Imata charishpapash chaihuanlla contento canata yachajupashunchi

1. a) Contento personaca ¿imashinata can? b) Paipa causaihuan contento cashpapash ¿imatata na ruran?

¿QUIQUINBA causaihuanga contentochu sintiripangui? Contento caj personaca pai charishca cosascunapi concentrarishpami cushilla y tranquilo can. Pai na charishca cosascunamandaca na culirajunllu. Paipa causaihuan contento cashpapash na conformarina cashcamandallachu conformarishpa causan. Más bien Jehová Diosmanda imagutapash ashtahuan rurangapami esforzarin (Rom. 12:1; 1 Tim. 3:1). Cunanbi pai munashca asignaciongunata na chari ushashpapash paipa causaihuanga contentomi sintirin.

2. Ñucanchi charishca cosascunahuan na contento cashpaca ¿imacunatallata ruranchiman?

² Ñucanchi charishca cosascunahuan na contento cashpaca nali ruraicunatami rurai callarishun. Por ejemplo, huaquingunaca na minishtishca cosascunata randingapami talvez ashtaca horascunata trabajai callarin. Huaquingunacarin culquita o paicuna munashca cosascunatami shuai callarin. “Caica ñucapami cana can”, “jipaman tigrachishallami” yashpami pensarin. Imashina pensashpapash chai cosascunataca shuaitami shuanajun. Shuashpaca Jehová Diospa shutita mapayachishpami paipa ñaupapica nali ricurin (Prov. 30:9). Cutin shujcunaca paicuna munashca responsabilidadcunata na chari ushashcamandami Jehová Diosta sirvinataca saquishca (Gál. 6:9). Jehová Diosta sirvijcunaca ¿imamandashi talvez chashna nali cosascunataca ruranga? Asha asha paicunapa causaihuan na contento sintirimandami talvez chashna nali cosascunataca ruranga.

3. Filipenses 4:​11, 12​mandaca ¿imatata yachajupanchi?

³ Ñucanchi charishca cosascunahuanlla contento sintirinaca huaquinbica dificilmi can. Shinapash minishtirishca cosascunahuanlla contento causanataca yachajuita ushapanchimi. Apóstol Pabloca “imata charishpapash chaihuanlla cushilla canatami yachajupashcani” nircami (Filipenses 4:​11, 12​ta liipangui). Chai shimicunata escribishpaca apóstol Pabloca prezomi carca. Shinapash cushillami carca. Ñucanchi causaihuan na contento sintiri ushajushpaca apóstol Pablo imata nishcata, imashina causashcatami yuyarina capanchi. Shinapash, ima pasajpipash ñucanchi causaihuan contento cangapami cai temapica quimsa yuyaicunata yachajupashun.

AGRADECIDO CAPASHUNCHI

4. Agradecidocuna cashpaca ¿imacunahuanllata contento cashun? (1 Tesalonicenses 5:18).

⁴ Agradecidocuna cashpaca, ashtahuan cushillami sintirishun (1 Tesalonicenses 5:18​ta liipangui). Por ejemplo, ñucanchi charishca cosascunamanda agradecido cashpaca, na charishca cosascunapica na yapata pensarinajushunllu. Shinallata Jehová Diosta sirvijushcamanda paita agradicishpaca, ñucanchi charingapaj munashca responsabilidadcunapica na yapata pensarinajushunllu. Chaipa randica ñucanchi charishca asignacionda aliguta pactachingapami esforzarishun. Jehová Diosca ñucanchicuna agradecido cachunmi munan. Chaimandami Bibliapica oracionda ruranajushpaca siempremi agradicina canguichi nin. Agradecidocuna cajpimi ‘Taita Diosca gentecuna na intindi ushanalla tranquilo, ali canataca caranga’ (Filip. 4:​6, 7).

5. Israelitacunaca ¿imacunamandallata Jehová Diostaca agradicina carca? (Dibujotapash ricupangui).

⁵ Israelitacunapi pensaripashunchi. Paicunaca Egipto llactapa micunata yarishpami cutin cutin Jehovaman quejarinajurca (Núm. 11:​4-6). Desiertopi causanaca na facilchu cashcanga. Pero Jehová Dios paicunamanda imatalla rurashcata valorashpaca cushillami sintirinman carca. Shinapash ¿imatallata Jehová Diosca israelitacunamandaca rurashcarca? Israelitacunaca Egipto llactapimi esclavocunashna maltratai tucushpa causanajurca. Chaimandami Jehová Diosca 10 plagacunata cachashpa paicunataca Egiptomanda llujchirca. Shinallata israelitacunaca Egiptomanda libre llujshishpami egipciocunapa plata cosascunata, ropata y orotapash apashpa rirca (Éx. 12:​35, 36). Shinallata, Jehová Diosca paipa poderta utilizashpami, Mar Rojota chaupishpa israelitacunataca faraonba soldadocunamanda salvarca. Ashtahuanbash israelitacuna desiertota rinajujpica, Jehová Diosca punllandi punllandimi maná nishca micunaguta cararca. Shinaca, micungapaca suficientetami israelitacunaca charirca. Shinapash Jehová Dioshuan na agradecidocuna caimandami paicunaca na contento carca.

