Jesuspa Chaquita Catishpa Causashunchi Yachachishunchi tandanajuipi yachajungapaj hojapa referenciacuna
1-7 DE JULIO
BIBLIAPA VALISHCA YUYAICUNA | COLOSENSES 1-4
“Punda mauca causaita saquishpa, mushuj causaita mushuj churajunata churajunshna churajushunchi”
w11-S 15/3 9, 10 párrs. 12, 13
Cai mundopa yuyaicunata saquishpa Taita Diospa yuyaita catipashunchi
12 ¿Taita Diospa yuyaita o cai mundopa yuyaicunatachu catijuni? (Colosenses 3:8-10, 13 liingui). Chaita yachangapaca imapash nali rijujpi o imapipash pandarijpi ¿ñapashchu culirarinchilla? Shina culirarijujpica ¿cai mundopa yuyaicunata catijushcata o ñucanchi munaicunata catijushcatachu ricuchinajunchi? (Gál. 5:19-21). Caipi pensaripashunchi, congregacionmanda shuj huauqui o shuj pani imatapash nishpa ñucanchita nali sintichishcanman, o ñucanchita imapipash juchachijpica ¿imatashi ruranchiman? Shinallata caipipash pensaripashunchi, huasipi cashpa ñucanchi cusahuan o huarmihuan ¿ñapashchu culiranchilla? Shina cashpaca cai mundopa yuyaicunata catijushcata ricuchinajunchiman. Cunanga cashna tapuripashunchi: “Cai sujta quillacunapica ¿Taita Diospa yuyaicunatachu ashtahuan pactachijuni, o ñucapa parlocunahuan, nali portarijushpa cutinllu nali costumbrecunata chari callarishcani?” nishpa.
13 Bibliapica ninmi: “Cangunapa punda mauca causaipi ruraicunataca, mauca churajunata llujchinshnami llujchina capanguichi. Shina rurashpami mushuj causaitaca, mushuj churajunata churajunshna churajuna capanguichi” nishpa. Jehová Diosca, paipa jucha illaj espirituhuanmi caita pactachingapaj ayudanga. Caita rurashpami shujcunata ali tratashun, juyashun, shujcuna imatapash nishpa nali sintichijpipashmi paicunataca perdonai ushashun. Shinallata shujcuna ñucanchita nali tratashcashna cajpipash ‘shungupi jatun llaquillahuan canata’, ‘fiñarishcalla canata, caparishpa rimajunatapash’ ladomanmi saquina capanchi. Shinami “caishuj chaishuj llaquirishpa” causangapaj esforzarinajushcata ricuchipashun (Efe. 4:31, 32).
¿Ñachu ñucanchica cambiashcanchi?
18 Taita Diospa Shimi ñucanchita mushujyachichun munashpaca na Bibliata cutin cutin liishpalla, yachajushpalla quedanachu canchi. ¿Nachu villachingapaj llujshishpaca Bibliata huaquinbilla liishpapash Bibliamanda ashtacata yachaj gentecunahuanbash tuparipashcangui? Huaquingunaca Bibliapa textocunataca umapimi charin. Shinapash paicunapa causaipica Bibliapi imata yachajushcataca na pactachinajunllu. ¿Imamandata na pactachi ushashca? Taita Diospa Shimipi yachajushcacuna paicunapa shungucaman na yaicuchun saquimandami na pactachi ushashca. Chaimandami ñucanchicuna Bibliata liishpaca imatata caipica yachajuni nishpa pensarina capanchi. Cada uno tapuripashunchi: “Bibliapa yachachishcacuna shuj religionba yachachishcacunamanda ¿ashtahuan ali cashcata crinichu? ¿Bibliapa yachachishcacuna ñucapa causaipi ayudashcata crinichu? ¿Bibliapi consejocunataca shujcunaman yachachishpallachu purini o ñucapa causaipi pactachijunichu? Bibliata liijushpaca ¿Jehová Diosmi yachachijun nishpachu liini? nishpa. Cashna aliguta pensarishpaca Jehová Diostaca ashtahuanmi juyashun. Jehovata juyashpami minishtirishca cambiocunata rurashun (Prov. 4:23; Luc. 6:45).
