Bibliaca ¿ñucata ayudaita ushanllu?

¿IMATASHI RURANGUIMAN?

Caipi yuyapai: Davidca na rijsishca ñandami paipa carrohuan rijun. Callecunata, huasicunata ricushpaca Davidca, na rijsishca pushtupi chingashca cashcatami cuenta japin. Maipipashmi ñanda pandarishcanga.

Quiquin David cashpaca ¿imatata ruranguiman?

PENSARIPAI

¿Imatashi rurana cangui?:

1. Maiman rijushca pushtuman chayangapaca ¿nachu pitapash tapuna cangui?

2. Shuj mapa nishca dibujopi o GPS nishcapi ¿nachu mascana cangui?

3. Maiman rina ñanda taringacaman carrota manejashpa ¿rijunallacha cangui?

Cai último yuyaica nimamanda nalichu can.

Cati yuyaica, primero yuyaimanda ashata ashtahuan alillatami can. Chaipica mapa nishca dibujopi o GPS aparatopimi ñanda tari ushangui.

Bibliapash shinallatami quiquinda ayudai ushan.

Shuj librocunamanda ashtahuan jatushca libro caimandami Bibliaca ayudan:

• Imapash problemacunata charishpa aliguta pensarishpa rurachun.

• Quiquinllata imashina cajta ali yachashpa, ashtahuan ali cachun ayudan.

• Imashina ali causanatapashmi yachachin.

Ñucanchi Causaipa Minishtirishca Tapuicuna

Uchillamandapachami imacunatapash cashna tapui callarinchi:

• Cieloca ¿imashpata azul?

• Estrellacunataca ¿pita rurarca?

Jipamanga cai mundopi imacunalla tiashcamandami cashna tapui callarinchi:

• ¿Imashpata llaquicunata charinchi?

• ¿Imashpata huañunchi?

¿Cai tapuicunata Bibliapi yachajunalla cashcata yachanguichu?

Ashtaca gentecunaca ninmi, Bibliaca yanga gentecuna escribishcallami, punda tiempo gentecunapallami ali carianga. O na intindinallachu can nishpa. ¿Ciertopachachu shina can? ¿Ciertochu Bibliapica chaita yachachin? ¿Nali yachaimandacha shina nin?

Gentecunaca pensanmi, Bibliapimi nijun cai mundotaca Diosmi mandajun nishpa. ¿Ciertochu Bibliapica chaita yachachin? Cai mundoca llaquinaimi can. Tucui ladocunapimi gentecuna sufrijta ricunchi, ungüicuna, huañuicuna, pobrecuna, shuj llaquicunapash tianmi. ¿Juyaj Dioscha shina llaquicunata cachamun?

¿Cai mundota pi mandajujta yachangapaj munanguimanllu? Bibliapi ima nijushcata yachajushpaca cushijunguimi.

Imashinami ña yachajushcangui cai folletopa yuyaicunaca Bibliamanda japishcami can. Testigo de Jehovacunaca alimi yachan Biblia causaipi ayudai ushashcata. Shinallata, ‘Dios escribichishca Shimica, paillata yarichishpa escribishcami. Chai Shimicunaca yachachingapaj, nalicuna ali purichun rimangapaj, imatapash cashcatapacha rurashpa causachun yachachingapami ali’ can (2 Timoteo 3:16, 17). Punda tiempomanda libro cashpapash cunanbipash ninandami ayudan. Chaimandami cai libromanda yachajuna capangui.