6. Agradecidocuna cangapaca ¿imacunatallata rurai ushapanchi?

⁶ Agradecidocuna cangapaca ¿imacunatallata rurai ushapanchi? Primero, ima ali cosascunatalla charishcapi pensaringapami tiempota llujchina capanchi. Usharijpica shuj o ishcai cosascunamanda agradecido cashcatami anotaita ushapanchi (Lam. 3:​22, 23). Segundo, shujcuna ñucanchimanda imagutapash rurajpica paicunataca agradicinami capanchi. Ashtahuanbachaca Jehová Diostami cada punlla agradicina capanchi (Sal. 75:1). Tercero, agradecinata yachaj amigocunatami charina capanchi. Agradecido amigocunahuan tandanajushpaca ñucanchipashmi agradecidocuna tucupashun. Pero na agradecido cajcunahuan tandanajushpaca paicunashnami tucushun (Deut. 1:​26-28; 2 Tim. 3:​1, 2, 5). Agradecidocuna cangapaj esforzarishpaca, na charishca cosascunamandaca na yapata llaquirinajushunllu.

7. Amelia panigu paipa causaihuan conforme sintiringapaca ¿imatata rurarca?

⁷ Indonesia llactamanda Ameliaa shuti panigupa experienciata ricupashun. Paica ninmi: “COVID-19 pandemia tiempopica, ñucapa causaita shuj turiñañagucunapa causaihuan comparaimandami ñuca causaihuanga na conforme sintirijurcani” (Gál. 6:4). Ama chashna sintirichunga ¿imata panigutaca ayudarca? Paica ninmi: “Cada punlla charishca bendiciongunapimi pensari callarircani. Shinallata, Jehová Diospa organizacionbi caimanda ima ali cosascunatalla charishcapimi pensarircani. Shina pensarishpami Jehová Diosta agradicishpa ashtahuan cushilla sintirircani” nin. Ñucanchi causaihuan na conforme sintirijushpaca, Amelia panigu imata rurashcatami rurai ushapanchi.

HUMILDE CAPASHUNCHI

8. Baructaca ¿imata pasarca?

⁸ Barucpa ejemplota ricupashun. Paica profeta Jeremiaspa secretariomi carca. Shuj tiempotaca paipa causaihuanga na contento sintirijurcachu. Barucca profeta Jeremiasta ayudana difícil asignaciondami charirca. Profeta Jeremiasca, Jehová Diosta na cazuj israelitacuna tucuchi tucunatami villana carca. Pero Barucca Jehová Diospa voluntadta en primer lugar churanapa randica, pai imata rurangapaj munashcapimi pensari callarirca. Chaita ricushpami Jehová Diosca Barucmanga cashna ningui nishpa profeta Jeremiasmanga nirca: ‘Canga jatun tucunatami mascajungui. Chaitaca, ama mascaichu’ nirca (Jer. 45:​3-5). Shina nishpaca, Baructaca “canba causaihuanga contentomi cana cangui” nijurcami. Barucca Jehová Diospa consejota chasquishpami Jehová Diospa ñaupapica ali ricurirca.

9. ¿Imatata 1 Corintios 4:​6, 7​mandaca yachajupanchi? (Fotocunatapash ricupangui).

⁹ Huaquinbica shuj huauquica, imatapash ali rurai ushashcamanda, shinllita esforzarishcamanda o Jehová Diosta ashtaca huatacunata sirvijushcamandami, ñucami chai asignaciondaca miricini yan. Shinapash pai munajushca asignacionda shuj huauqui chasquijpi ama culira sintirijungapaca ¿imatata chai huauquica ruraita ushan? Ama culira sintirijungapaca apóstol Pablo 1 Corintios 4:​6, 7​pi imata escribishcatami yarita ushan (chai textota liipangui). Ñucanchicunaca shujcunamanda yali importante o mejorca na capanchichu. Imaguta ali rurai ushashpapash, ima asignacionda charishpapash Jehová Dios ninanda juyashpa carajpillami chaicunataca charita ushapanchi (Rom. 12:​3, 6; Efes. 2:​8, 9).