19 Bibliata cada punlla liishpa, imata liishcapi aliguta pensarishpaca apóstol Pablopa consejota catishpami, ‘ima nalita rurashpa punda causashcataca saquishpa mushujta causai callarishun’ (Col. 3: 9, 10). Bibliapi yachachishcacunata aliguta intindishpa imata yachajushcata pactachishpallami mushuj ropata churajuj cuenda cambiashun. Shina cambiashpallami Diablopa trampacunapica na urmashun.
Bibliapa Valishca Yuyaicunata Mascashunchi
it-2-S 819 párrs. 4-6
Diospa Reino
‘Paipa juyashca Churi mandajuj llacta’. Jesusca causachi tucushpa cieloman chunga punllacuna rishca jipallami, huata 33pi Pentecostés fiesta punllapica Diospa espiritu santota paipa catijcunaman curca. Chaimi Jesuspa catijcunaca ‘Taita Dios, Jesusta jatumbi churashpa paipaj ali ladoman tiachishcata’ cuenta japirca (Hch 1:8, 9; 2:1-4, 29-33). Shinami Mushuj Pacto pactari callarirca. Chaimi Jesuspa catijcunaca, “Dios agllashca miraicuna” o mushuj Israel espiritual tucurca (Heb 12:22-24; 1Pe 2:9, 10; Gál 6:16).
Jehová Diospa ali ladoman tiarishpami, Jesusca congregaciondaca umashna ñaupaman apai callarirca (Ef 5:23; Heb 1:3; Flp 2:9-11). Bibliapica huata 33pi Pentecostés fiesta punllapi Jesús paipa catijcunata ñaupaman pushai callarishcatami ricuchin. Punda siglopi colosenses huauquipanicunaman apóstol Pablo escribishpaca Jesús paipa catijcunata ña mandajushcatami nirca. Chaimi: “Yanapi huatashpa charijujpaj maquimandaca, Diosmi ñucanchita cacharichishpa, paipaj juyashca Churi mandajuj llactaman yalichishca” nirca (Col 1:13; Hch 17:6, 7tapash ricupangui).
Huata 33pi Pentecostés fiestamanda Jesús mandai callarishcaca shuj reino espiritualmi can. Cai reino espiritualpimi, Jesusca ungido huauquipanicunata mandajun. Ungido huauquipanicunaca Taita Diospa agllashcacuna cashpami Taita Diospa huahuacuna can (Jn 3:3, 5, 6). Ungidocuna cieloman rijpimi cai Alpapica Jesusca ñana paicunata ñaupaman pushan. Chaipimi paicunaca Jesusta ayudangapaj reycuna shina mandai callarin (Apo 5:9, 10).
w08-S 15/8 28 párr. 9
Gálatas, Efesios, Filipenses, Colosenses librocunapa valishca yuyaicuna
2:8. Apóstol Pablo ‘cai pachapajtalla yachachishcacuna’ nishpaca ¿imacunamandata parlajurca? Cashna nishpaca Satanás mandajushca cai mundopa nali cosascunamanda, yanga parlocunamanda, cai mundopi aligutapacha yachajuna nishcacunamanda, charijyana munaicunamanda, panda religiongunapa yuyaicunamanda, shuj shuj nali yuyaicunamandapashmi parlajurca (1 Juan 2:16).
8-14 DE JULIO
BIBLIAPA VALISHCA YUYAICUNA | 1 TESALONICENSES 1-5
“Ashtahuan aliguta catingapami, cangunaca caishuj chaishuj aliguta yarichirina canguichi”
w11-S 15/6 26 párr. 12
‘Canguna purapi yachachijcunataca alicachipanguichi’
12 Shinaca, congregacionda ñaupaman pushangapaca yachachitallaca na yachachinachu can. 1 Timoteo 3:4pica apóstol Pabloca superintendente huauquicunamanda parlangapaca cai shimitallatami utilizarca. Paica nircami: “Paipaj huasipi causajcunatapash, aliguta mandaj cachun, paipaj huahuacunatapash, imapipash aliguta causachun, yachachishpa cazuchij cachun” nishpa. Cai textopica huahuacunata aliguta mandashpa viñachinatallaca na nijunllu, chaipa randica ‘cazuchishpa’ familia enterota ali ñaupaman pushanatami nijun. Shinallatami anciano huauquicunaca congregacionda ñaupaman pushana, congregacionbi huauquipanicunata Jehová Diosta cazushpa causachun yachachina can (1 Tim. 3:5).
