COVID-19 Ungui tiaurasca Salón del Reinocuna limpio cachunmi cuidarcanchi

Marzo callari quillapica jw.org paginapimi shuj villai tiarca. Cuerpo Gobernantemanda huauquicunaca autoridadcuna imatapash na nijpica “1 de abriltaca tucui Salón del Reinocunapimi ña tandanajuita ushanguichi” nishpa villarca. Cai villaita yachaj chayashpaca mundo enteropi testigo de Jehovacunaca cushillami sintirircanchi, pero COVID-19 unguica nara tucurircachu. Tandanajuicunaman rijcunata cuidangapami Salón del Reinopi imacunalla minishtirishcacunata charina carcanchi.a Ishcai huatacunata Salón del Reinopi na tandajushca cashpaca ¿imashinata Salón del Reinocunataca limpio y listo charita usharcanchi?

Salón del Reinocunaman cutin tigrangapaca huauquicunaca huaquin quillacuna faltajpillatami Salón de Reinocunataca alichinajurca.

Cada congregaciongunapi imacunatalla minishtishcata ricushpami ayudashcanchi

2020​pica COVID-19 unguimandami en personaca ñana tandanajuicunataca charigrinchichu nishca villarca. Chashna villashca shuj quilla jipallami Departamento de Diseño y Construccionbi sirvij huauquicunaca tandanajuicunata seguro charingapaj imacunatalla rurana cashcata ricurca.

Cada congregacionmi shuj shuj cosascunata minishtinajurca. Departamento de Diseño y Construccionbi sirvij Matthew De Sanctis huauquica cashnami nin: “Huaquin pushtucunapica maquita maillangapaca dificilmi carca. Huaquin Salón de Reinocunapica yacu na tiaimandami randishpa o shuj pozomanda apamun carca. Huaquin autoridadcunaca saludta cuidangapaj nishpami imata ruranata ricuchingapaj letrerocunata churarca”.

Cashna problemacuna tiajpica huauquicuna ¿imatata rurarca? Huauqui Matthewca cashnami nin: “Huaquin Salón del Reinocunapica maquita maillana pushtucunataca sencillo pushtucunata rurashpami ayudashca”. Por ejemplo, Papúa Nueva Guinea llactapica shuj botellondami grifotashna rurashpa maquita maillangapaca utilizarca. Huaquin Salón de Reinocunapica maquita maillana pushtucunata ruranaca solo 40 dolarllami gashtarirca. Shinallata África llactapa Salón del Reinocunaman cachangapaca 6 mil yali lavamanocunatami randirca.

Huaquin Salón de Reinocunapica huaira na yaicujujpimi ventiladorcunata churana tucurca. Huauquipanicuna microfonocunata ama caiman chaiman yalichirinajuchunmi ashtaca congregaciongunaca pértigas nishcata randina tucurca. Unguicunamanda ama contagiaringapami Salón del Reinocunataca desinfectana carcanchi. Ashtahuanga pungucunata lavamanocunatami desinfectana carcanchi. Cutin huaquin congregaciongunapica lavamanocunapi yacu paimanda pascarichunmi sensor nishcacunata churashca. Chilepica ama COVID-19 unguimanda contagiarinpagami Salón del Reinocunapi minishtirishca cosascunata churangapaca mil 400 dolarcuna gashtarirca.

Huauquipanicuna Salón del Reinopi seguro sintirichunmi anciano huauquicunaca contribución culquigutaca aliguta utilizarca. Por ejemplo, huaquin llactacunapica gobiernocunapa ayudata chasquimandami lavamanocunamanda, pértigas nishcacunamanda pagaita usharca. Minishtirishca cosascunata yapalla randingapami sucursalcunaca randimanda ayudarishpa culquitaca na yapata gashtarca. Sucursalmanda y departamento de compraspi sirvij huauquicunaca imatapash randingapaca empresacunahuanpachami parlan carca. Cashna randimandami baratolla y uticalla imagutapash entregan carca.

“Congregacionbi tucuita rurashcata ricushpami tranquila sintirircani”

Salón del Reinocunapica COVID-19 unguimanda ama contagiaringapaj minishtirishca cosascunata rurashcata ricushpami tandanajuiman ricunaca seguro y tranquilo sintirishca. Perú llactamanda Dulcine paniguca cashnami nin: “Salón del Reinoman cutin tigranata yachaj chayashpaca manllaihuanmi carcani”. “Pandemia callarishcandimi COVID-19 unguihuanga contagiarircani chaimi Salón del Reinoman cutin tigranata yachaj chayashpaca cutin contagiarisha yashpa manllarcani. Pero Salón de Reinoman yaicushpaca anciano huauquicuna tucui minishtirishca cosascunata churashcata ricushpami tranquila sintirircani. Maquita desinfectangapaj alcoholta y microfonota churangapaj pértigas nishcata charijtapashmi ricurcani. Shinallata tandanajuita nara callarijpillata y tandanajui tucurishca jipapashmi desinfectangapaj quidashcarca. Congregacionbi tucuita rurashcata ricushpami tranquila sintirircani”.b

Zambia llactamanda, Sara paniguca cashnami nin: “Ñuca cusagu COVID-19 unguihuan huañushcamandami cutin Salón del Reinoman ñuca cusagu illa rishpaca imashinashi sintirisha yashpami pinarijurcani”. Cunan Salón del Reinoman tigrashca jipaca cashnami nin: “Tandanajuicunata en persona charinaca último punllacunapi Jehová Dios ñucanchita cuidajushcatami ricuchin. Tandajuicunaman cutin rimandami anciano huauquicunapa, shuj turiñañacunapa ayudata animota ashtahuan charishcani”.

Mundo enteromanda huauquipanicunaca cutin tandanajuicunaman rita ushashcamandami ninanda agradicin. Donate.jw.org paginaman yaicushpa quiquinba contribuciongunahuan ayudashcamandaca ninandami agradicipanchi. Chai contribución culquigucunahuanmi Salón del Reinocunapica minishtirishca cosasgucunata randishpa huauquipanigucuna seguro sintirichun ayudashcanchi.