Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
4-10 DE MARZO
BIBLIAPA VALISHCA YUYAICUNA | ROMANOS 12-14
“Cristo shinami juyana capanchi”
it-1-S 429
Juyana
Congregacionbica tucuicunallatami huauquipanipurashna, randimanda juyarina can (griego shimipi fi·la·del·fí·a, nishpaca, “huauquita juyana” nisha ninmi). (Ro 12:10; Heb 13:1; 1Pe 3:8tapash liipangui). Congregacionbica, shuj familia ucupishna shujllashna, randimanda juyarishpami catina can. Pipash shina juyaita ricuchijushpapash, congregación ucupi shungumanda ashtahuan juyarishpa catingapami esforzarina can (1Te 4:9, 10).
Fi·ló·stor·gos nishca griego shimica, familiapi ninanda juyarishpa, ali llevarishpa, shujllashna cashcatami intindichin. Fi·ló·stor·gos shimica “llaquishpa ninanda juyashcatami” ricuchin. Fi·ló·stor·gos shimica ishcai shimimandami shamun. Shujca stér·gō shimimi can. Stér·gō nishca shimica, shuj familia ucupi tucuicuna ninanda juyarishcatami ricuchin. Jesusta catijcunataca, cashna juyaita charichunmi apóstol Pabloca mandarca (Ro 12:10). Apóstol Pabloca, tucurimui punllacunapica “pitapash na juyaj” gentecunapashmi tianga nircami (griego shimipica á·stor·goi ninmi). Cai laya gentecunaca huañuitami taringa (2Ti 3:3; Ro 1:31, 32).
w09-S 15/10 8 párr. 3
“Tucuicunahuan casilla aligutami causana canguichi”
3 (Romanos 12:17, liingui). Apóstol Pabloca, ñucanchita pipash nali tratajpica na chashnallata tigrachinachu canchi nircami. Cai consejoca na testigo huarmita o na testigo cusata charijcunapami ashtahuanbachaca ali can. Jesusta ali catij cusa o huarmica, paipa huarmi o cusa imatapash nalicachishpa o ani ani tratajpipash na chashnallatachu tigrachina can. Chashnallata tigrachishpaca, problemacuna mirachunllami ayudan.
w07-S 1/7 24 párrs. 12, 13
“Cangunata nalita rurajpipash, na chashnallata tigrachinachu canguichi”
12 Apóstol Pabloca tucui gentecunata ali tratachun, ñucanchita ‘nalita rurajpipash, na chashnallata tigrachichunmi’ animarca. Cai consejota nara cushpallatami, apóstol Pabloca nishcarca: ‘Nalita ruranataca, na ricunayachishpami’ causana canguichi nishpa. Shinaca nalita ruranata millanayachishpaca shujcuna ñucanchita llaquichijpipash na shinallata tigrachishunllu. Nalicunata rurashpa shujcunata randi llaquichijushpaca “nij tucushpallami” juyanajunchiman. Apóstol Pabloca caigutapashmi nirca: “Tucuicunapaj ñaupajpi, aliguta ruranatami yarina canguichi” nishpa (Romanos 12:9, 17). Cai shimicunataca ¿imashinata ñucanchi causaipi pactachita ushapanchi?
13 Chai tiempopaca, Corinto llactamanda huauquipanicuna catiriashpa llaquichi tucunajujta ricushpami apóstol Pabloca cashna nishpa escribirca: “Angelcunapash, cai pachapi causajcunapash, ñucanchitaca asishpami ricunajun. [...] Imapash tucushpaca alimi canman nijpipash, Dios bendiciachun nishpami tigrachinchi. Catiriashpa llaquichijpipash, llaquitaca apanchillami. Ñucanchita nalicachijpipash, aligutami yarichinchi” nishpa (1 Corintios 4:9-13). Jesusta ali catijcunataca, tucui gentecunami imata rurajujtaca ali ali ricurianajun. Ñucanchicuna shujcunaman villachijujtapashmi ricunajun. Chaimi huaquinbica, ñucanchita shujcuna nali tratajpipash, ñucanchicuna paicunata aliguman tratajpica, gentecunaca ñucanchi villachinajushcata uyangapaj munanga (1 Pedro 2:12).
