.

• Internetpi o shuj ladocunapi informacionda mascajushpaca, chai información cierto o na cierto cashcata ali ricuna capanchi.

Shina rurashpaca importante tapuicunapa respuestacunata yachachunmi ayudaita ushan. Shinaca importante tapuicunapa respuestacunata imashina yachajui ushashcata ricupashunchi.

BIBLIAPILLAMI CABALTA YACHAJUITA USHAPANCHI

Jessica huarmiguca, micunacuna manita charijta o na charijta yachangapami ali ali ricungapaj esforzarirca. Shina ali ali ricunami importante tapuicunapa respuestacunata tarichun paitaca ayudarca. Jessica huarmiguca nircami: “Bibliata ali ali liina, ashtahuan informacionda mascanami Bibliamanda cabalguta yachajuchun ayudahuarca” nishpa. Ashtaca ashtaca gentecuna Jessica huarmigushna rurashcamandami cai cati importante tapuicunapa respuestacunata Bibliapi tarishca.

• ¿Imapata causanchi?

• Huañushca jipaca ¿imata tucunchi?

• ¿Imamandata ashtaca llaquicuna tian?

• Llaquicunata tucuchingapaca ¿imatata Taita Diosca rurajun?

• Familia ucupi cushilla causangapaca ¿imatata rurana capanchi?

Cai tapuicunapa, shuj tapuicunapa respuestacunata yachangapaca Bibliatami liina capangui. Shinallata www.pr418.com paginapi ashtahuan informacionda mascaita ushapangui.