26 NATÁN
Shuj rey nalicunata rurashcata cuenta japichunmi ayudarca
NATÁN runaguca Davidpa palacioman rijushpaca: “Rey Davidca ¿imamandashi cashnapacha jatun juchataca rurarca?” nishpami talvez pensarijushcanga. Huaquin huatacuna huashamanga Jehová Diosca Natán runagutaca David shuj alipacha bendicionda charinata villachunmi cachashcarca. Natanga Davidmanga: “Canba miraimandami Mesiasca llujshinga” nishcarcami (2 Sam. 7:4, 12, 13). Shinapash cai viajeca Jehová Diosca David jatun juchacunata rurashcata cuenta japichunmi Natandaca cachajurca.
Davidca pai rurashca juchataca pipash na ricushcachu yajurcami. Shinapash Jehová Diosca tucuitami ricushcarca. Y Jehová Diosca David imata rurashcatami Natanmanga villarca. Shuj viajeca ña tutayajujpimi Davidca paipa huasi jahua terrazapi purijushpaca shuj huarmi armajujta ricurca. Chai huarmica “juyaillagumi carca”. Paica chai huarmita paipaman apamuchunmi cacharca. Bat-Sebaca Uriaspa huarmimi carca. Y Uriasca Davidpa ali soldadomi carca. Davidca chaita ali yachashpapashmi Uriaspa huarmihuanga huainayana juchapi urmarca. Asha tiempo jipaca Bat-Sebaca rey Davidmanga: “Vijsayumi cani” nishpa villachunmi cacharca. Y Davidca pai rurashca juchata pacangapaj munaimandami Uriastaca macanajujuj pushtumanda llujshishpa, huasiman tigrashpa paipa huarmihuan igual puñuchun mandarca (1 Samuel 21:5huan chimbapurashpa ricupangui). Shinapash Uriasca macanajui tiempocunapira chaishuj soldadocunatalla saquishpa, huasiman tigrashpa cushilla cangapaca na munarcachu. Chaimandami Davidca Uriasta imashina huañuchinata pensarirca. Chaipaca macanajunajuj pushtupica Uriastaca ñaupapi churachunmi mandarca. Shinami David pensashcashna Uriasca huañurca. Chai jipaca Davidca Bat-Seba huarmihuanmi cazararca.
Bibliapica: “David imata rurashcataca Jehová Diosca nimamanda nalicachircachu” nijunmi. Chaimi David nalicunata rurashcata cuenta japichunga profeta Natanda Jehová Diosca cacharca. Davidca Uriastami huañuchishca carca. Y Natanga Davidta jatun juchacunata rurashcata cuenta japichunmi ayudana carca. Chaimandami Davidpa palacioman rijushpaca profeta Natanga talvez manllaihuan, pinalla cashcanga. Natanga David shuj jatun juchata rurashcata cuenta japichunmi ayudangapaj munarca. Chaimandami Jehovata mañashca jipaca imata ninata pensarishpa Davidpa ñaupaman chayagrirca.
Paipaman chayashpaca Natanga shuj llactapi causaj ishcai jaricunamandami parlarca. Paica nircami: “Shuj jarica ashtaca ashtaca huagracunata y llamacunatami charirca. Cutin shujca imapash illa, pobremi carca. Paica shujlla llamagutallami charirca. Chai llamagutami huasipica ninanda juyashpa charirca. Shuj punllaca charij runapa huasiman shuj visita shamujpimi, charij runaca paiman micunata carangapaj invitarca. Shinapash cai charij runaca paipa llamacunamanda shujta huañuchishpa caranapa randica, ‘pobrella jaripa llamagutara japishpami visitangapaj shamushca runamanga micuchun prepararca’” nircami. Shina nijpica rey Davidca ninanda culirashpami cashna nirca: “Causajuj Jehová Diospa shutipimi jurani, chai jarica shina rurashcamandaca huañunapachami can” nircami. Chai runa “na llaquishpa shina rurashcamandami” Davidca ninanda culirarca.