w12-S 15/11 29 párr. 13
Caishujhuan chaishujhuan perdonarishpami causana canguichi
13 Pipash quiquinda nali tratashca cashpapashmi, tal vez Bibliamanda yachajungapaj munanga. Apóstol Pabloca nircami: “‘Canda fiñaj runa yarjaihuan cajpica, micunaguta caranguilla. Yacunayaihuan cajpipash, yacuta caranguilla. Shina carajpica, ninanda llaquirishpa nalita rurashcamandaca, pingai tucungami’. ‘Ima nalita yarichinajuj mishachunga, na saquinachu cangui. Ashtahuangarin aliguta rurashpami, chai nalitaca mishana cangui’” nishpa (Rom. 12:20, 21). Ñucanchita llaquichijpipash, paicunata respetohuan ali tratajpica paicunaca tal vez ali gentecunami tucunga. Paicunata intindishpa, llaquishpa tratashpapashmi paicunataca Bibliamanda yachajuchunga ayudai ushapanchi. Ima cajpipash, shujcuna quiquinda nali tratajpipash quiquin aliguman respetohuan tratajpica, gentecunallatami cuenta japinga (1 Ped. 2:12; 3:16).
Bibliapa Valishca Yuyaicunata Mascashunchi
Diversiongunataca ali ricushpa agllapashunchi
5 Imata rurajushpapash, Jehovata ali adorajushcata o nali adorajushcatami ricuchinchi. Apóstol Pabloca nircami: ‘Cangunapa cuerpotaca, animalta Diosman caranshnami, paipajlla causashpa Taita Diosta cushichina canguichi’ nishpa (Romanos 12:1). Jesusca nircami: ‘Canba Taita Diostaca, tucui shunguhuan, tucui almahuan, tucui yuyaihuan, tucui ushaihuan juyangui’ nishpa (Marcos 12:30). Jehová Diosmanga alitallami cungapaj munapanchi. Ñaupa punllacunapi israelitacunaca, shuj sano animalta huañuchishpami Jehovaman cuna carca. Chai animal suchu, ñausa o imapash cajpica Jehová Diosca na chasquinllu carca (Levítico 22:18-20). Cunanbipash ¿imamandata Jehová Diosca ñucanchicuna paita adorachunga na saquinman?
6 Jehová Diosca mandanmi: ‘Ñucaca, jucha illajmi cani. Cangunapash, jucha illajmi causana canguichi’ nishpa (1Pedro 1:14-16; 2Pedro 3:11). Alita rurashpa, aliguta adorajpillami Jehová Diosca ñucanchicuna paita adorachun saquinman (Deuteronomio 15:21). Ali adorangapaca, Jehová Dios millanayachishca cosascunata na rurashpami jarihuan huarmihuan mapayanacunamandapash, macanajuicunamandapash, imapash brujería cosascunamandapash caruyana capanchi (Romanos 6:12-14; 8:13). Chashna cosascunata ricuchij o rurachij diversiongunata agllajpica, nalicachishpami Jehová Diosca ricunga. Ashtahuangarin, Jehovata ali adoraitaca na ushashunllu. Jehovapash paita adorachunga na munangachu. Paipa amigo cashpa catitapash na ushashunllu.
w08-S 15/6 31 párr. 4
Romanos libropa valishca yuyaicuna
13:1. ¿Imashpata “cunambi mandajcunaca, Taita Dios churajpimi mandanajun” nipanchi? “Cunambi mandajcunaca, Taita Dios churajpimi mandanajun” nishpaca Taita Diosllata gobiernocuna tiachun saquishcatami ninajupanchi. Bibliapi huaquin profeciacunapica Taita Diosllatami huaquin mandajcunata churashca nin.
