BIBLIAPA ALIGUTA INTINDICHISHCA TEXTOCUNA
Romanos 12:12 | “Shamuj punllacunapi imata japinataca cushijushpa shuyapaichi. Llaquicunata charishpaca aguantapaichi. Taita Diosta mañanatapash ama saquipaichichu”
“Shamuj punllacunapi imata japinataca cushijushpa shuyapaichi. Llaquicunata charishpaca aguantapaichi. Taita Diosta mañanatapash ama saquipaichichu” (Romanos 12:12, Traducción del Nuevo Mundo).
“Regocíjense en la esperanza, sean pacientes en la tribulación, sean constantes en la oración” (Romanos 12:12, English Standard Version).
Romanos 12:12pica ¿imatata ningapaj munan?
Apóstol Pabloca Roma llactamanda cristianocunata catiriashpa llaquichijpi o shuj shuj llaquicunata charijpi imata rurana cashcata animangapami cai versopi shimicunataca nirca.
“Shamuj punllacunapi imata japinataca cushijushpa shuyapaichi”. Huaquinguna jahua cieloman rina cashpapash o cai alpapi causana cashpapash Diosta sirvijcunaca shamuj punllapi ali causaigu tiana esperanzatami charin (Salmo 37:29; Juan 3:16; Apocalipsis 14:1-4; 21:3, 4). Taita Diospa Gobiernollaa gentecunapa tucui llaquicunata tucuchina esperanzatapashmi charipanchi (Daniel 2:44; Mateo 6:10). Taita Dios adorajcunaca llaquicunata aguantashpapash cushillami sintirina can. Paicuna llaquicunata aguantajpillami Taita Diospa ñaupapica ali ricuringa (Mateo 5:11, 12; Romanos 5:3-5).
“Llaquicunata charishpaca aguantapaichi”. Bibliapica “aguantana” shimita traducishpaca caicunatapashmi ningapaj munan “na anchurishpalla chaipi quedana, na saquina, chaipi quedana”. Jesusta catijcunaca ‘cai mundopi gentecunashnaca’ na canllub. Chaimandami catiriashpa llaquichijpipash aguantashpa catina minishtirin (Juan 15:18-20; 2 Timoteo 3:12). Llaquicunata aguantana cajpipash Taita Diosta sirvijcunaca Taita Diostaca tucuipimi cazun, ultimocaman aguantajpilla Taita Dios paicunata salvanataca tucui shunguhuanmi criin (Mateo 24:13). Shinlli feta charimandami llaquicunataca, pacienciahuan, cushilla aguantaita ushan (Colosenses 1:11).
“Taita Diosta mañanatapash ama saquipaichichu”. Cristianocunataca Taita Diosta sirvishpa catita ushachunga Diosta cutin cutin mañana canguichi nishpami animan (Lucas 11:9; 18:1). Shinallata paicunapa tucui causaipi Taita Dios pushachunmi siempre saquina can (Colosenses 4:2; 1 Tesalonicenses 5:17). Taita Diospa mandashcacunata cazujushcamanda, Taita Dios munashcashna causajushcamandami paicunapa mañashcacunata uyanataca seguro can (1 Juan 3:22; 5:14). Shinallata Taita Diosta mañanata na saquijpica llaquicunata aguantachun Taita Dios fuerzata cushpa ayudanataca alimi yachan(Filipenses 4:13).
Romanos 12:12pa ñaupa y cati textocuna
Huata 56pica Pablo Roma llactapi causajushpami Jesusta catijcunamanga shuj cartata escribirca. Apóstol Pabloca capitulo 12pica ali consejocunatami escribirca. Jesusta catijcuna ali cualidadcunata charichun, huauquipanicunahuan shuj gentecunahuanbash juyarishpa causachun, catiriashpa llaquichijpipash na chashnallata tigrachunmi yachachirca (Romanos 12:9-21). Roma llactamanda Jesusta catijcunaca apóstol Pablopa consejotaca a tiempomi chashquirca porque paicunaca shuj llaquitami charigrinajurca.
Huata 64pica Roma llactami ruparca. Ashtaca gentecunaca Roma llactataca jatun mandaj Nerón runami rupachishca ninajurca. Tácito runa nishcashnaca Nerón shuti runaca Roma llactataca Jesusta catijcunami rupachishca nishpami juchachirca nircami. Chaimandami Jesusta catijcunataca catiriashpa llaquichirca. Chai tiempocunapica Pablopa consejocunami llaquicunata aguantashpa catichun ayudarca (1 Tesalonicenses 5:15; 1 Pedro 3:9). Roma llactamanda Jesusta catijcunapa ejemplomi cunan punllacunapipash Taita Diosta sirvijcunataca ayudaita ushan.
Romanos libromanda ashalla videota ricupai.
a Taita Diospa Gobierno mandashpami cai alpapi Taita Diospa munai pactaringa. Caimanda ashtahuan yachangapaj munashpaca “¿Qué es el Reino de Dios?” nishca tematami ricuita ushapangui.
b Bibliapica “mundo” nishpaca Taita Diosta na rijsi gentecunamandami ningapaj munan.