1922 huatapica ¿imata pasarca?

“CUSHILLAMI SINTIRIRCANCHI”

Predicangapaj publicadorcuna ashtahuan mirajpimi, publicaciongunaca faltai callarirca. Brooklyn llactapa Betelpimi revistacunataca imprimin carca. Pero huauquicunaca shuj empresacunapimi librocunataca imprimin carca. Pero huaquin quillacunatami predicangapaca librocunataca na charircanchi. Chaimandami huauqui Rutherfordca huauqui Robert Martindaca, librocunata impriminata ¿pensashcaguichu? nishpa tapurca. Huauqui Robert Martinga imprimina fabricapa encargadomi carca.

Huauqui Martinga nircami: “Cushilla sintirinajushpapash ashataca manllanajurcanchimi. Porque librocunata imprimingapaca shuj fabricatami rurana carcanchi”. Huauquicunaca Brooklyn llactapi shuj edificiotami alquilarca. Shinallata librocunata rurangapaca tucui materialcunatami mascana tucurca.

Ñucanchicuna librocunata imprimingapaj tucuita seguranajujpica na tucuicunachu cushilla carca. Ñucanchi librocunata imprimin cashca shuj empresamanda shuj gerente ñucanchita visitashpami, cashna nirca: “Caipica publicaciongunata imprimingapaca tucuitami charinguichi, pero imashina utilizanata na yachashpami seis quillacunahuanga cai maquinacunataca huaglichinguichi” nircami.

Huauqui Martinga nircami: “Cai gerentepa nishcacunaca ciertoshnallami carca. Pero ñucanchicuna Jesuspa ayudata charishcataca na yacharcachu”. Huauqui Martin nishcashnami asha tiempo jipaca 2 mil librocunata punllapi imprimi callarircanchi.

ASHTACA GENTECUNAMAN PREDICANGAPACA RADIOTAMI UTILIZAN

Jehovata sirvijcunaca predicangapaj librocunata impriminajushpapash, ali villaigucunata ashtahuan predicai ushangapaca radiotami utilizai callarin. Huauqui Rutherfordmi por primera vez, domingo 26 de febrero de 1922 huatapica, shuj discursota radiopi yalichirca. Chai discursoca: “Millones que ahora viven no morirán jamás” nishca discursomi carca. Radiopa emisoraca Los Ángeles llactamanda KOG nishcami carca.

Huauqui Rutherford cushca discursotaca 25 mil gentecunami uyarca. Huaquingunaca chai discursomanda agradicishpami cartacunata escribishpa cacharca. Chai cartacunamanda shujca California llactamanda Willard Ashford shuti jaripami carca. Paica huauqui Rutherfordtaca “shuj alipacha discursotami curcangui” nishpami felicitarca. Shinallata: “Ñuca huasipi quimsapura irqui caimandami huasi ladollapi cai discursota cujpipash na uyai ushanchiman carca. Pero cai discursota radiopi yalichishcamandallami uyai usharcanchi” nircami.

Cati semanacunapica ashtahuan discursocunatami radiopica yalichirca. Y huata tucuripi llujshishca The Watch Tower revistapica, casi 300 mil gentecunami radiopi yalichishca discursocunataca uyashca nishpami villarca.

Discursocunata radiopi yalichijpi gentecuna uyanata gushtajta cuenta japishpami, Estudiantes de la Bibliacunaca shuj radio emisorata construinata decidirca. Chai emisorataca Staten Island nishca pushtupimi construirca. Paicuna construishca emisoraca WBBR nishcami carca. Cai emisoratami Estudiantes de la Bibliacunaca shujcunaman Taita Diospa Gobiernomanda ashtahuan predicangapaj utilizagrinajurca.

“ADV”

15 de junio de 1922pi llujshishca The Watch Tower revistapica, 5 al 13 de septiembre de 1922pi Cedar Point llactapi shuj asamblea tianatami villarca. Y chai asambleaman chayanajushpaca Estudiantes de la Bibliacunaca ninandami cushijunajurca.

Huauqui Rutherford discursota cugrijushpaca huauquipanicunamanga cashnami nirca: “Cai asamblea ali llujshichunga Jesús ayudanata y bendicianatapash seguromi cani. Cai asamblea tiashcamandami ashtaca gentecuna Jehová Diosta rijsinga”. Shinallata chai asambleapi discursota cuj chaishuj huauquicunapash ashtahuan predicashpa catichunmi huauquipanicunataca animarca.

Viernes 8 de septiembre quillapica, huauqui Rutherfordpa discursota uyangapami 8 mil gentecuna cai asambleamanga cushilla yaicunajurca. Cai gentecunaca invitación hojagupi “ADV” letracuna imata ningapaj munashcata explicachunmi shuyanajurca. Cai asambleata uyangapaj tiarinajushpaca, plataforma jahuapi shuj tela cuenda doblashca tianajujtami gentecunaca ricunajurca. Oklahoma llactamanda huauqui Arthur Claus cai asambleaman rishpaca, cai asambleapi discursota ali uyangapami maipi tiarinata mascajurca. Chai tiempopica microfonocunata, o parlantecunataca na utilizanllu carca.