11-17 DE MARZO
BIBLIAPA VALISHCA YUYAICUNA | ROMANOS 15, 16
“Aguantanata ayudachun, cushijuitapash cuchun Jehová Diosta mañapashunchi”
“Huacajcunahuanga huacaichi”
11 Lázaro huañujpi, Jesús ninanda llaquirishcata liishpaca alillatami sintirinchi. Alillata sintiringapaca, Bibliapi shuj textocunatapashmi ricuita ushapanchi. Romanos 15:4pica ninmi: ‘Ñucanchi yachajuchunmi, Diosca ñaupallata escribichishca. Chai escribishca Shimicunami’ ñucanchitaca alillata sintirichun ayudan. ‘Shinamandami, japigrinata yaria shuyaita’ ushanguichi nishpa (Rom. 15:4). ¿Quiquinba familiapipash huañui tiapashcachu? Shina cajpica, cai cati textocunata ricushpami alillata sintiri ushapangui:
▪ “Mandaj Diosca, shungupi ninanda llaquirishpa causajcunapaj ladopimi. Shungupi ninanda llaquirishpa causajcunatami quishpichin” (Sal. 34:18, 19).
▪ “Ñuca shungu ucupi ashtaca yuyaicunahuan musparijujpica, can cushichishcacunami, ñuca almatapash cushichihuarca” (Sal. 94:19).
▪ “Ñucanchi Apunchi Jesucristopash, ñucanchi Taita Diospash, ninanda juyashpami, causaita causaicaman cushijushpa causanataca aliguta yariashpa shuyanajuchun, ñucanchiman carashca” (2 Tes. 2:16, 17).
Aguantashpa causanami ‘tucuita aligutapacha yachachijun’
5 Jehovatami fuerzata carahuai nishpa mañana canchi. Bibliapica ninmi, Taita Diosmi ‘na ñapash fiñarinata’ o aguantanata, ‘cushijuitapash’ caran nishpa (Romanos 15:5). Taita Diosllami ñucanchimanga aguantachun fuerzata cuita ushan. ¿Imamandata shina ninchi? Ricupangui. Taita Diosllami ñucanchicuna imashina cajta, imashina sintirijujta, imashina causaita charishcataca alipacha yachan. Paillami aguantangapaj ñucanchi imata minishtijujtaca ali yachan. Chaimandami Bibliapica nin: “Paita manllajcuna, imata munashcataca pactachingami. Shinallata paicuna caparishpa mañashcatapash, uyashpa quishpichingami” nishpa (Salmo 145:19). Shinapash aguantangapaj fuerzata cuhuai nishpa mañajpica ¿imashinata Jehová Diosca ñucanchi mañashcata contestan?
‘Canba Taita Diosta juyangui’
11 Jehová Diosmi shamuj punllacunapica cushilla, tranquilo causaita caranga (Rom. 15:13). Shamuj punllacunapi para siempre causanata yachashpami llaquicuna shamujpipash aguantanchi. Ungidocunaca jahua cielopimi causanga (Apoc. 2:10). Cutin ashtacacunaca Jehová Diosta ali sirvijuimandami shuj juyailla paraíso Alpagupi causanga (Luc. 23:43). Chashna ali causaita Taita Dios caranata yachashpaca ¿nachu cushilla, tranquilo sintirishpa tucuita ali caraj Taita Diostaca ashtahuan juyana cashcanchi? (Sant. 1:17).
Bibliapa Valishca Yuyaicunata Mascashunchi
w89-S 1/12 24 párr. 3
‘Canguna imata carashpapash tucui shunguhuan juyashpa carashcatami yachani’
Na judio huauquipanicunaca, Jerusalenmanda huauquipanicunataca ninandami ayudangapaj munashcanga. Cai huauquipanicunaca, Jerusalenmanda huauquipanicunamanga ashtacata dibinajuj cuendami carca. ¿Nachu Taita Diosmanda ali villaigucunataca Jerusalenmanda huauquipanicuna, na judio huauquipanicunamanga villarca? Caipi pensarishpami apóstol Pabloca nishcanga judiocunaman o “Israelcunaman aliguta Dios carajpimi, na israelcunapash [o na judiocunapash] japinajunga. Chaimandami, cutin paicunaman imagu illajpipash, caranata charin” nishpa (Romanos 15:27).