10. Humilde cangapaca ¿imatata rurana capanchi?

¹⁰ Humilde cangapaca Jesuspa ejemplopimi pensarina capanchi. Jesusca Taita Diospa Churi cashpapash y ashtaca autoridadta charishpapashmi paipa apostolcunapa chaquita maillarca. Apóstol Juanga cashnami nirca: “Jesusca, paipa Taita tucuita paipa maquipi saquishcataca alimi yacharca. Shinallata Taita Dios cachamujpi shamushcata y Taita Diospaman tigrana cashcatapash alimi yacharca”. Shina ali yachashpapashmi “Jesusca paipa discipulocunapa chaquita maillachi callarirca” (Juan 13:​3-5). Jesusca “ñuca apostolcunami ñuca chaquitaca maillana can” nishpaca na pensarcachu. Shinallata “Taita Diospa Churi caimandami ali huasita, ashtaca culquita charina cani” yashpapash na pensarcachu (Luc. 9:58). Jesusca humilde caimandami paipa causaihuanga contento carca. Shinami Jesusca alipacha ejemplota ñucanchimanga saquirca (Juan 13:15).

11. Huauquigu Dennispa ejemploca ¿imashinata ñucanchitaca ashtahuan contento sintirichun ayudan?

¹¹ Países Bajos llactapi causaj Dennis shuti huauquipa ejemplota ricupashun. Paica Jesushna humilde cangapami esforzarin. Shinapash huaquinbica na facilchu can ninmi. Huauquigu Dennisca ninmi: “Ñuca munajushca asignacionda shujmanra cujpica culira, envidiahuanmi sintirini. Shina sintirijushpaca humildadmanda parlaj textocunatami JW Library^® aplicacionbi liini. Chai textocunata ñapash tarita ushangapaca etiquetashcami charini. Shinallata humildadmanda parlaj discursocunatami uyani. Chai discursocunataca telefonopimi descargashca charini” ninmi.b Shinallata ninmi: “Imaguta rurashpapash ñuca alabarijunapa randica Jehová Diosta alabana cashcatami yachajupashcani. Jehová Diosmi ñucanchitaca imagutapash rurashpa paita sirvichun saquishca. Shinapash paipa obra ñaupaman catichunga Jehová Diosllatami tucuita ruran” ninmi. Ima horapash chai huauquigushna na contento sintirijushpaca humilde cangapami esforzarina capanchi. Shinami Jehová Dioshuan ashtahuan ali amigocuna cashun y ashtahuan contentopash sintiripashun (Sant. 4:​6, 8).

JEHOVAPA PROMESACUNAPI PENSARIPASHUNCHI

12. Isaías 65:​21-25​pi nishcashnaca ¿imata ñucanchitaca contento sintirichun ayudanga?

¹² Shamuj punllacunapi Jehová Dios carasha nishca promesacunapi pensarishpami ashtahuan contento sintiripashun. Isaías libropimi ñucanchicuna ashtaca llaquicunata charishcata Jehová Dios intindijtaca villajun. Chai libropillatami Jehová Dios tucuilla llaquicunata tucuchinatapash villajun (Isaías 65:​21-25​ta liipangui). Paraisopica juyailla huasiguta, ñucanchi gushtashca trabajota y mishquilla, sano micunagutapashmi charipashun. Ñucanchita o ñucanchi huahuacunata imapash nali cosascuna pasanataca nunca más na manllashunllu (Is. 32:​17, 18; Ezeq. 34:25). Jehová Dios paipa promesacunata shamuj punllacunapi pactachinataca seguromi capanchi.

13. ¿Ima situaciongunapi cashpata Jehová Dios cushca promesacunapi pensarina capanchi?

¹³ Shamuj punllacunapi shuj ali causaigu tianata cutin cutin pensarinaca ¿imamandata importantepacha can? Ñucanchicunaca ‘último punllacunapimi’ causanajupanchi. Chaimandami tucuicunallata “na aguantai ushanalla” llaquicunata charipanchi (2 Tim. 3:1). Shinapash Jehová Diosca ñucanchicuna minishtinajushca consejocunata cushpa, fuerzata cushpa y apoyashpami cada punlla ayudan (Sal. 145:14). Shinallata shamuj punllacunapi shuj ali causaigu tianata yachachishpami llaquicunata aguantachunga ayudan. Huaquinbica familiata mantiningapaca shinllitami trabajana tucupanchi. Shinapash na siemprechu shina causapashun. Porque Jehová Diosca paraíso alpagupimi tucui ñucanchi minishtishca cosasgucunata y ashtaca cosasgucunatapash carasha nishpa prometishca (Sal. 9:18; 72:12 -14). Cutin huaquinbica shuj grave unguita, depresión unguita o imapash shuj unguitami charipanchi. Pero ñucanchica na siemprechu ungushcalla causapashun. Porque Jehová Diosca shamuj punllacunapimi, unguicunata y huañuitapash tucuchisha nishpa prometishca (Apoc. 21:​3, 4). Jehová Dios cushca promesacunami ñucanchitaca, llaquicunahuan cashpapash ama culira sintirijuchun y ama yapata llaquirijuchunbash ayudan. Ñucanchicunata nali tratajpi, unguicuna japijpi, shuj familiar huañujpi o imapash llaquicuna japijpipash chai llaquicuna ‘ratopalla’ cashcata yarishpami cushilla caita ushapanchi. Shinallata paraíso alpagupi chai llaquicuna para siempre tucurinata yachashpapashmi cushilla caita ushapanchi (2 Cor. 4:​17, 18).