w11-S 15/6 28 párr. 19
‘Canguna purapi yachachijcunataca alicachipanguichi’
19 Pipash imagutapash carajpica ¿imashinata agradicishcataca ricuchi ushapanchi? Chai carashcata utilizashpami agradicishcataca ricuchi ushapanchi. Shinallatami Jehová Diosca Jesús paipa causaita cushcamandaca “[huaquin jaricunata caramurca, NM ]”. Chai carashca jaricunaca, anciano huauquicunami capan. Paicunata valichishcataca ¿imashinata ricuchipanchi? Paicuna shuj discursota cunajujpica ali ali uyashpa, paicuna imata nishcata pactachishpa. Ashtahuanbachaca tandanajuicunapi shungumanda comentashpa, Diospa Reinomanda ali villaigucunata cushijushpa villachingapaj llujshishpapashmi paicunata valichishcataca ricuchipanchi. Shinallata paicuna cushca consejocuna imashina ñucanchita ayudashcata parlashpapashmi agradicishcataca ricuchi ushapanchi. Shinallata, ancianocunapa familiacunatapashmi anciano huauquicuna paicunapa familiacunahuan yalina tiempota llujchishpa congregacionbi ayudachun saquishcamanda agradici ushapanchi.
‘Imagutapash rurashpa, juyajpacha cashcata ricuchishunchi’
13 Espiritualmente nara shinlli cajcunata ayudashunchi. Bibliapica ninmi: ‘Nara ali shinlli crijcunata yachachipanguichi. Pitapash ama ñapash fiñashpa yachachipaichi’ nishpa. Cai mandashcata pactachishpami ciertopacha juyashcata ricuchinchi (1 Tes. 5:14). Huaquin huauquipanicunaca espiritualmente nara shinlli cashpapash, jipamanga shinlli feta chari ushangami. Shinapash shuj huauquipanicunaca na ñapash fiñarishpa pacienciahuan ayudachunmi minishtin. ¿Imashinata ayudaita ushanchi? Bibliapi shuj textota liishpa, villachingapaj paicunahuan llujshishpa, ima nijta aliguta uyashpami paicunataca ayudai ushapanchi. Huaquingunaca espiritualmente shinllimi can. Cutin shujcunaca espiritualmente nara shinlli canllu nishpaca na purijunachu canchi. Huaquin cosascunata ali rurashpapash, imagupipash pandarijlla cashcataca siempremi yarina capanchi. Apóstol Pablopashmi imagupipash pandarijlla cashcata yaipi charirca (2 Cor. 12:9, 10). Tucuicunallatami ñucanchi huauquipanicuna animachun, ayudachun minishtinchi.
Jesús cuendami humilde, ninanda llaquijcuna cana canchi
16 ¿Imashinata parlashun? Ninanda llaquimandami na catinayanllu nijcunatapash ali shimicunahuan parlashpa cushichishun (1 Tes. 5:14). Shinapash ninanda llaquilla sintirinajujtaca ¿imashinata ayudashun? Paicunamanda preocuparishcata ricuchishpa, paicuna imata ali rurajujta ricushpa, felicitashpami ayudaita ushanchi. Shinallata nita ushanchimi, Jehová Dios ninanda llaquishcamandami congregacionbi cana bendicionda charinchi nishpa (Juan 6:44). Ashtahuangarin ‘shungupi ninanda llaquirijcunata’ Jehová Dios juyajtami yarichina canchi (Sal. 34:18). Juyailla, ali shimicunahuan parlashpami llaquilla sintirinajujcunataca alillata sintirichun ayudashun (Prov. 16:24).
