Paraíso alpagupi causangapaca ¿ñachu listo capangui?
JESUSCA: “Humildecunaca ninandami cushijun. Porque paicunamanmi Taita Diosca cai alpata caranga” nircami. Tucuicunallatami cai shimicuna pactarichunga munapanchi (Mat. 5:5). Ungidocunaca Jesushuan cielopi mandai callarishpami cai alpataca mandanga (Apoc. 5:10; 20:6). Jehovata sirvijcunamandaca mayoriami cai alpapi para siempre causana esperanzata cushijushpa shuyanajun. Paraisopica paicunaca perfecto tucushpami, tranquilo ali, cushilla causanga. Shina causangapaca ¿imatata rurana tucunga? Cai temapimi quimsa cosascunata rurana cashcata yachajupashun. Paicunaca cai alpa shuj paraíso tucuchun ayudana, causarishca gentecunata ayudashpa Jehovamanda yachachinami tucunga. Caicunata paraisopi pactachi ushangapaj cunanmandallata imata rurana cashcatapashmi yachajupashun.
CAI ALPA SHUJ PARAÍSO TUCUCHUN AYUDANGAPACA ¿LISTOCHU CAPANGUI?
Jehová Diosca “cai pachapi jundanguichi. Cai pachapi imalla tiajcunata cazuchinguichi” nishpaca, shuj punllaca mundo entero shuj paraíso tucunatami ricuchijurca (Gén. 1:28). Paraisopi para siempre causajcunaca Jehová Dios nishca shimicunatami pactachina tucunga. Armagedón punlla jipaca cai alpaca na enseguida shuj paraíso tucungachu. Porque jardín de Edenga ñana tianllu. Gentecunaca cai alpataca ashtacatami huaglichishca. Chaimandami cai alpa shuj paraíso tucuchunga limpiashpa ayudashun. Ashtaca trabajomi tianga.
Jerusalén llactaca 70 huatacunatami jichushca carca. Chaimandami israelitacunaca Babiloniamanda Jerusalenman tigrashpaca ashtacata trabajana tucurca. Profeta Isaiasca Jehovapa promesacunamanda parlashpaca: “Jichushca sirij pambacunataca, paraíso nishca juyailla jardinmanmi tigrachisha. Chaquishca pambacunataca, Mandaj Diospaj huertatashnami rurasha” nircami. Isaías nishcashnami israelitacunaca Jehová Diospa ayudahuanga Jerusalén llactata cutinllata arreglagrinajurca (Is. 51:3). Isaías nishcashnami pactarirca. Shinallatami Jehová Dios bendiciajpi gentecunaca cai alpa shuj paraíso tucuchun ayudanga. Cunanmandallatami cai alpa shuj paraíso tucuchun ayudangapaj munashcataca ricuchita ushapanchi.
Chaipaca cunanmandallatami ñucanchi huasiguta o huasi lado pushtuguta aliguta limpiashpa, ordenashpa chari ushapanchi. Vecinocuna chai costumbreta na charijpipash ñucanchicunaca limpiolla charingapami esforzarina canchi. Shinallata Salón del Reinota y Salón de Asamblea pushtucunata limpiashpa, mantenimientocunata rurashpapashmi apoyaita ushapanchi. Llaqui apashca pushtucunapi huauquipanicunata ayudangapapashmi dispuesto caita ushapanchi. Caicunata rurashpami shujcunata ciertopacha ayudangapaj munashcata ricuchishun. Shinaca: “Paraisopi causajushpa shujcunata ayudangapaca ¿imatata cunanmandallata yachajuita ushapani?” nishpa pensaripashunchi.
HUAÑUSHCACUNA CAUSARIJPI AYUDANGAPACA ¿LISTOCHU CAPANGUI?
