Jehová Diosta alabangapaj mushuj canticocuna
1 Watch Tower Bible and Tract Society of Pennsylvania organizacionba representantecunaca 4 de octubre de 2014pimi paicunapa huata tandanajuita charirca. Chai tandanajuipica ñucanchi canticocunataca cutinmi revisagrinchi nishpami villarca. Ashtahuanbash yarichircami, canticocunata candashpa Jehová Diosta adoranaca minishtirishcapachami can nishpa (Sal. 96:2).
2 ¿Imamandata canticocunata cutin revisanaca minishtirin? Cunanbica, Bibliapi huaquin textocunataca ashtahuan alimi intindishcanchi. Chaimandami tauca canticocunapa letracunataca cambiana tucunga (Prov. 4:18). Shinallata, ashtaca idiomacunapimi Traducción del Nuevo Mundo Bibliataca revisanajun. Chaimandami punda Bibliamanda japishca shimicunataca mushuj canticocunapica cambiana canga. Ashtahuanbash, cántico libropi tauca canticocunapa letracunata cambiana cashcamandami, shuj mushuj canticocunatapash mirachingapaj aprovechagrinchi.
3 Chai mushuj canticocunata candangapaca ¿mushuj cántico libro llujshingacamanllu shuyana capanchi? Na. Shamuj quillacunapillatami huaquin canticocunataca jw.org paginapi churashun. Cada mushuj cántico llujshishcandimi Villachinata Yachajungapaj Tandanajuita tucuchingapaca chai canticota candashun. Maijan semanapi candana cashcata yachachunga, chai semanapa programapimi canticopa temata churashpa chai ladopica “mushuj cántico” nishpa churashun.
4 Mushuj canticocunata candanata yachajungapaca ¿imata ayudanga? Shuj canticota yachajunaca na facilchu can. Shinapash Salmos librota escribij runagushnami cashna ningapaj munanchi, Jehová Dios ‘candaca candajushallami, na upalla quedashachu’ nishpa. Mushuj canticocunata yachajushpa tucui shunguhuan candachunga, cai cati yuyaicunami ayudanga.
Canticocunata candanata uchalla yachajungapaca, jw.org paginapi llujshishca canticocunapa musicatami cutin cutin uyana capanchi.
Canticopi imata nijujta aliguta intindishpa canticotaca de memoria yachajupashunchi.
Aliguta candai ushangacaman canticocunataca cutin cutin repasapashunchi.
Familiapi tucuicuna cushijushpa aliguta candanata yachajuchunga, Familiahuan Adorana Tutapi canticocunataca repasapashunchi.
5 Shamuj quillacunapi, Villachinata Yachajungapaj Tandanajuita tucuchingapaj mushuj canticota candana cajpica, primeroca canticopa musicatarami congregacionga uyana can. Chai jipami tucuicuna chai canticota candanga.
6 Tandanajuicunapi tucuicuna tandanajushpa canticocunata candashpaca Jehová Diostami alabanajunchi. Chaimandami tandanajuipi canticota candana horas chayajpica, na shuj cosascunata rurajuna canchi.
7 Diosta alabangapaj canticocunata alicachishcataca ¿imashinata ashtahuan ricuchi ushanchi? Jatun Tandanajuicunapica tutamandapash chishipashmi canticocunapa musicacunata uyachin. Chai canticocunapa musicacunata grabangapaca, tucui llactacunamanda huauquipanicunami huatapi ishcai viaje Patterson-Nueva York llactapi tandanajun. Chai llactaman ringapaca paicunapa culquihuanllata pasajecunata pagashpami rin. Chaimandami Jatun Tandanajuicunapi, canticocunapa grabashca musicacunatami uyagrinchi nijta uyashpaca, ñucanchipash aliguta uyangapami uchalla tiarina capanchi. Shinami ñucanchicunaca chai tandanajuipi imata yachajugrijushcata aliguta intindingapaj listo cashun (Esd. 7:10).
8 Cunan tandanajuitaca “¡Taita Dios churashca Reino ucha chayamuchun!” nishca mushuj canticota candashpami tucuchishun. Cai mushuj canticotaca, Diospa Reinopi Jesús ña 100 huatacunata mandajushcamandami rurashca. Cai cántico llujshishcataca ñucanchi organizacionba representantecunapa huata tandanajuipimi villarca.
9 Mushuj canticocunapash Jehová Diospa carashca ‘aligucunami’ can (Mat. 12:35a). Chaimandami, chai canticocunata yachajushpa tucui shunguhuan candangapaj esforzarina capanchi. Shinami Jehová Dios munashcashna alabashpa paita alicachishun (Sal. 147:1).