Bibliapa Valishca Yuyaicunata Mascashunchi
g-S 11/06 29 párr. 2
Shuj panihuan o shuj huauquihuan huainayana juchapi urmashpaca, ‘huauquita o panita umachishpa nalitapachami ruran’ (1 Tesalonicenses 4:3-6, NM ). Taita Diosta sirvinchi nishca jahua, na cazarashca cashpata huainayana juchapi urmajcunaca congregaciondapashmi mapayachin (Hebreos 12:15, 16). Shinallata cuerpopi, yuyaipi, shungupipash mapa mapami sintichin. Soltera pani cashca cajpicarin ña cazarashpa paipa cusapa ñaupajpica nalipachami ricuringa. Shinallata juchapi urmashcacunapa ishcandi lado familiacunatami llaquichishpa pingaichin. Chai jahuapash Taita Diospa mandashcacunata, yachachishcacunata na respetashcatami ricuchin. Chaimi Taita Diosca shungupi llaquilla sintirin (Salmo 78:40, 41, NM ). Chaimandami Jehová Diosca chai nali ruraicunata rurashca jahuapash, na arrepintirijcunataca ‘llaquichinga’ (1 Tesalonicenses 4:6, NM ). ¿Nacha chaimanda Bibliapica: “Huainayamandaca anchurichi” nishpa consejajun? (1 Corintios 6:18).
‘Cangunata quishpichina punllaca ñallami chayamunga’
14 Magog llactata mandaj Gog nishca, Jehovata sirvijcunata llaquichi callarijpica ¿imata pasanga? Bibliapica ninmi, runa aichayu tucushca Jesusmi paipa angelcunata cachamunga. Paicunami Jesuspa agllashcacunataca tucui cai pacha tucuri chuscundi ladomanda tandachinga nishpa (Mar. 13:27; Mat. 24:31). Shinaca ¿ima horata ungidocunataca tandachinga? Ungidocunata tandachinga nishpaca ¿ungidocunata espíritu santohuan chai tiempopi agllanatachu nijun? ¿Cai Alpapi ungidocunata ultimota sellanatachu nijun? Na. Ungidocunaca Jatun Manllanai Llaqui Punllacuna nara callarijpillatami ña ultimota sellai tucushca canga (Mat. 13:37, 38; Apoc. 7:1-4). Shinaca ungidocuna tandachi tucunga nishpaca, cai Alpapi ungidocuna jahua pachaman apai tucunatami nijun (1 Tes. 4:15-17; Apoc. 14:1). Ungidocunaca Magog llactata mandaj Gog llaquichi callarishca jipami jahua cieloman apai tucunga (Ezeq. 38:11). Chai punllacunapimi ungidocunaca Jesús nishca shina, ‘indishna punchapambaguta’ brillanajunga (Mat. 13:43).
15 Jesusta catinchi nij tucushca ashtaca gentecunaca yanmi, gentecunaca paicunapa aichayu cuerpohuanmi jahua cieloman apai tucushun nishpa. Shinallata yanmi, Jesusca gentecuna ricujtami cai Alpamanga tigramunga nishpa. Shinapash Bibliapica gentecuna ricujta Jesús tigramunataca na ninllu. Bibliapica Jesusca ninmi: ‘Runa Aichayu tucushca ñuca shamunata ricuchinaca jahua pachapimi ricuringa. Fuyu jahuapimi shamusha’ nishpa (Mat. 24:30). Bibliapica ninbashmi, ‘aichandi yahuarndica pipash na Taita Dios mandajuj llactamanga ringachu’ nishpa. Jahua pachaman rijcunapa cuerpoca canchis trompeta huacajuj tiempopimi ñavita ñapash vichashpa pascajpishna ñapash cambianga (1 Corintios 15:50-53, liingui). Shinaca cai Alpapi causanajuj ungidocunaca ñapash paicunapa cuerpopi cambiai tucushpami jahua pachaman tandachi tucunga.