it-1-S 670 párr. 11
Deuda, deudor
Imacunatallata dibi nin. “Dibi”, “dibi tucushca” shimicunataca Bibliapica, pipash culquita fiachijpi dibi tucushcatallaca na nijunllu, shuj yuyaicunata intindichingapapashmi utilizan. Pitapash trabajachishpaca, trabajadormanga paganami canchi. Paimanga dibimanda o ‘cunapacha cashcamandami’ paganchi (Rom 4:4). Juchayuj gentecunaca, pitapash llaquichishpaca ‘nalitami ruran’, paicunaca dibi tucushcashnami can. Chaimandami paicunata perdonachun minishtin. Taita Dios ñucanchi rurashca ‘juchacunata cungachun’ o perdonachunga, shujcuna “ñucanchita ima nalita rurashcacunata” perdonanami capanchi (Mt 6:12, 14, 15; Lu 13:4). Tucui gentecunaman Taita Diosmanda ‘ali villaita villanamanda’ parlashpaca, apóstol Pabloca dibi tucushcashna sintirishpami “villanatapachami charini” nirca (Ro 1:14, 15). Jerusalenmanda huauquipanicunami, na judio huauquipanicunamanga Taita Diosmanda yachachishca carca. Chaimi na judio huauquipanicunaca, Jerusalenmanda huauquipanicunahuanga “dibi tucushcashna” carca. Chaimandami Jerusalenmanda huauquipanicunata imaguhuanbash ayudajushpaca, paicuna rurana cashcatalla ruranajurca (Ro 15:26, 27).
it-2-S 708 párr. 5
Presciencia, predeterminación
Ninanda shuyashca miraica Mesías o Cristomi cana carca. Cai miraimandami cai Alpapi tucui alita ruraj gentecunaca bendiciai tucuna carca (Gál 3:8, 14). Adán y Eva, Jehovata na cazushca jipami cai “miraimandaca”, Jehová Diosca primera vez parlarca. Caica Abel runagu nara nacirijpimi pasarca (Gé 3:15). Adán y Evaman cai miraimanda parlashcamandapacha, cai “mirai” pi cashcata yachai chayangacamanga 4.000 yali huatacunami yalirca. Cai ‘ñaupamandapacha na yachachishca pacashpa charijushca’ miraica Mesías o Cristomi carca. Chaimandami “cai villajunataca, ñaupamandapachami na yachachishpa pacashpa charijushca” nipanchi (Ro 16:25-27; Ef 1:8-10; 3:4-11).
18-24 DE MARZO
BIBLIAPA VALISHCA YUYAICUNA | 1 CORINTIOS 1-3
“¿Quiquinga Diospa espirituta charij runa, o Diospa espirituta na charij runachu capangui?”
Espiritualmente ali cana nishpaca ¿imatata ningapaj munan?
4 Pundapica Diospa espirituta na charij runamanda ricupashun. Diospa espirituta na charijca cai mundopa nali yuyaicunata catishpami paipa munaita rurashpa causan. Chaimi apóstol Pabloca nirca, “Diablollatami, Diosta na cazujcunataca cunangaman imatapash nalitalla rurachijun” nishpa (Efes. 2:2). Cai mundopa nali yuyaita catishpami paicunashna causan. Chaimi paicunaca paicunapa alishnallata ricurishcata rurashpa, Taita Diospa mandashcacunata cazungapapash na esforzarin. Diospa espirituta na charij gentecunaca shujcunapa ñaupajpi ali ricurinata, ashtaca culquita charinata, paicunapa munashcata rurashpa causanatallami munan.
