“Canba cumbahuanra ali tucungui”

Caipi pensaripashunchi: Jesuspa punllacunapi Galilea llactapi causajushcanguiman. Chaimi Jerusalén llactapi Fiesta de las Cabañas nishcaman rijupangui. Jerusalenmanga shuj shuj llactamanda Jesusta ali catijcunapashmi rishca. Chai llactapica ashtaca ashtaca gentecunami tian. Quiquinbashmi shuj sacrificiota Jehová Diosman cungapaj munangui. Chaimi quiquinba chivota pushashpa gentecunalla junda quichiji ñanda catishpa Diospa templo huasiman rijupangui. Diospa templo huasimanga maitapash na yaicui ushaimi can. Ashtaca ashtaca gentecunami Diosman imagutapash carangapaj rishca. Unai unaita shuyashca jipami quiquinba chivota sacerdotecunaman cuna urmashca. Chai ratomi quiquinba huauquihuan culirashca cashcata yaringui. Tal vez chai huauquica chai ashtaca gentecunapurapimi canga. Jesusca shina pasajpi imata rurana cashcatami Bibliapi ricuchirca (Mateo 5:24, liingui). Jesuspa shimicunata pactachingapaca quiquinbash, culirashca huauquipash ¿imatata rurana capanguichi? Ura lado recuadropi imata ruranata agllapangui.

¿CAIMANDACA MAIJANDATA RURASHA?

• Imatapash nishpa o rurashpa nali sintichishca cashpalla chai huauquihuan parlana.

• Chai huauqui culpata charin yashpa o imagumandapash culirajlla cajpica chai huauqui pandarijushcata intindichingapaj parlana.

• Chai huauqui ima nijta ali ali uyana. Shinallata na culpata charishpapash shungumanda disculpahuai nina.

CULIRASHCA HUAUQUICA ¿IMATATA RURANA CAN?

• Congregacionbi huauquipanicuna paipa lado tucuchunmi nali sintichishcata parlana.

• Chai huauqui ñucami culpata charini ningacaman imatalla rurashcata yarichishpa chai huauquihuan parlana.

• Pihuanbash culirashpa tucui shunguhuan perdonana shinlli cashcata, culirashca huauquihuan parlana na jahualla cashcatapash yarina.

Cunan punllacunapi Diosta adorangapaj sacrificiocunata na cuna cashpapash ¿imamandata Diosta ali adorangapaca Jesús nishcata pactachishpa huauquipanicunahuan casilla ali causana capanchi?