15-21 DE JULIO
BIBLIAPA VALISHCA YUYAICUNA | 2 TESALONICENSES 1-3
“Jatun nalita ruraj runaca ricurimunmi”
it-1-S 676 párr. 1
Taita Diosta yariashpa causana
“Pacalla tiajuj chai nalita rurachijujca” Jehová Diospa ‘pacalla yarijushca munaihuanga’ shicanbachami can. Apóstol Pablo causajushca tiempopica, Jesusta ali catijcunaca ‘jatun nalita rurachij runa’ pi cashcataca nara alipacha yacharcachu. Ashtaca gentecunaca ‘jatun nalita rurachij runa’ ña ricurijpipash, pi cashcataca na yachai usharcachu. Cai ‘runaca’ Taita Diosta yariashpa causanshnalla, alita rurajshnalla ricurimandami na rijsi tucunalla carca. Shinapash imahorapash Taita Diosta yariashpaca na causashcachu. Chaipa randica Taita Diospa contrapachami cashca. Apóstol Pablo causajushca tiempopi congregaciongunapica pandacunata, nalicunata yachachijcunaca ñallami ricuringa nishpami advirtinajurca. Chaimandami apóstol Pabloca: “Pacalla tiajuj chai nalita rurachijujca, ñami nalita rurachijun” nirca. ‘Jatun nalita ruraj runataca’ Jesusmi punchapamba pai shamushpa tucuchinga. Shinapash cai nara pasajpillatami ‘jatun nalita rurachij runaca’ Satanás paita mandajujpi “Taita Diostapash, Diosta mañangapaj ima tiajcunatapash, na ricunayachishpa ninanda fiñanga” (gr. sé·ba·sma). Satanás paita mandajushcamandami cai ‘jatun nalita rurachij runaca’ paipa munaitalla siempre ruran. Chaimandami paipash, paita tucui catijcunapash para siempre tucuchi tucunga. Cai nali ‘runaca’ Taita Diosta yariashpa causani nij tucushpami ashtaca ashtaca gentecunata pandachin (2Te 2:3-12; Mt 7:15, 21-23tapash ricupangui).
it-2-S 368 párr. 7
Llulla
Jehová Diosca pandacunata alicachij gentecuna, Jesusmanda ali villaigucunata ama crichunga ‘llullacunatara crichun’ saquinllami (2Te 2:9-12). Caitaca punda tiempocunapi causashca israelitacunata mandaj rey Acabpa ejemplopimi ricui ushapanchi. Rey Acabtaca llullacunata nij profetacunami jatun macanajuipica Ramot-galaad llactapi causaj gentecunataca mishai ushanguillami nirca. Cutin Jehová Diospa profeta Micaya runaguca na mishai ushanguichu, llaqui apaitarami llaqui apangui nishcarcami. Jehová Diosca shuj muscuipishna ricurishpami profeta Micaya runagumanga Diospa shuj angel Acabpa yanga profetacunata pandachishcata intindichirca. Diospa angelca rey Acabpa profetacunatami pandachirca. Chaimi rey Acabca pai imata uyangapaj munashcatalla uyarca, cutin Acabpa profetacunapash pai imata nichun munashcatalla rey Acabmanga nirca. Rey Acabman profeta Micaya advirtijpipash rey Acabllatami pandachi tucungapaj munaimandaca huañuitara tarirca (1Re 22:1-38; 2Cr 18).
Bibliapa Valishca Yuyaicunata Mascashunchi
it-1-S 972 párr. 4
Nina
Apóstol Pedroca “cunambi tiajuj cai pachapash, jahua pachapash [...] ninahuan tucuchingapajmi” can nishpami escribirca. Cai versopa punda versocunapash, cati versocunapash, shinallata shuj textocunapash rupachingapaj ninamandapacha parlajushcataca na ricuchijunllu. Chaipa randica para siempre tucuchi tucunamandami parlajun. Imashinami Noepa punllacunapi ninan manllanai tamiaca cai Alpatapash, jahua pacha cielotapash na tucuchirca, shinallatami ‘Jesús jahua pachamanda paipaj ninan ushaita charij angelcunandi punchapamba nina chaupipi pai tigramushpaca’ nalita ruraj gentecunatalla, Satanaspa cai nali mundopa nali ruraicunatalla para siempremi tucuchitapacha tucuchinga (2Pe 3:5-7; 2Pe 3:10-13, NM; 2Te 1:6-10; Isa 66:15, 16, 22, 24tapash ricupangui).
8 Jehová Diosta mañashca jipaca, imata mañashcata pactachingapaj esforzarinami canchi. Shuj ejemplota ricushun, cada punlla imata minishtishcata mañashpaca, Jehová tucuita yanga carachunga na shuyanachu canchi. Ñucanchicunapash imagupi cashpapash shinllita trabajanami canchi (Mateo 6:11; 2 Tesalonicenses 3:10). Shinallata, imapash nali ruraicunata saquingapaj Jehovata mañajushpaca ñucanchipash nali ruraicunamanda caruyanami canchi (Colosenses 3:5). Cunanga, Diosta imashina mañanamanda huaquin tapuicunata yachajushun.
