Perdonanami canchi

“UCHILLAMANDAPACHAMI CAPARINAJUJTALLA, PLITURINAJUJTALLA UYASHPA VIÑARCANI” nin Patriciaca. Shinallata ninmi: “Perdonanataca na yacharcanichu. Pipash imatapash nijpica, chaitaca tauca punllacunatami yaria can carcani, puñuitapash na ushanllu carcani” nishpa. Culirashcalla, risintirishcalla purijcunaca cushilla caitapash, sano caitapash na ushashunllu. Huaquin investigadorcuna nishca shinaca, perdonanata na yachajcunaca ¿imata tucun?

• Culirashpa, risintirishpami shujcunahuan ali llevaritaca na ushan, caruyan, paicunalla sintirin.

• Ñapash culiran, yapata preocuparin, depresión ungüitapash japin.

• Shujcuna imata nishcatalla yaria cashpami cushilla causaitapash na ushan.

• Perdonashpaca paicunapa yuyaicunata na pactachijushcatami yuyan.

• Ashtahuan preocupaciongunata, shungu nanaicunata, uma nanaicunata, presión alta, artritis nishca ungüicunatapashmi charin.a

PERDONANACA ¿IMATA CAN? Perdonashpaca na culiralla, risintirishcalla, randi llaquichina yuyaihuanllu parana canchi. Perdonana nishpaca ¿nali rurashcata alicachishpa, imatapash na rurashcajpishna quedanatachu ninajunchi? Na. Perdonana nishpaca, shujcunahuan tranquilo, ali llevaringapaj munashpa, aliguta pensarishpa cada uno decidinatami ninajunchi.

Perdonanata yachajcunaca, tucuicunallata imagutapash nishpa o rurashpa pandarijta intindishcatami ricuchin (Romanos 3:23). Bibliapica ninmi: “Caishujhuan chaishujhuan llaquichirishca cashpapash, perdonarishpami causana canguichi” nishpa (Colosenses 3:13).

‘Tucuicuna shujllashna’ juyaringapaca perdonarinami capanchi (Colosenses 3:14, MTQI). Clínica Mayo nishca shinaca, perdonanaca ¿imamandata ali can?

• Llaquichijcunatapash intindishpa, llaquishpami tucuicunahuan ali llevarin.

• Ali sintirin, Taita Diospa ñaupajpipash ali ricurin.

• Na yapata preocuparin, na ñapash culiran.

• Depresión ungüita charishpapash na yapata llaquirin.

ÑUCANCHILLATAMI PERDONARINA CANCHI. Shuj revistaca ninmi, sano cangapaj, ali sintiringapaca “na fácil cajpipash ñucanchillatami perdonarina canchi” nishpa. Shinaca ¿imatata rurana capangui?

• Tucuicunashnallata quiquinbash pandarijtami intindina capangui (Eclesiastés 7:20).

• Ama cutinbash chaipillata pandaringapami, imapi pandarishcata yaipi charina capangui.

• Pacienciata charipangui. Quiquin charishca nali costumbrecunaca na ñapash chingaringachu (Efesios 4:23, 24).

• Quiquinda animashpa, ali tratashpapash quiquin imapi mejoranata nij amigocunata mascapangui (Proverbios 13:20).

• Pitapash llaquichishpaca, uchallami pandarishcata intindishpa perdonda mañana capangui. Paihuan ali tucushpami quiquinllata ali sintiripangui (Mateo 5:23, 24).

BIBLIAPI YUYAICUNATA PACTACHIPASHUNCHI

Callari parrafopi parlashca Patriciaca, Bibliata yachajuimandami perdonanata yachajurca. Paica ninmi: “Perdonashpami imapash huatashcamanda safarinshna sintirircani. Ñana sufrijurcanichu, shujcunatapash ñana sufrichijurcanichu. Bibliapi yuyaicunami, Taita Dios ñucanchicunata juyajta, ñucanchicuna ali causachun munashcata intindichun ayudahuarca” nishpa.

Roberto runagupash Bibliapi yuyaicunata catishpami ali sintirita usharca. Paica ninmi: “Shujcuna imata nijta, rurajtaca na controlaita ushanichu. Shinapash ñuca yuyaicunata, ruraicunataca controlaita ushanimi. Ali sintiringapaj munashpaca na risintirishcachu purina carcani. Risintirishpa tranquilo caitaca nunca na usharinllu” nishpa.