5 Diospa espirituta na charij runaca paicunapa ‘munaitalla rurashpami causan’ (Gál. 5:19-21). Apóstol Pabloca Corinto huauquipanicunaman shuj cartata cachashpami, Diospa espirituta na charij runacuna imashina cashcata parlashpa cashna nirca: Shujcunapa problemacunapi satirin, shujcunata shicanyachin, pitapash ama cazuchun animan, autoridadcunapa ñaupaman pushan, autoridadcunata na respetan, micunata, ufianatami ashtahuan importante cashcata ricun. Shinallata tentaciongunapi jarcaringapapash na esforzarin nishpa (Prov. 7:21, 22). Jesusta catij Judas runaguca nircami, huaquingunaca ‘Diospa espiritutaca na charinllu’ nishpa (Jud. 18, 19).
Espiritualmente ali cana nishpaca ¿imatata ningapaj munan?
6 Diospa espirituta charijcunaca shujpachami can. Diospa espirituta charijcunaca Taita Dioshuan ali amigo cangapaj, paipa ejemplota catingapami esforzarin (Efes. 5:1). Chaica Jehová Dios imashina pensajta catingapaj munashcatami ricuchin. Diospa espirituta charijca Taita Dios tiajtami crin. Shinallata Diospa mandashcacunata paipa causaipi pactachin (Sal. 119:33; 143:10). Paipa ‘munaitalla ruranapa’ randica ‘Diospa espiritu granota fucuchinshna’ ali cualidadcunata charingapami esforzarin (Gál. 5:22, 23). Espiritualmente ali canata ali intindingapaca caipi pensaripashunchi. Pipash musicamanda yachajungapaj munashpaca, musicata ninanda gushtashcatami ricuchin. Shinallatami Taita Diospa mandashcacunata ninanda alicachishpaca Diospa espirituta charishcata ricuchin.
Espiritualmente ali cana nishpaca ¿imatata ningapaj munan?
15 ¿Imashinata Jesuspa ejemplota cati ushapanchi? 1 Corintios 2:16pica ninmi, ‘Cristopa yuyaitami charina’ canguichi nishpa. Shinallata Filipenses 2:5pica, “Cristo Jesús yarishpa causashcashnallatami, cangunapash yarishpa causana canguichi” nijun. Jesuspa ejemplota catingapaca, Jesús imashina cashcata, imashina pensashcata, imata rurashcatami ali yachajuna capanchi. Jesuspaca paipa Taitahuan ali canami ashtahuan importante carca. Jesuspa ejemplota catinami Taita Dioshuan ali amigo cachun ayudan. Chaimandami ñucanchipash Jesús pensashcashna pensangapaj esforzarina capanchi.
Bibliapa Valishca Yuyaicunata Mascashunchi
it-2-S 886 párr. 5
Ali yachai
Cai mundopi ali yachaita charinchi nishca gentecunaca, Jesús huañushcamanda Taita Dios carasha nishcagutaca na valichircachu. Ali yachaita charishpapash, ali mandanajushpapashmi cai mandajcunaca “punchapamba Apunchi Jesustaca racu caspipimi huañuchirca” (1Co 1:18, NM; 1Co 2:7, 8). Shinapash Taita Diosca, cai mundopa ali yachaitaca, yanga na valishca cashcatami ricuchirca. Gentecunapa yuyaipica, Taita Diospa munaica ‘juizu illanshnami’ ricurirca. Cai mundopi ali yachaita charinchi nishcacunaca, shujcunataca imatapash na yachajtashna, ushaita na charijtashna, yangallacunatashnami ricurca. Shinapash Taita Diosca cashna gentecunatami, paipa munaita pactachingapaca utilizarca. Caita rurashpami, Taita Diosca cai mundopi ali yachaita charinchi nishcacunataca pingaichirca (1Co 1:19-28). Apóstol Pabloca, Corinto llactamanda huauquipanicunataca ‘Taita Diosmanda ali yachachij shimicunaca, na cai pachamandachu. Cai pachata mandajcunamandapash na canllu. Chai mandajcunaca chingangami’ nishpa yarichirca. Shinaca cai pachapa o cai mundopa ali yachaica, Taita Diospa ali yachaihuanga na igualanllu (1Co 2:6, 13.) Shinallata Colosas congregacionmanda huauquipanicunataca “pipash cangunata pactarallapash aliguta yachajunami nij tucushpara, yanga parlocunatalla parlashpa pandachinman” nirca. “Aliguta yachajunami” nishca shimica, fi·lo·so·fí·as nishca griego shimimandami shamun. Fi·lo·so·fí·as nishpaca “ali yachaita juyana” nisha ninmi (Col 2:8; versículo 20manda 23camanbash liipangui).
