Gentecunaca tapunmi

Salmo 145:2​pica Davidca cambaj shutigutaca “causaita causaicamanmi” alicachijusha nircami. ¿Davidca nunca na huañuna cashcata pensaimandachu shina escribirca?

Na. Davidca cai shimicunataca ali yuyashpami escribirca.

Cai textopica Davidca: “Cambaj shutitaca, causaita causaicamanmi, tucui causaipi alicachijusha” nircami (Sal. 145:1, 2). Shinallata shuj textopica: “Ñucata Mandaj Taita Dioslla, ñuca tucui shunguhuanmi, candaca alicachijusha. Tucui causaipimi, cambaj shutigutaca, punchapambami nijusha” nircami (Sal. 86:12).

Davidca nunca na huañuna cashcata pensaimandaca na cai shimicunataca escribircachu. Paica pecador caimanda ima horapash huañuna cashcataca alimi yacharca (Gén. 3:3, 17-19; Sal. 51:4, 5). Davidca Jehovata sirvij Abrahán, Isaac y Jacob runacunapash huañushcataca alimi yacharca. Shinallata shuj punlla paipash huañuna cashcataca yacharcami (Sal. 37:25; 39:4). Pero Salmo 145:2​pi shimicunata nishpaca paipa tucui causaipi Diosta alabangapaj munashcatami ricuchijurca (2 Sam. 7:12).

Salmo capítulo 18, 51 y 52 callari partecunapica David paipa propio causaimanda escribishcatami ricuchin. Por ejemplo Salmo capítulo 23​pica Davidca, Jehová Dios shuj michij runagushna cajta, paipa llamagucunata ayudashpa cuidaj Dios cajtami nirca. Davidca paipa llamagucunataca shinallatami cuidan carca. Jehová shuj alipacha Dios cashcata yachaimandami Davidca paipa tucui causaipi Jehovata sirvingapaj munarca (Sal. 23:6).

Davidca pai escribishca shimicunataca Jehová Diospa ayudahuanmi escribirca. Pai escribishca shimicunamanda huaquin profeciacunaca tiempohuan pactarina cashcatami ricuchijurca. Por ejemplo, Salmo capítulo 110​pica Davidca, shuj punllaca ñuca Señorca o Jesusca Taita Diospa ali ladopimi tiaringa y ashtaca autoridadtami chasquinga nircami. Chai autoridadhuanmi Taita Diospa contracuna ‘imatalla rurashcata ricuchinga’. Davidpa familiamandami Mesiasca shamun. Mesiasmi cielomanda mandashpa ‘causaita causaicaman’ sacerdote canga (Sal. 110:1-6). Jesusllatami Salmo 110​pi profecía paimanda parlajushcata y jipa punllacunapi chai profecía pactarina cashcataca nirca (Mat. 22:41-45).

David escribishca shimicunaca Jehová Dios ayudashcamandami pai causashca tiempopi pactarirca. Jipa punllacunapi pai causarijpipashmi pactaringa. Shinami Davidca para siempre Jehová Diostaca alabai ushanga. Salmo 37:10, 11, 29​pi shimicunata intindinaca ¿imashinata ayudan? Cai textocunapica punda Israel llacta imashna causashcatami ricuchin. Shinallata jipa punllacunapi Taita Diospa promesacuna pactarijpi imashna causanatapashmi ricuchin (“Paraisopica ñucahuanmi cangui” nishca temata cai revistapillata ricupangui. Párrafo 8​ta ricupangui).

Salmo 145:2​pi shimicuna y shuj textocunapashmi David pai huañungacaman Jehová Diosta alabangapaj munashcata ricuchin. Chai textocunaca Jehová Dios Davidta causachijpi para siempre Jehovata alabai ushanatapashmi ricuchin.