14. Jehová Dios cushca promesacunapi ashtahuan confiangapaca ¿imatata ruraita ushapanchi?

¹⁴ Jehová Dios cushca promesacunapi ashtahuan confiashpa contento cangapaca ¿imatata rurana capanchi? Jehová Dios cushca promesacunaca shuj lentes cuendami can. Lentesta churajushpaca tucuitami ashtahuan claro ricupanchi. Shina cuendallatami Jehová Diospa promesacunata clarito yaipi charingapaca huaquin cosascunata rurana capanchi. Por ejemplo, culquimanda preocuparijushpaca paraíso alpagupi imashina canatami pensarita ushapanchi. Paraíso alpagupi cashpaca culquitapash ñana minishtishunllu, pobrezapash ñana tiangachu. Shinallata huaquinbica ñucanchi munashca asignaciongunata na chari ushaimandami cunanbica llaquilla sintiripanchi. Pero pensaripai, paraíso alpagupi cashpaca perfectomi capashun y ashtaca huatacunatami Jehová Diostaca sirvinajushun. Chaimandami asignaciongunata charinamandaca ñana preocuparinajushun (1 Tim. 6:19). Ashtaca llaquicunata charimandami Jehová Diospa promesacunapi pensarinaca talvez difícil caita ushan. Pero Jehová Diospa promesacunapi ashtahuan pensaringapaj esforzarishpaca ñucanchi charishca llaquicunapica ñana yapata pensaripashunllu.

15. Cristalpa ejemplomandaca ¿imatata yachajupanchi?

¹⁵ Cunanga Cristal panigupa ejemplota ricupashun. Paica párrafo 11​pi parlashca Dennis huauquipa huarmigumi can. Paica ninmi: “Ungushcapacha caimandami silla de ruedasta utilizani y casi siempre camapilla yalini. Doctorpaman rijpimi canga ñana mejoranguichu nihuarca. Shina nijpimi, ‘cunanbi na mejorarina cashpapash shamuj punllacunapica ali causaigutami charisha’ yarcani. Jehová Dios cushca promesacunapi pensarinami ñucataca tranquilo, ali sintirichun ayudahuashca. Cunanbica chai unguitami aguantashpa catina cani. Pero paraíso alpagupi cashpaca sano, alimi causasha” ninmi.

JEHOVÁ DIOSTA “MANLLAJCUNAPACA, IMAGUPASH NA ILLANLLU”

16. ¿Imamandata rey Davidca Jehová Diosta “manllajcunapaca, imagupash na illanllu” nirca?

¹⁶ Ñucanchi causaihuan contento cashpapash tucuicunallatami problemacunataca charinchi. Rey Davidpa ejemplota ricupashun. Davidca yangamandami juchachi tucurca y traicionai tucurca. Shinallata contracunaca ashtaca huatacunatami paitaca huañuchingapaj catiriarca. Paipa quimsa churicunapashmi huañurca. Shuj shuj llaquicunata charishpapash rey Davidca paipa causaihuanga contentomi sintirirca. Ashtahuanbash rey Davidca Jehová Diosta “manllajcunapaca, imagupash na illanllu” nircami (Sal. 34:​9, 10). Rey Davidca ¿imamandata shina nirca? Llaquicunata charichun Jehová Dios saquishpapash, imata minishtijushcata Jehová Diosllata caranata seguro caimandami Davidca shina nirca (Sal. 145:16). Ima pasajpipash Jehová Dios ñucanchita ayudanata seguro caimandami David cuendallata contento sintiripanchi.

17. ¿Imamandata ñucanchi causaihuan contento cangapaj munapanchi?

¹⁷ Jehová Diosca ñucanchi causaihuan contento causachunmi munan (Sal. 131:​1, 2). Cai temapica ñucanchi causaihuan contento cangapaj imata ruranatami yachajupashcanchi. Chaimandami agradecido cangapaj, humilde cangapaj y Jehová Diospa promesacunapi pensaringapaj esforzarina capanchi. Shinami “cushilla canatami yachajupashcani” nita ushapashun (Filip. 4:11).