Discursota ali uyangapami, asambleapa presidente huauquiguca discursota cujuj horasca pipash ñana yaicui ushangachu nishpa villarca. Las nueve y media de la mañanatami cai asambleata callaringapaca huauqui Rutherfordca, Mateo 4:17​pi Jesús nishca shimicunata nirca. Cai textopica: “Jahua cielopi Taita Diospa Gobiernoca ñami chayamushca” nijunmi. Imamanda gentecuna Taita Diospa Gobiernomanda uyanata parlashpami huauqui Rutherfordca cashna nirca: “Jesusllatami pai mandajuj horasca, ashtaca gentecuna Jehová Diosta rijsishpa tucui shunguhuan sirvi callaringa” nircami.

Asambleapi cashca huauqui Clausca: “Tucuicunallatami discursocunataca ali ali uyanajurcanchi” nircami. Shinapash asha nali sintirishpami, asamblea ucumandaca llujshina tucurca. Aunque llujshishca jipa huauqui Rutherford discursota cujuj horas cutinga ñana yaicuchun saquinata yachashpapashmi llujshina tucurca.

Huauqui Claus ña alillata sintirishpami, asamblea ucuman ña cutin tigrajurca. Shinapimi huauquiguca ninanda maquita huactanajujta uyarca. Chaimi imashi canga yashpa huauquiguca chai huasi techoman vitsanata pensajurca. Huauquiguca chai tiempopica, 23 huatacunatami charirca. Chaimandami jahuaman vitsarcalla. Edificiopa huaquin partecuna pascaria cajpimi huauquiguca discursota ali uyai ushashcata cuenta japirca.

Huauqui Arthur edificiopa teja jahuapi shayajushpaca paipa chaishuj amigocunatapashmi ricurca. Shujca Frank Johnsonmi carca. Paica: “Nachu shuj navajata charingui” nishpami huauquigutaca tapurca.

Huauqui Arthurca: “Ari, charinimi” nircami.

Jehová Diostami ayudahuai nishpa mañanajurcanchi. Y justomi quiquin shamungui nihuarcami. Shinallata chai jatun tela cuendata ricui. Chaica clavashca shuj letreromi can. Juez Rutherforda: “villaichi, villaichi...” nijpimi, cai cabiacunataca fitina cangui nihuarcami.

Y huauqui Arthurca, huauqui Rutherford “villaichi” ningacamanmi navajata chariria shuyajurca. Huauqui Rutherfordca paipa discursota ña tucuchijushpami, cushijushpa huauquipanicunamanga cashna nirca: “Jesusta tucui shunguhuan sirvishpa catichi. Panda religión tucuchi tucungacaman na shaijushpa Taita Diosmanda villachishpa catichi. Cai mundopi tucui gentecuna yachachunmi, Taita Dios Jehová cashcata y Jesús reycunapa Rey y mandajcunapa Mandaj can nishpa villana responsabilidadtami charipanguichi. Shinaca Jesús Rey cashcata, y paipa gobiernomanda villaichi, villaichi, villaichi” nishpa tucuchirca.

Huauqui Arthurpash, caishuj huauquicunapashmi cabiataca fitirca. Chaimi plataforma jahuapi tiajuj letreroca asha asha pascarirca. Chai letreropica cashnami nijurca: “Jesús Rey cashcata y paipa Gobiernomanda villaichi” nijurcami. Shinaca invitacionbi churashca “ADV” letracunaca, inglés shimipica advertise nisha ninmi. Cai shimitami “villaichi” nishpa traducishca.

PREDICANACA IMPORTANTEPACHAMI

Cedar Point llactapi tiashca asambleaca, huauquipanicunata Taita Diospa Gobiernomanda predicana importantepacha cashcata cuenta japichunmi ayudarca. Shinallata ashtahuan ayudangapaj munaj huauquipanicunapash cushijushpami predicarca. Oklahoma llactamanda shuj precursorca cashnami nirca: “Carbonda llujchishpa trabajan pushtupimi predicarcanchi. Cai pushtupi gentegucunaca pobrellami can” nircami. Cai gentegucunaman the Golden Age nishca revistahuan predicajpica, paicunaca cushijuimandaca huacaitapashmi huacarca nircami. Chaimandami huauquiguca: “Shujcunata ayudashpaca ñucanchillatami ninanda cushijunchi” nirca.

Estudiantes de la Bibliacunaca, Lucas 10:2​pi Jesús nishcata uchalla pactachina cashcatami cuenta japirca. Chaipica: “Cozechanaca ashtacami tian. Pero cozechadorcunaca huaquingunallami can” nijunmi. Shinaca 1922 huata tucuripica huauquipanicunaca Diospa Gobiernomanda ashtahuan villachingapami decididos carca.