Jairo runagupa ushigu causarijpica Jesusca cuitsaguman imagutapash micuchun carapaichi nircami (Mar. 5:42, 43). 12 añosta charij cuitsaguta atindinaca na difícil cashcangachu. Bibliapica: “Gulpi huañushcacunami Taita Diospa Churi cayajta uyashpa causaringa” ninmi. Jesús cai promesata pactachijpica ñucanchicunaca ashtacatami ayudana tucushun (Juan 5:28, 29). Huañushcacuna causarijpi paicunamanda imatalla rurana cashcata Bibliapi na tucuita villajujpipash micunaguta, huasiguta, ropaguta minishtinataca seguromi capanchi. Paicunata ayudangapaj listo cashcataca ¿imashinata cunanmandallata ricuchita ushapanchi? Cai tapuicunapi pensaripai.
Paraisopi causangapaj listo cashcataca ¿imashinata ricuchita ushapanchi?
¿Superintendente de circuito huauqui congregacionda visitajujpica micunaguta carangapaj invitapanguichu? Betelpi sirvij huauquigu o panigu shuj mushuj asignacionhuan llujshijujpi o shuj superintendente de circuito huauqui ñana chai asignacionhuan cajpica ¿paicuna causachun huasiguta mascashpa ayudaita ushapanguichu? ¿Quiquin causajuj pushtupi asamblea regional o especial tiajpica asamblea nara callarijpillata o tucurishca jipa ayudangapaj o delegado huauquipanicunata chasquishpa ayudangapaj dispuestochu capangui?
CAUSARISHCA GENTECUNATA JEHOVAMANDA YACHACHINGAPAJ PREPARADO CAPASHUNCHI
Hechos 24:15pi shimicunaca ashtaca millón gentecuna causarinatami ricuchin. Paicunamanda ashtacacunaca Jehovamanda yachajuna oportunidadtaca na charircachu. Pero ña paraisopi cashpami Jehovamanda yachajuita ushanga.a Jehovata sirvijcunaca ashtaca gentecunaman Jehovamanda yachachina oportunidadtami charinga (Is. 11:9). Europa, Sudamérica y África llactacunapi predicashca Charlotte paniguca chai punlla uchalla chayamuchunmi munan. Paniguca ninmi: “Causarishca gentecunaman Jehovamanda yachachingapaca ninandami munani. Punda tiempopi causashca gentecunamanda liishpaca: ‘Paicuna Jehová Diosta rijsishca cashpaca imashashi paicunapa causaica canman carca’ nishpami pensarini. Huañushcacuna causarijpi Jehovamanda yachachingapaj y paita sirvishpa imashna causanata parlangapami cushijushca shuyajupani” ninmi.
Jesús cai alpaman nara shamujpillata Jehovata sirvishca gentecunaca ashtacatami yachajuna tucunga. Profeta Daniel escribishca profeciacuna imashna pactarishcata paimanllata explicana privilegiotami charipashun (Dan. 12:8). Shinallata Rutman y Noemiman quiquingunapa familiamandami Mesiasca shamurca nishpa yachachinaca ninandami cushichinga. Ashtaca gentecunaman Jehovamanda yachachina bendiciondami charishun. Paraisopica cunanbishna jarcaicunataca ñana charishunllu.
Causarishca gentecunaman Bibliamanda yachachingapaj munashcataca ¿imashinata cunanmandallata ricuchita ushapanchi? Chaipaca cunanmandallatami ashtahuan predicangapaj y Bibliamanda ashtahuan ali yachachingapaj esforzarina capanchi (Mat. 24:14). Mayorlla cashpa o ima jarcaicunata charishpapash cunanmandallata ashtahuan predicangapaj esforzarishpami causarishca gentecunaman Jehovamanda yachachingapaj listo cashcata ricuchipashun.
Shinaca: ¿Ciertopachachu paraíso alpagupi causangapaj munapangui? ¿Cai alpa shuj paraíso tucugrijushcata y causarishca gentecunaman Bibliamanda yachachina cashcata yachashpaca cushijupanguichu? Paraisopi cashpa rurana cosascunata cunanmandallata rurashpami chaipi causangapaj listo cashcata ricuchijupangui.
a “Ashtacacunami ‘alita rurashpa causanajunga’” nishca temata septiembre de 2022 Villajun revistapi ricupangui.