Canlla Sintirishpa, Manllanayachishpaca ¿Imatashi Ruranguiman?

Caipi uchillaguta ricui. Paigulla, manllarishcami tiajun. ¿Ima horapash manllaita charishcanguichu?... Tucuicunami manllanayachinchi. Bibliapica parlanmi, Jehová Diosta juyashpa causaj gentecunapash huaquinbica paicunalla sintirishpa manllanayachishcata. Shujca Eliasmi carca. Paita ima pasashcata ricushun.

Jesús nara nacirijpillatami Eliasca Israel llactapi causarca. Chai tiempopica, rey Acabmi Israel llactata mandajurca. Acabpash paipa huarmi Jezabelpash Jehová Diosta na juyashpami yanga dios Baalta adoran carian. Chaimandami Israelmanda tauca gentecunapash Baalta adoran carian. Reina Jezabelca millaipacha cashpami Jehovata adorajcunataca tucuicunata huañuchingapaj munarca. Eliastapashmi huañuchingapaj munarca. Shina llaquipi cashpaca ¿imatashi Eliasca rurarca?...

Caru caruta rishpami shuj jatun utujupi pacajurca. ¿Imamandashi Eliasca pacajurca?... Manllaimandami pacajushcanga. Shinapash Eliasca na manllanachu carca. Paica alimi yacharca Jehová Dios ayudanata, ashtaca poderta charijtapash. Shuj viajeca Eliaspa mañashcata uyashpami Jehová Diosca ninata jahua cielomanda cachamurca. Shinaca Eliasca Jehovapimi confiana carca.

Elías jatun utujupi cajpimi Jehová Diosca tapuchirca: “¿Imamandata caipi pacajuriajungui?” nishpa. Jehová Diosta sirvijcunataca tucuita huañuchishca yashpami Eliasca nirca: “Cainanicunaca shujcunapashmi canda sirvijcuna tiarca. Cunanbica ñucallami quedani. Ñucatapash huañuchinatami manllajuni” nircami. Cutinmi Jehová Diosca nirca: “Na canllachu ñucata sirvihuajungui. 7 mil gentecunapash ñucata sirvinajunrami. Ama manllaichu. Shuj mandadotami canba charini” nirca. Jehová shina nijpica ¿imashinashi Eliasca sintirirca?... Ninandami cushijurianga.

Eliasmandaca ¿imatata yachajunchi?... Huaquinbica canlla sintirishpami manllanayachingui. Shinapash yuyai, Jehovatapash candapash juyaj amigocunatami charingui. Ama cungaichu, Jehová Diosca ashtaca podertami charin. Candaca siempremi ayudanga. Chaita yachashpaca ¿imashinata sintiringui?...