Natanga shuj reyta ninanda juyashpa y respetashpapashmi nalita rurashcata cuenta japichun ayudarca
Natanga shuj ali chimbapuraitami utilizarca. Porque Davidca llamata michijmi cashcarca. Shinallata paica nalita rurajcunataca nimamanda nalicachishcatami ricuchishca carca. Shinaca Natanga na manllashpami Davidtaca: “Quiquinmari chai jari cangui” nirca. Shina nijpica Davidca ninandami manllarishcanga. Natanga Davidpa tucui nali rurashcacunatami yarichirca. Shinallata chai tucui nali cosascunata Jehová ricushcatami cuenta japichirca. Chai jipaca Natanga Jehová Dios imata nichun cachashcatami Davidmanga villarca. Jehová Diosca: “Caimanda cati huatacunapica pai y paipa familiapash ninandami llaquichi tucunguichi” nishcami carca. Shina nijpica Davidca ¿imatata rurarca?
Davidca paipa pecadomandaca ninanda llaquirishpami arripintirirca. Chaimi: “Jehová Diospa contrami pecadota rurashcani” nirca. Shinapash Natanga Davidtaca: “Jehová Diosca canba pecadotaca perdonanmi. Na huañugringuichu” nircami. Davidta Jehová llaquishpa tratajushcata villashpaca Natanga ninandami cushijushcanga. Shina cajpipash Bat-Seba huarmihuan huainayana juchapi urmashcamandaca Davidca ashtaca llaquicunatami charirca. Por ejemplo, Bat-Seba huarmihuan charishca huahuami huañurca. Y ashtaca huatacunatami paipa familiapica llaquicunata, problemacunata charirca.
Chashna llaquicunata charishpapash Davidca Jehovata sirvishpami catirca. Davidca ciertopacha arripintirijcunata Jehová Dios imashina perdonajtami Salmos libropi escribina bendicionda chasquirca (Salmos 32 y 51). Davidca Jehová Dioshuan cutin ali amigo tucushpami paipa tucui causaipi profeta Natanba consejocunata cazurca. Shinallata paipa causaipica alita rurashpami Jehová Diostaca huañungacaman ali sirvirca (1 Rey. 9:4). Natanga na manllashpami jatun juchacunata rurashcata cuenta japichun shuj jatun mandajtaca ayudarca. Y chaita na manllashpa rurashcamandaca ninandami cushijushcanga.
Bibliapi ima nijta liipai
¿Imatata nipanguiman?
Natanga ¿imashinata na manllashcataca ricuchirca?
Ashtahuan informacionda mascapai
1. Profeta Natán Bibliapa shuj parteta escribishca cajpipash paipa familiamandaca imatapash na yacharinllu. Shinallata paipa causaimanda ashtahuan informacionbash na tianllu. Shinaca ¿Natanmandaca imatata yachajupanchi? (w12 15/2 25 párrs. 2, 3).
2. Urías hitita cashpapash ¿imamandata Davidpa soldadocunapurapi carca? (w24.04 31).
3. Natanga David y paipa familia llaquicunata charinatami villarca. Chai shimicunaca ¿imashinata pactarirca? (it “David” párr. 29).
4. David ña mayorlla cajpica Natanga ¿imata rurashpata na manllaj cashcata ricuchirca? (w12 15/2 25 párr. 1). A
Dibujo A
Imata yachajushcapi pensaripai
Shuj amigo jatun juchata rurajpi ayudangapaca ¿imashinata Natanba ejemploca ñucanchitaca ayudaita ushan?
Shuj persona nalita rurajushcata cuenta japichun ayudangapaca ¿imashinata Natanba ejemplota catita ushapanchi? B
Foto B
¿Imashinata Natanba ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Natán causarijpica ¿imatata paita tapungapaj munaiman?
Ashtahuan yachajupai
David nalicunata rurashpaca ¿imashinata paipa amigocunata, paipa familiata y Jehová Diostapash llaquichirca? Shinallata ¿imashinata paillatapash llaquipi urmarca?
Juyaita charishpaca alimi portarishun: Na paipalla alita mascanllu (1:14)
Natanba consejocuna imamanda alipacha cashcata yachajupai.
“Nalita rurashcata cuenta japichun ayudajpica humildadhuan chasquipangui” (“Actividades para estudiar la Biblia”, nishcata jw.org paginapi ricupangui)