Rey Davidca shuj jatun juchatami rurarca

Saúl huañushca jipami Davidca 30 huatacunata charishpa israelitacunapa rey tucurca. Shuj tutaca Davidca jahua terrasamandami, shuj juyailla huarmita ricurca. Davidca chai huarmi pi cashcata tapuchunmi cacharca. Shinami chai huarmi Bat-Seba shuti cashcata, Urías shuti soldadohuan cazarashca cashcatapash yachaj chayarca. Chaita yachashpapash ‘Davidca, chai huarmita apamuchun cachashpami paihuan puñurca’. Shinami Bat-Seba huarmica vijsayu quidarca. Chaimi Davidca pai juchapi urmashcata pacangapaj munashpa, paipa soldadocunata mandajmanga: ‘Uriastaca macanajungapaj primera filapi, maipimi macanajui ashtahuan shinlli caj pushtupi churanguichi. Chai jipaca paita atacachun y huañuchichunmi paitalla saquishpa anchurina canguichi’ nirca. Chai macanajuipi Urías huañujpimi Davidca Bat-Seba huarmihuan cazararca.

Jehová Diosca David imata rurashcataca alimi yacharca. Shinapash Jehová Diosca ¿imatashi ruragrijurca? Natán shuti profetata Davidhuan parlachun cacharca. Chaimi Natanga cashna nirca: Shuj llactapica ishcai jaricunami tiarca. Shujca charij jarimi carca. Cutin chaishujca pobremi carca. Chai charij jarica, ashtaca llamacunatami charirca. Cutin pobre jarica shuj randishca uchilla llamagutallami charirca. Shinapash chai charij jarica pobre jaripa shujlla llamagutami quichurca. Chaita uyashpaca Davidca ninanda culirashpami: Chai charij jarica ‘huañuchi tucunapachami’ can nirca. Chaimi Natán runaguca: ‘Chai jarica, quiquinmari cangui’ nirca. Shina nijpimi Davidca ninanda llaquirishpa cashna nirca: Juchata rurashpami, Jehovata fiñachishcani nishpa. Chai juchacunapi urmashcamandaca Davidpash, paipa familiapash ashtaca llaquicunatami charirca. Jehová Diosca Davidta castigashpapash, David humilde, sincero cashcamandami causashpa catichun saquirca.

Davidca Jehovapa templo huasita rurangapami munarca. Shinapash Jehová Diosca Davidpa churi Salomondami chai templo huasita rurachun agllarca. Davidca, Salomón joven caimanda ayudagrijurca. Chaimi templo huasita rurangapaj imacunatalla minishtishcata tandachi callarirca. Shinallata Jehovapa huasita shayachichun charishca culquitapashmi curca. Ashtahuanbash ali yachajushca trabajadorcunatapashmi mascarca. Chai jahuapash orota, culquita, Tiro llactamanda, Sidón llactamanda cedro caspicunatapashmi cararca. Davidca pai huañuna punlla chayajujpimi templo huasita imashina rurana planocunata Salomonman cushpa cashna nirca: Jehová Diosmi imashina templo huasita ruranataca ricuchihuarca. Shinami “ashtahuan ali yuyaita japishpa, shinlli tucushpa chaitaca ña rurai callarilla. Na manllanachu cangui” nishpa.