22-28 DE JULIO
BIBLIAPA VALISHCA YUYAICUNA | 1 TIMOTEO 1-3
“Congregacionbi responsabilidadcunata charingapaj esforzaripaichi”
¿Espiritualmente ñaupaman catingapaj esforzarinajunchichu?
3 (1 Timoteo 3:1, liingui). Apóstol Pabloca congregacionbi yachachishpa ashtahuan responsabilidadcunata charingapaj munaj huauquicunataca ashtacatami felicitarca. Apóstol Pablopa shimicunata liishpaca, imapash carupi cajpi japingapaj munashpa ninanda chutarishpa esforzarijtami pensarinchi. Ali intindingapaca shuj ejemplota churapashun. Shuj huauquica siervo ministerial cangapaj munashcanman. Shinapash, paipa causaipi ali cualidadcunata charingapaj esforzarina cashcata cuenta japishcanman. Ña chai cualidadcunata charishpa siervo ministerial tucushpaca anciano cangapami shinllita esforzarishpa catinga.
km-S 11/78 4 párr. 7
‘Imatapash aliguta rurashpa ninanda alicachi tucunajujcuna’
7 Caitaca, apóstol Pablo nishca shimicunapimi ricupanchi. Paica nircami: “Imatapash aliguta rurashpami, ninanda alicachi tucunga” nishpa. Cai yuyaica shuj religiongunapishna shujcunata yali cangapaj munajushcataca na ricuchijunllu. Chaipa randica, siervo ministerialcunaca ‘imatapash aliguta ruraimandami’ Jehová Diospa, Jesuspa bendicionda chasquin. Shinallata congregacionbipashmi huauquipanicunaca paicunata alicachishpa tucuipi ayudan. Chaimi ‘paicunaca Jesucristota crijushcatapash na manllashpa cushijushpa villanajushcatapash’ ricuchin. Paicunaman imata mingashcata ali pactachishcamandami, tucuicunallata ninanda alicachinchi. Siervo ministerial huauquicunaca shinlli feta charimandami imatapash na manllashpa paicunapa crishcacunamandapash parlanlla.
Bibliapa Valishca Yuyaicunata Mascashunchi
it-1-S 1007 párr. 3
Ñaupa taitacunapaj na tucurinalla shuticuna
Apóstol Pablo Timoteoman escribijushca tiempopica, chai temacunamanda ashtahuan yachangapaj munashpa, imapash informaciongunata mascajunaca ñana minishtirijurcachu. Chai tiempopaca congregación ucupica Taita Diospa ñaupajpica judiocuna cashpa, na judiocuna cashpapash igualmi carca. Chaimandami pipash maijan familiamanda shamujta yachanaca ñana minishtirirca (Gál 3:28). Shinallata Cristo Davidpa mirai o familiamanda shamuna cashcata ñami escribishca carca. Chai jahuapash Jerusalén llactaca ñallami llaquichi tucuna carca. Chaipica tucui judiocunapa registrocuna o ñaupa taitacunapaj shuticunata escribishca documentocunapashmi tucuchi tucuna carca. Chaicunatapashmi Taita Diosca tucuchichun saquirca. Chaimandami apóstol Pabloca Timoteota, congregacionbi huauquipanicunatapash “yanga parlocunatapash, ñaupa taitacunapaj na tucurinalla shuticunamanda parlocunatapash uyangapajllapash na munanachu canguichi” nirca. Caicunamanda ashtahuan yachangapaj munanaca shinlli feta charichun, Jesusta ali catijcuna tucuchunbash na ayudajurcachu. Taita Dios agllashca Mesías maijan familiamanda shamuna cashcataca ñami Bibliapica escribishca carca. Caita ricushpami Mesías Cristo cashcataca seguropacha capanchi. Caita yachanami tucui Jesusta ali catijcunapaca ashtahuan importante can. Bibliapi shuj miraicunamandapash parlashcacunaca, Bibliapa nishcacuna cabaltapacha nijushcata crichunmi ayudan.