w08-S 15/7 27 párr. 6
Corintios librocunapa valishca yuyaicuna
2:3-5. Apóstol Pablo, Corinto llactaman villachingapaj rijushpaca: “¿Cai rijsishca, charij llactapica, griegocunapa panda yachachishcacunata alicachij gentecunataca ali villachi ushashacha?” nishpami tapurishcanga. Shina yuyashpapash apóstol Pabloca manllaicuna, nali munaicuna paita mishachunga na saquircachu. Chaipa randica Taita Dios mingashcataca alipachami pactachirca. Ñucanchicunapashmi apóstol Pablo shina, maipipash villachina shinllilla ricurijpica na manllashpa villachina capanchi. Apóstol Pablo shina Taita Diosmanda ali villaigucunata villachishpa cati ushangapaca, Jehová Diostami ayudahuai nishpa mañana capanchi.
25-31 DE MARZO
BIBLIAPA VALISHCA YUYAICUNA | 1 CORINTIOS 4-6
“Tanda masapi ashalla levadurata chapujpica, tucuillatami punguichin”
it-2-S 212
Levadura
Cai chimbapuraitallata churashpami apóstol Pabloca, Corinto congregacionmanda juchata rurajuj runata llujchichunga mandarca. Paica nircami: “Tanda masapi ashalla levadurata chapujpica, tucuillatami punguichin. ¿Chaitaca nachu yachanguichi? Mushuj masashna tucungapaca, huaglishca levadurata shitanshna, mapa illaj tucuichi. Shina rurashpaca, levadura illaj tanda masashnami ali canguichi. Pascua punllapi Diosman carajpi huañuchishca Llamashnami, Cristoca ñucanchimanda ña huañurca” nishpa. Chai jipallami “levadura” nishpaca imamanda parlajushcata intindichirca. Chaimi nirca: “Shina cashcamanda cunanga, pascua punllapi cushijushpa micuna jatun fiestata rurashunchi. Fiestata rurashpaca, huaglishca, nalita ruraj, jatun nali levadurahuanga, napacha micunachu canchi. Ashtahuangarin levadura illaj tandata rurashpa, imatapash nalitaca na yarishpami, ali shunguhuambacha micuna canchi” nishpa (1Co 5:6-8). Cai textopica apóstol Pabloca, Levadura illaj Tandata micuna fiestapi ima pasajtami yarichirca. Israelitacunaca, cai fiesta punllacunapica levadurataca na huasicunapi charinachu carca. Imashinami asha levadura tanda masata ninanda punguichinlla, shinallatami juchata ruraj runa congregacionbi cashpa catijpica, congregacionda huaglichinman carca. Ashtahuanbachaca, congregacionmanda huauquipanicunapashmi Jehová Diospa ñaupajpica nali ricurinman carca. Chaimandami juchata ruraj runaca congregacionmanda llujchi tucuna o expulsai tucuna carca.
it-2-S 972
Satanás
“Chai runapaj aichataca, Satanás tucuchijuchun cuichi” nishpaca ¿imatata ningapaj munan?
Corinto congregacionbi shuj runa, paipa propio taitapa huarmihuan juchata rurashpa causajushcata yachaj chayashpaca, apóstol Pabloca nircami: “Chai runapaj aichataca, Satanás tucuchijuchun cuichi” nishpa (1Co 5:5). Caita nishpaca, juchata ruraj runata congregacionmanda llujchichun o expulsachunmi mandajurca. Pipash cai runahuanga ñana tandanajunachu, parlaitallapash ñana parlanajunachu carca (1Co 5:13). Cai runapa aichata, Satanasman cuna nishpaca congregacionmanda llujchishpa cachanata o expulsanatami nijurca. Juchata ruraj runaca “tanda masapica” “ashalla levadurashnami” carca. Cai juchata ruraj runata congregacionmanda expulsanaca, congregacionbi caj huauquipanicuna ama chai nalicunata paicunapash ruranajuchunmi caita ruranaca minishtirishca carca (1Co 5:6, 7). Shinallatami apóstol Pabloca, Himeneo shuti runata Alejandro shuti runatapash, congregacionmanda expulsashpa Satanasman curca. Cai runacunaca Taita Diospimi ñana crishpa catingapaj, ali concienciahuan catingapapash ñana munashcarca (1Ti 1:20).
