1 Igual causashpa catina munai

¿IMATA CAN?

Ciertopacha igual causana munaita charij cusahuarmicunaca, partirinataca na yanllu. Ima llaquicuna ricurijpipash igual catinataca seguromi can.

Huaquin cusahuarmicunaca familiacuna, rijsicuna rimanata manllaimandallami igual causashpa catin. Shinapash juyarimanda, respetarimanda igual causashpa catinami ashtahuan ali can.

BIBLIAPICA NINMI: “Cusapash, huarmitaca napacha jichunachu” can nishpa (1 Corintios 7:11).

Luisca ninmi: “Igual causana munaita charijcunaca na ñapash risintirinllu. Jahuallami perdonanata yachan, disculpatapash mañanllami. Problemacuna ricurijpica, ñapash partirinata pensanapa randica chai problemacunata arreglanatami yuyan” nishpa.

¿IMAMANDATA MINISHTIRISHCA CAN?

Igual causana munaita na charijcunaca, problemacuna ricurijpica na ali causai ushanchichu yashpami partirinata yuyai callarinlla.

Juanaca ninmi: “Ashtaca gentecunaca divorciarishalla yashpami cazaran. Divorciarianalla yuyaihuan cazarajcunaca ciertopacha igual causana munaitaca na charinllu” nishpa.

¿IMATATA RURAI USHAPANGUI?

PENSARIPAI

Huarmihuan, cusahuan culirarishpaca...

• ... ¿cazarashcata arripintirinichu?

• ... ¿shujhuan cazarashca cashpaca, alimi causaiman carcani yajunichu?

• ... ¿“saquigrinimi” o “shujtarapashmi mascagrini” ninatachu yachani?

Shuj o ishcai tapuicunata ari nishca cashpaca, quiquinba huarmihuan o cusahuan igual causashpa catina munaitami charina capangui.

PARLARIPAICHI

• ¿Igual causana munaitachu ñana charinchi? ¿Imamandata ñana igual causangapaj munanajunchi?

• Igual causashpa catina munaita charingapaca ¿imatata rurana capanchi?

CAICUNATA RURAPANGUICHI

• Usharijpica, juyashcata ricuchingapami imapash shimigucunata nishpa shuj hojagupi escribina capangui.

• Trabajo pushtupica, huarmipa o cusapa fototami charina capangui.

• Trabajopi cashpa o imamandapash carupi cashpaca, cada punlla cayana costumbretami charina capangui.

BIBLIAPICA NINMI: ‘Taita Dios tandachishcataca, runaca napacha shicanyachinachu’ can nishpa (Mateo 19:6).