Jehová Diosta familiahuan jatunyachipaichi

Imashinami cai folletopi ña yachajupashcangui quiquinba familiata quiquinda, Bibliapa consejocuna ayudanatami ña ricupashcangui. Jehová Diosca quiquin cushilla causachunmi munan. Chaimandami Taita Diosca cashna nin: Paita pundapi churashpa, paita alicachijpi o paitalla adorajpica, “canguna munashcataca jahuan jahuan” caramujushallami nishpa (Mateo 6:33). Taita Diosca quiquinba amigo cangapami munan. Chaimandami paihuan ali amigo cangapaca imagutapash rurana capangui. Taita Dioshuan ali amigo canaca tucuimanda yali alimi can (Mateo 22:37, 38).

1 JEHOVÁ DIOSMAN QUIMIRIPANGUI

BIBLIAPICA NINMI: “Cangunapaca Taitami casha. Cangunaca ñuca churicuna, ñuca ushicunami canguichi” nishpa, Jehová Diosmi shina nijun (2 Corintios 6:18). Taita Diosca quiquinba amigo cangapami munan. Chaipaca paita mañashpami ashtahuan quimiri ushapangui. Shinallata Jehová Diosca ninmi: “Mañanataca, na saquinachu canguichi” nishpa (1 Tesalonicenses 5:17). Ñucanchi pinacunata, ñucanchi shungu ucupi ima tiashcata villachunmi Taita Diosca munan (Filipenses 4:6). Familiahuan Jehová Diosta mañajpica, quiquingunapaca Taita Dios causaj shina cashcatami huahuacunaca cuenta japinga.

Diosta mañashpapash ¿imashinata paitaca uyashun? Bibliamanda librocunata, revistacunata liishpa, Bibliamanda yachajushpami Taita Diosta uyai ushashun (Salmo 1:1, 2). Imata yachajushcapi pensaripai (Salmo 77:11, 12). Diosta uyangapaca tandanajuicunaman rinapash minishtirishcami can (Salmo 122:1-4).

Shinallata Jehová Dioshuan ali cangapaca shuj gentecunamanbash paimanda villachinami capangui. Shina rurashpaca Diosman ashtahuan quimirijushcatami sintipangui (Mateo 28:19, 20).

CAITA RURAPANGUI:

• Bibliata liingapaj, Diosta mañangapajpash tiempoguta cada punlla llujchipangui

• Imapash yanga cosascunapi tiempota chingachinapa randica Diospa munaita pundapi churachun familiata ayudapangui

2 FAMILIAHUAN ADORANA TUTATA CHARIPAIa

BIBLIAPICA NINMI: Taita Diospaman quimirichi. Paipash cangunapaman quimiringami nishpa (Santiago 4:8). Familiahuan Adorana Tutata charingapaj ima punlla, ima horas canatami ricuna capangui (Génesis 18:19). Familiahuan Adorana Tutata charishca jahuapash, cada punlla Taita Diosta yarishpa, quiquinba familia Diospajman ashtahuan quimirichun ayudapangui. Bibliapica ninmi: Cai shimicunataca, ñanda purijushpa, huasipi cashpa, puñungapaj siririjushpa, jatarijushpapash, canba huahuacunaman cutin cutin yachachingui nishpa (Deuteronomio 6:6, 7). Punda tiempopi Diosta sirvij Josué shinami cana capangui, paica nircami: “Shina cajpipash ñucahuan, ñuca familiacunahuanga, Mandaj Diostami sirvishpa causashun” nishpa (Josué 24:15).

CAITA RURAPANGUI:

• Familiapi cada uno Diosman quimiringapaj ima minishtishcata ricushpami cutin cutin yachachina capangui