29 ELÍAS
“Jehová Diosmi ñuca Dios can”
BIBLIAPI Eliasmanda primera vez parlajpica Eliasca shuj millai, nali reyman Jehová ima nishcata villangapami rigrijurca. Israel llactamanda primer 6 reycunaca nalicunami cashcarca. Paicunapa jipaca Acabmi rey tucurca. Paimi paicunapuramandaca Jehová Diospa ñaupapica ashtahuan nali rey tucurca. Acabca shuj llactamanda princesa Jezabel huarmihuanmi cazararca. Acab yanga dioscunata adoran cajpipash paipa huarmica ashtahuan nali cosascunatami ruran carca. Jezabelca yanga dios Baaltami adoran carca. Baalta adorajcunaca talvez huahuacunata huañuchishpami sacrificiocunata ruran cashcanga. Shinapash shuj punllaca Jehová Diosca Eliastaca Acab nalita rurashcamanda paita rimachun y paita imashina castiganata villachunmi cacharca.
Elías Acabpa palacioman rijushpa imashina sintirishcata pensaripashunchi. Eliasca Galaad llactamanda, jatun pircacunata charij Samaria llactaman ringapaca caru carutami rina carca. Samariapimi Acabca shuj jatun jatun palaciota rurashcarca. Chai palaciotaca jatun jatun, juyaillagu cashcamandami ‘marfil huasi’ nishpa rijsin carca (1 Rey. 22:39). Eliasca milma churajunata, cara cinturonda churajushcami rijurca. Eliasca chai ropaguhuanmi chai jatun jatun palacioman rishpa reymanga paipa yanga dios Baal nimapapash na valishcata villana carca. Eliasta uyashpaca ¿Acabca imatata rurashcanga? Jezabelpash chaipi cashpaca ¿imatata ruranman carca? Seguromi ninanda culiranman carca. Acabpash y Jezabelpash paicunapa yanga dios Baal tamiachina poderta charishcatami yuyarca. Shinapash na manllashpami Eliasca chai yanga dios paicunata na ayudanata villarca. Porque Jehová Diosca huaquin huatacunata na tamianatami nishcarca. Jehová Diosta ali sirvij Elías cutin tamiana cashcata villajpillami cutin tamiagrijurca.
Eliasca ¿imamandata na manllashpa parlaita usharca? Chaita yachangapaca Elías Acab runahuan parlai callarishpa imata nishcata yaripashunchi. Eliasca: “Israelitacunaca causajuj Jehová Diostami adoran. Paitami ñucaca sirvini” nircami. Cai partepi hebreo shimipi “paitami ñucaca sirvini” nishca shimicunaca “paipa ñaupapimi shayajuni” nisha ninmi. Eliasca ashtaca poderta charij rey Acabpa ñaupapi shayarishpami Taita Dios castiganataca villarca. Shinapash “[Taita Diospa] ñaupapimi shayajuni” nishpaca Eliasca Acabta yali ninan poderta charij Taita Diosta sirvijushcatami ricuchirca. Acab y Jezabel ninan poderta y autoridadta charijshna ricurishpapash Jehová Diospa ñaupapica nima na carcachu. Chaita yaipi charishpami Eliasca na manllashpa parlaita usharca.
Eliasca shuj millai reyhuan, shuj millai reinahuan y Jehovata na cazungapaj munaj gentecunahuanmi chimbapurarca. Paipa manllaicunatapashmi misharca
Eliasca na manllashpami Taita Diostaca sirvishpa catirca. Por ejemplo, yarjai tiempo, chaquishca tiempo chayamujpica Jehová Diosca shuj yacu rijuj huaicu chulunlla pushtupi pacajuchunmi Eliastaca mandarca. Shina mandajpica Eliasca Jehová Diostaca cazurcami. Eliasca chai huaicumanda yacuta charinata, cuervo nishca pajarocuna micunata apamunatapashmi confiana carca. Shinallata Jehová Diosca paipi crij shuj viuda huarmiguta ayudachunmi Eliastaca cacharca. Chai huarmiguca Sidón llactapimi causarca. Eliasca chaiman ringapaca na manllaj cashcatami ricuchina tucurca. Porque chai llactapica Jezabelpa taitami mandaj carca. Chaipi gentecunapash nalicunami carca. Ashtahuanbash Eliasca Carmelo urcupi cashpami na manllaj cashcata ricuchirca. Chaipi cashpaca Eliasca Jehová Dioslla ciertopacha Dios cashcata ricuchingapami Baal yanga diospa 450 profetacunahuan chimbapurarca. Elías shutica “Jehová Diosmi ñuca Dios can” nisha ninmi. Y Eliasca Jehová Diospi cutin cutin confiashpami chai shimicuna cierto cashcata ricuchirca.
