Jacobca paipa huauquihuanmi ali tucun

Jehová Diosca Abrahanda, Isaacta imashina cuidashcashnallatami Jacobtapash cuidasha nishca carca. Jacobca Harán llactapimi causangapaj quidashcarca. Chaipi cazarashpami tauca huahuacunata charirca y paica charij charijpashmi tucurca.

Tiempo yalijpica Jehová Diosca Jacobtaca: “Canba punda taitacunapa y canba familiacuna causajuj llactaman tigrai” nirca. Shinami Jacobca paipa familiandi chai llactaman ri callarirca. Shina rinajujpimi paita sirvij runacuna shamushpaca: “Quiquinba huauqui quiquinda tuparingapami ña 400 jaricunahuan shamujun” nirca. Shina nijpimi Jacobca paitapash, paipa familiatapash Esaú llaquichinga yashpa ninanda manllarirca. Chaimi Jehová Diostaca: “Ñuca huauqui Esaupa maquimanda salvahuai” nishpa mañarca. Cayandi punllaca Jacobca ashtaca llamacunata, chivocunata, huagracunata, camellocunata, burrocunatapash Esauman carachunmi cacharca.

Chai tuta Jacob pailla quidashpami shuj angelta ricurca. Chai angelca Jacobhuanmi punllayangacaman macanajujurca. Jacob janga quidashpapash na shaijushpami macanajushpa catirca. Chaimi chai angelca: “Cacharihuai, ñamari punllayajun” nirca. Shinapash Jacobca: “Na cacharishachu, ñucata bendiciajpimi candaca cacharisha” nircami.

Chaimi chai angelca Jacobtaca bendiciarca. Shinami Jacobca paipa huauqui ama llaquichichun Jehová Dios cuidana cashcata cuenta japirca.

Chai punllaca Esaú 400 jaricunahuan shamujujtami Jacobca ricurca. Chaimi ñaupashpa Esauta tuparingapaj rirca. Esaú runagupaman chayashpaca 7 viajecamanmi urai cumurirca. Chaimi Esauca Jacobta ugllashpa ishcandi huacanajurca. Shinami paicunaca ali tucurca. ¿Jacob shina rurashcataca Jehová Diosca alicachircachu?

Chai jipaca Esaú runaguca paipa huasimanmi tigrarca. Cutin Jacobca paipa taitapa llactamanmi rirca. Jacobca 12 churicunatami charirca. Paicunaca: Rubén, Simeón, Leví, Judá, Dan, Neftalí, Gad, Aser, Isacar, Zabulón, José y Benjamín shuticunami carca. Huatacuna jipaca Jehová Diosca Jacobpa churi Joseta utilizashpami paipa llactata salvagrijurca. ¿Imashina salvashcata yachangapaj munanguichu?