¿Bibliapica joyascunata y maquillajecunata utilizanata prohibinllu?
Bibliapica caitami yachachin
Bibliapica cai temamandaca na yapata parlanllu. Shinapash arreglarinata, maquillarinata, aretecunata o joyacunata churajunataca na prohibinllu. Ashtahuanbash Bibliapica ñucanchi fisicamente imashina cashcapi yapata concentrarinapa randica, ñucanchi shungupi ucupi ꞌtranquilo y ali ali canaꞌ ashtahuan importante cashcatami yachachin (1 Pedro 3:3, 4).
Arreglarinaca alimi can
Taita Diosta punda tiempopi sirvij huarmigucunapash arreglarin cashcatami Bibliapica parlan. Rebeca huarmiguca Isaachuanmi cazararca. Rebecaca singapi churajuna anillo de orotapash, oro brazaletecunatapash, shuj valishca joyacunatapashmi churajurca. Chai cosascunataca paipa suedro tucuna Abrahanmi cararca (Génesis 24:22, 30, 53). Shuj ejemplotapash ricupashun. Ester shuti jovenga, Persa llactapa reina cachunmi agllai tucushca carca. Chaipaca, ꞌmirra nishca aceitehuan, mishquillagu ashnajuj jambicunahuan, huarmicuna churarina mishquillagu ashnajuj jambicunahuambashmi alichirishcaꞌ cana carca (Ester 2:7, 9, 12, Diospaj Shimi, 1994).
Bibliapica huaquinbica joyacunataca ali cosascunahuanmi comparan. Por ejemplo, Bibliapica ninmi: Ali consejocunata cuj personaca, ꞌoro zarcilloshna ashtahuan ali oromanda rurashca juyailla huatarinacunashnamiꞌ can ninmi (Proverbios 25:12). Israel llactapaca Taita Diosca shuj cusashnami carca. Paipa huarmigu aligu ricurichunga cusaca brazaletecunata, shuj collarta, aretescunatapashmi cararca. Cai adornocunahuanmi Israel llactataca, shuj huarmigushna “tucuimanda yali juyaillagupacha” ricurijurca (Ezequiel 16:11-13).
Maquillajecunamanda, joyacunamanda panda yuyaicuna
Huaquingunaca caitami crin: 1 Pedro 3:3pica ꞌajchata arreglarinata, oro cosascunata churajunatapashmiꞌ Bibliapica prohibinmi ninmi.
¿Chaica ciertochu can?: Chai textopa ñaupa versiculocunata, cati versiculocunata liishpaca, Bibliapica ñucanchipa shungupi ali cana, ñucanchipa fisicomanda o churajushca adornocunamanda ashtahuan importante cashcatami cuenta japinchi (1 Pedro 3:3-6). Cai importante yuyaitaca shuj versiculocunapipashmi ashtahuan aliguta intindichin (1 Samuel 16:7; Proverbios 11:22; 31:30; 1 Timoteo 2:9, 10).
Huaquingunaca caitami crin: Jezabel nali, millai reinaca yana pinturahuanmi paipa ñavicunataca pintarirca. Chaimi maquillarinaca nali can ninmi (2 Reyes 9:30).
¿Chaica ciertochu can?: Jezabelca brujeriatami ruran carca, huaquin gentecunatapashmi huañuchirca. Chaimandami paica llaquichi tucurca. Pai imashina arreglarishcamandaca na llaquichi tucurcachu (2 Reyes 9:7, 22, 36, 37).