“Eliasca ñucanchishnallatami” huaquinbica manllaihuan sintirirca (Sant. 5:17). Jehová Dios Carmelo urcupi milagrocunata rurashca jipaca Acab runaca na cambiangapaj munarcachu. Jezabel huarmipash Eliasta huañuchichunmi mandarca. Eliasca chaita yachaj chayashpaca manllaimandami pacajushpa rirca. Shinapimi Eliasca ñana ushashpa Jehová Diostaca: “Huañungapami munani” nirca. Shinallata imapapash na sirvinshna sintirishpami: “Ñuca punda taitacunamanda yali ashtahuan alica na canichu” nirca. Shina nijpica Jehová Diosca paita ayudangapaca ¿imatata rurarca? Paitaca pacienciahuanmi uyarca. Chaimi Eliasca Jehová Diosmanga sololla sintirijushcata, manllaihuan cashcata ishcai viajecaman villarca. Eliasca paipa yuyaipica: “Yangami imatapash Jehová Diosmandaca rurashcani” yajurcami. Shinapash Jehová Diosca na pailla cashcata, paipa ñaupapi ninan valishca cashcata, paita sirvichun ashtahuan utilizanatapashmi villarca. Shinallata Jehová Diosca Eliasmanga shuj ayudajtami curca. Eliasca chai ayudaj runagutami paishnallata profeta cachun yachachigrijurca.
Asha tiempo jipaca Eliasca paipa ayudajtami mascangapaj rirca. Paita ayudaj runaguca Eliseomi carca. Chai punllamandaca ishcandimi nali gentecunapa chaupipi causashpapash, shinlli tiempocunapi causashpapash Jehovapa nishcacunata villashpa catirca. Eliseoca Eliasmandaca ashtahuan jovenmi carca. Paica Eliastaca ninandami ayudarca. Shinallata Eliasmandaca ashtacatami yachajurca. Jehovapa ayudahuanmi Eliasca cutinllata na manllashpa Jehovataca huañungacaman sirvishpa catirca.
Bibliapi ima nijta liipai
1 Reyes 16:29-33; 17:1-10a; 18:1–19:21
2 Reyes 3:11
¿Imatata nipanguiman?
Eliasca ¿imashinata na manllashcataca ricuchirca?
Ashtahuan informacionda mascapai
1. Eliasman micunaguta carangapaca Jehová Diosca cuervo nishca pajarocunatami cacharca. Chai pajarocunata cachanaca ¿imamandata ali carca? (it “Cuervo” párr. 5). A
Lior Kislev
Foto A
2. ¿Ima milagrocunatata Eliasca rurarca? (it “Elías” núm. 1 párr. 11).
3. Eliasca Carmelo urcupi Jehová Dioslla ciertopacha Dios cashcata ricuchingapaj cashpaca shuj jatun larcata rurashpami yacuta jundachichun mandarca. Chaquishca tiempopi causanajushpaca gentecunaca ¿maimandata yacutaca llujchirca? (ba 17 párr. 3). B
Todd Bolen/BiblePlaces.com
Foto B: Carmelo urcu y Mediterráneo shuti mar yacu.
4. Profeta Eliaspa jahualla churajunaca ¿imatata ricuchirca? Eliasca ¿imamandata chai churajunataca Eliseopa hombros jahuapi churarca? (w14 1/2 12 párr. 3).
Imata yachajushcapi pensaripai
Jehová Diosca Eliastaca ¿imashinata tratarca? Desanimarishca huauquipanigucuna ñucanchihuan parlana munaita charichunga ¿imashinata Jehovapa ejemplota catita ushapanchi? (1 Rey. 19:1-18). C
Foto C
Eliasca Eliseotaca paishnallata profeta tucuchunga cushijushpami yachachirca. Shuj huauquipanicunata yachachijushpa, imatapash rurachun mingashpaca ¿imashinata Eliaspa ejemplotaca catita ushapanchi?
¿Imashinata Eliaspa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Elías causarijpica ¿imatata paita tapungapaj munaiman?
Ashtahuan yachajupai
Elías paipa asignacionda pactachita ushachun Jehová Dios imashina shinllichishcata ricupai.
Profetacunaca pacienciata charishcatami siempre ricuchirca: Elías (1:19)
Elías Carmelo urcupi cashpa na manllashcamandaca jovengunaca ¿imatata yachajuita ushan?
“Jehová Diostalla adorana cashcatami ricuchirca” (“Actividades para estudiar la Biblia”, nishcata jw.org paginapi ricupangui)