Juyanami canchi

TUCUICUNAMI JUYAITA MINISHTINCHI. Na juyarishpaca cusahuarmicunapash, familiacunapash, amigocunapash na ali causaita ushanchimanllu. Juyashpami ali sintiritapash, cushilla caitapash ushapanchi. Shinapash ¿imashina juyarinamandata parlanajupanchi?

Shuj jarihuan, shuj huarmihuan juyarinaca minishtirishcami can. Shinapash, Bibliapi yuyaicunata catishpa, shujcunata pundapi churashpa tucui shunguhuan juyaita ricuchinami, ashtahuan minishtirishca can.

Juyaita ricuchinamanda parlashpami Bibliapica nin: ‘Juyaita charishpaca, llaquita apanllami, shujcunatapash llaquinmi, imata charijtapash ñucapa cashcanman yashpaca na ricunllu, na ñucami ashtahuan ali cani ninllu, na jariyanllu, na imatapash pinganayaita ruranllu, na paipajlla alita mascanllu, na ñapash fiñarinllachu, na fiñashcalla causangapaj munanllu. [Llaqui apajpica] na cushijunllu. Ashtahuangarin na llullashpa aliguta rurajpimi cushijun. Tucui llaquita apanllami, tucuita crinllami, tucuita shuyanllami, ima nalita rurajpipash saquinllami. Juyaica, ima horapash na tucurinllu’ nishpa (1 Corintios 13:4-8).

‘Juyaica na tucurinllu’. Chaimandami, tiempo yalijpicarin ashtahuan juyaica miran. Juyaimandami, llaquita apashpa, llaquishpa, perdonashpami ‘tucuicunahuan shujllashna’ caita ushanchi (Colosenses 3:14, MTQI). Shinaca, juchayucuna cashpapash amigocuna cashpa catingapaj, cushilla cangapaca juyaitami charina capashcanchi. Cunanga cusahuarmicunamanda parlapashun.

‘SHUJLLASHNAMI’ CAITA USHAN

Jesusca nircami: ‘Jarica, taitatapash, mamatapash saquishpami paipa huarmihuan causangapaj tandanajunga. Ishcai cashpapash, shujlla aicha tucushpami causanajunga. Shina cashcamandami, Taita Dios chashna tandachishcataca, runaca napacha shicanyachi ushana’ can nishpa (Mateo 19:5, 6). Caipica ishcai alipacha yuyaicunatami yachachijun.

‘ISHCAI CASHPAPASH SHUJLLA AICHAMI TUCUNGA’. Cusahuarmillami shujlla aichashna tucuita ushan. Cusahuarmi juyarimandami na shujcunata japishpa paicunahuanra shujlla aichashna tucun (1 Corintios 6:16; Hebreos 13:4). Shuj huarmihuan, o shuj jarihuan falta urmajpica, huarmi cashpa o cusa cashpapash ñana confiashpami na ali causai callarin. Huahuacuna tiajpicarin, paicunapashmi sufrin. Ashtahuangarin, pipash na juyanllu yashpami, huahuacunaca llaquilla, risintirishca viñan.

“TAITA DIOS TANDACHISHCAMI” CAN. Chaita ali intindishpami cusahuarmicunaca ashtahuan ali llevaringapaj esforzarin. Ñapash partirishpa, separarinataca na yanllu. Tucui shunguhuan juyarinamandami ima llaquicuna ricurijpipash, igual ñaupaman catingapaj, cushilla, tranquilo causangapaj esforzarin.

Huahuacunamandami cusahuarmicunaca huarmita o cusata pundapi churashpa randimanda juyarina can. Jessica shuti jovenguca ninmi: “Ñuca taitamamacunaca tucui shunguhuanmi juyarin, respetarin. Ñuca papitopa decisiongunata ñuca mamita respetajta ricushpami ñuca mamitashnalla cangapaj munani” nin.

‘Taita Diosca ninandami juyan’ (1 Juan 4:8). Ninanda juyajpimi Taita Diosca cushilla Diosmi can nin (1 Timoteo 1:11, NM). Ñucanchicunapash Taita Dioshna juyaita ricuchingapaj esforzarishpaca ninandami cushijushun. Efesios 5:1, 2​pica ninmi: ‘Taita Diospa juyashca huahuacuna cashpami, paishnallapacha juyarishpa causana canguichi’ nishpa.