cl-S 11 párr. 15
“Ricuichi, paimi ñucanchi Taita Dios”
15 Jehová Diostaca “causaita causaicaman Jatun Mandaj” nishpapashmi rijsin (1 Timoteo 1:17; Apocalipsis 15:3, NM ). Cai shimicunaca ¿imatata ningapaj munan? Ñucanchi na crij ushajpipash Jehová Diosca siempremi tiashca, shinallata siempremi tiashpa catinga. Imahorapash na tucuringachu. Chaimandami Salmo 90:2pica nin: “Na tucurina causaita causaicamambash, canmi Taita Dios cangui” nishpa. Taita Diostaca pipash na rurarcachu, paica siempremi tiashca. Razonmi Bibliapica ‘unai unai huatacunata charij Rucugu’ nishpapash escribishca. Jehová Diosca imatapash nara rurashpallatami unai unai tiempota ña tiarca (Daniel 7:9, 13, 22). Shinaca ¿pipash Jehová Diosca mandana derechotaca na charinllu ni ushanllu?
29 DE JULIO - 4 DE AGOSTO
BIBLIAPA VALISHCA YUYAICUNA | 1 TIMOTEO 4-6
“¿Taita Diosta sirvinata o charijyanatachu munanchi?”
w03-S 1/6 9 párrs. 1, 2
Minishtirishcaguhuanlla cushilla causanata yachajupashun
Apóstol Pabloca minishtirishcagucunahuanlla causanata yachajushcamandami cushilla sintirin carca. Shinapash apóstol Pabloshna cushilla causai ushangapaca minishtirishca cosascunahuanlla cushilla causanatami yachajuna capanchi. Caita ali intindichingapami apóstol Pabloca paipa cumba Timoteomanga cashna nirca: “Ashtahuangarin imaguta charishpapash, Diosta yariashpa causashpaca, ninanda charijyashcashnami causanchi. Cai pachapica, imagutapash na charishpami huacharinchi. Shinallata cai pachamandaca, imatapash na apai ushashunllu. Shina cashcamandaca micunaguta, churajunaguta charishpallata, cushijushpa causashunchi” nishpa (1 Timoteo 6:6-8).
Apóstol Pabloca minishtirishca cosascunahuanlla causanataca Taita Diosta yariashpa causanahuanga igual rina cashcatami nirca. Ñucanchi causaipi charijyanapilla yuyajunapa randica, Taita Diostara yariashpa paipa munaitara pundapi churashpaca cushillapacha causai usharishcatapashmi intindichirca. “Micunaguta, churajunaguta charishpallata” cushilla causanaca, Jehová Diosta yariashpa causachun, Jehovata sirvishpa catichunmi ayudan. Shinaca apóstol Pablotaca minishtirishca cosascunahuanlla cushilla causangapaca, paipa causaipi ima llaquicuna ricurijpipash Jehová Diospi confianami ayudarca.
g-S 6/07 6 párr. 3
Charijyangapalla empeñarimandaca ¿ima llaquicunatata chari ushapanchi?
Ashtahuan charijyana munaimandaca na taucacunaca huañushcachu. Shinapash ashtahuan charijyana munaita charinaca cushilla causachunga na ayudanllu. Shinallata yapata trabajopilla yuyana, culquipilla yuyanaca ñucanchi saludtapashmi llaquichi ushan. Chaimandami huaquinbica: na puñui usharin, uma yapata nanan, úlceras ungüipash japi ushan, ali cashcapi imatapash ninanda manllanayan. Cai cosascunaca unaillata, ali causachunga na ayudanllu. Huaquinbica cai cosascunahuan ña padicijushpara cambiangapaj munanaca na imapipash ayudanllu. Shina pasajuimandami cusahuarmicunaca randimanda ñana confiarin, huahuacunapash taitamamacuna trabajopilla yalishcamandaca llaqui llaqui sintirin, shinallata saludpash na ali can. Cutin ali causangapaj munashpa cambiocunata rurajpipash na tucui ali llujshingachu. Chaipaca ashtacatami tucuicunallata esforzarina can. Shina gentecunaca ‘ninan llaquicunata apashpami’ causan (1 Timoteo 6:10).