lvs 241, notacuna
EXPULSANA
Jatun juchata rurashca jahua na arripintirishpa, Jehovata ñana cazungapaj munajcunaca congregacionmandami expulsai tucun. Pitapash expulsajpica, ñana paihuanga tandanajunachu capanchi, parlaitallapash ñana paihuanga parlanachu capanchi (1Corintios 5:11; 2Juan 9-11). Expulsana arregloca Jehová Diospa shuti limpio cachun, congregacionbash limpio cachunmi ayudan (1 Corintios 5:6). Expulsajpimi, juchata rurajpash arripintirishpa, Jehovaman tigrana cashcata cuenta japita ushan (Lucas 15:17).
▸Capítulo 3, párrafo 19
Bibliapa Valishca Yuyaicunata Mascashunchi
w09-S 15/5 24 párr. 16
Angelcunaca: ‘Quishpirinata japishpa ringapaj shuyajcunata servinajuchunmi cachamushcacuna’ can
16 Bibliapica, Jesusta ali catijcuna llaquicunahuan cashpa imata ruranajujtaca, angelcunaca “ali alimi ricurianajun” nin (1 Cor. 4:9, NM ). Angelcunaca ñucanchicuna imashina portarijtaca ricunajunmi. Jehovata tucui shunguhuan ali sirvingapaj munashpa alita rurajpica, ninandami cushijun. Juchata rurashpa causashcacuna, arrepintirishpa Jehovaman tigrajpicarin ninandapachami cushijun (Luc. 15:10). Jesusta ali catij panigucuna, ali ruraicunata ruranajujtapashmi angelcunaca ricunajun. Bibliapica: “Huarmica, mandajpi causajushcata ricuchingapaj, angelcunamandapash umata quilparina” can ninmi (1 Cor. 11:3, 10). Jesusta ali catij panigucuna, shujcunapash Jehová Diospa organizacionbi churashca huauquicunata respetajta ricushpaca, alicachishpami angelcunaca ricunajun. Ñucanchicuna Jehová Diosta tucui shunguhuan cazujujta ricushpaca, angelcunaca paicunapash shinallata rurashpa catingapami munanga.
it-2-S 216
Leycuna
Angelcunaman cushca leycuna. Angelcunaca gentecunatapash yali ushaita charishpapash Taita Diospa mandashcacunata, leycunatapashmi cazun (Heb 1:7, 14; Sl 104:4). Jehová Diosca, Satanastaca huaquin cosascunata nishpami, ama imacunatapash rurashpa catichun jarcarca (Job 1:12; 2:6). Angelcunata Mandaj Miguel shuti angelca Jehová Dios mandaj juez cashcata respetaimandami Diablohuan fiñanajushpaca: “Jatun Dios candaca, jarcashpa rimachun” nircami (Jud 9; Zac 3:2, NM caitapash liipangui). Jehová Diosca, tucui angelcunata mandachunmi Jesusta churashca (Heb 1:6; 1Pe 3:22; Mt 13:41; 25:31; Flp 2:9-11). Jesusca shuj angelta cachashpami, apóstol Juanda ayudarca (Apo 1:1). Ungido huauquipanicunaman escribishpaca apóstol Pabloca 1 Corintios 6:3pica nircami: ‘Angelcuna imata rurashcatapashmi, ricushpa ñucanchi mandana canchi’ nishpa. Chaimandami ungidocunaca, nali espiritucunata o demoniocunata tucuchingapaj ayudanga nipanchi.