g-S 11/08 6 párrs. 4-6
Cushilla causangapaj imata rurana cashcata yachangapaj 6 consejocuna
Imashinami callari temapi ña yachajuparcanchi, culquipilla yuyashpa chaitalla charingapaj munajcunaca yanga yuyaicunata catijunshnami can. Paillata llaquilla sintirishca jahuapash ashtaca problemacunatami charinga. Por ejemplo, huaquingunaca ashtahuan charijyangapaj munaimandami familiacunamandapash amigocunamandapash caruyan. Cutin shujcunaca yapata trabajaimanda, yapata preocuparimandami alipash na samai ushan. Chaimandami cutin shuj llaquicunatapash charin. Chaicunamandami Eclesiastés 5:12pica ninmi: “Ashtacata charij runataca, chai charishcacunallatami na puñuchin” nishpa.
Culquica ashtacatami umachi ushan. Chaimandami culquimanda parlashpaca Jesusca nirca: Culquita charijcunaca “ña charishpapash, ashtahuan charingapaj munashpami, pandachi tucunajun” nishpa (Marcos 4:19). Caita nishpaca ashtaca culquita charishpami cushilla causashun yashpapash, yangallata cashcatami nijurca. Culquita charinaca ashtahuan ashtahuan charijyana munaita charichunllami animan. Chaimandami Eclesiastés 5:10pica nin: “Culquita ninanda juyaj runaca, culquita mashnata charishpapash na cushijunllu” nishpa.
Shinaca culquita juyashpa causanaca nalitallami rurachin. Culquita juyaimandaca ninandami llaquirinchi, nali cosascunatapash ruranchi (Proverbios 28:20). Cutin na mitsashpa imagutapash carana, perdonana, cuerpopi yuyaipi limpio cana, juyana, Taita Diosmanda yachajushpa paiman ashtahuan quimirinaca ciertopacha cushilla causachunmi ayudan.
Bibliapa Valishca Yuyaicunata Mascashunchi
Jehová alicachishca concienciata charipashunchi
17 Apóstol Pedroca nircami: “Ali yuyaihuan [o ali concienciahuanmi] causana canguichi” nishpa (1 Pedro 3:16). Shinapash huaquingunaca, Jehovapa yachachishcacunata ladoman saquishpami paicunapa concienciapipash ñana imatapash sintin. Apóstol Pabloca nircami ‘nalita ruranatapash na pinganayachinllu. Chashna cashpami Diospa ñaupajpica, imatapash mapatalla cushijushpa ruranajun’ nishpa (Efesios 4:19). Imashinami maquipi callo tiarijpica gentecunaca ñana imatapash sintin, shinallatami nalita ruranajushpapash paicunapa concienciapica ñana imatapash sintin.
it-2-S 198 párrs. 5, 6
Tucuicunapa ñaupajpi liina
Congregación ucupi. Apostolcunapa tiempopica ashacunallami Bibliapa tauca librocunamanda rollocunataca charirca. Chaimandami tucuicunapa ñaupajpi liinaca minishtirishcapacha carca. Apóstol Pabloca pai cachashca cartacunata congregaciongunapi liichunmi mandarca. Shinallata shuj congregacionman cachashca cartacunata shuj congregacionguna lii ushachunbash randimanda mañachirichunmi mandarca (Col 4:16; 1Te 5:27). Apóstol Pabloca “Diospaj Shimitaca leyishpa tucuicunaman villajunguilla. Aliguta catichun yachachishpa catijunguilla” nishpami superintendente Timoteo huauquitaca consejarca (1Ti 4:13, MTQI ).
Tucuicunapa ñaupajpi Taita Diospa Shimita liijushpaca intindirinallagutami liina can (Hab 2:2). Tucuicunapa ñaupajpi liinaca huauquipanicuna ashtahuan yachajushpa catichunmi ayudan. Chaimandami liigrijushpaca imata liigrijushcata ali cuenta japishpa, aliguta intindichishpami liina capanchi. Shinallata pi escribishcata, imata ningapaj munajushcatapashmi yaipi charina capanchi. Shinami liijushpaca panda yuyaicunataca na intindichishun. Chaimi Apocalipsis 1:3pi nishca shinaca, tucuicuna ‘cashna villashca shimicunata liishpa, ima tucunatapash caipi escribishca villajujta uyashpaca’, ninanda cushijunajunga.