Joseca siempremi Jehovata cazurca

Joseca Jacobpa casi último churimi carca. Paipa huauquicunaca Jacob runaguca Joseta ashtahuan juyashcata cuenta japishpami Josetaca na ricunayachishpa y envidiashpami ricun carca. Shuj punllaca Joseca shuj muscuita charishpami paipa huauquicunaman villarca. Chaita uyashpami paipa huauquicunaca Josepa ñaupapi cungurinatachu nijun nishpa pensarinajurca. Chaimi paicunaca Josetaca ashtahuan na ricunayachirca.

Shuj punllaca Josepa huauquicunaca Siquem llacta ladollapi michinajurca. Chaimandami Jacobca paipa churi Joseta paicunata ricuchun cacharca. José caruta shamujujta ricushpami paipa huauquicuna cashna ninajurca: ‘Ricuichi, muscuicunata parlashpa purijca ñami shamujun. Paita huañuchishunchi’. Chaimandami Joseta japishpa shuj jatun pozopi shitarca. Chaita ricushpami Judá runaca paipa huauquicunata: Ama huañuchichu, esclavo shina jatushpa cachashunchi nircami. Judá nishcata uyashpami, randishpa, jatushpa purij madianitacuna Egiptoman yalinajujpi Josetaca esclavotashna 20 siclos de platapa jaturca.

Jipamanga Josepa huauquicunaca paipa jahualla churajunata japishpami, shuj animalta huañuchishpa chai yahuarpi satirca. Chai jipaca Jacobman Josepa churajunata apashpami: “Caitami tariparcanchi. Por favor ricupai, si cai churajunaca quiquinba churipachu can o na can” ninajurca. Chaita ricushpami Jacobca “shuj millai animalmi paita atacashpa micuparianga” nircami. Chaimandami Jacobca llaqui llaqui carca. Paitaca ni pipash na cushichita usharcachu.

Madianitacuna Josehuan Egipto llactaman chayajpica, Faraonda sirvij Potifar runami Josetaca paipa esclavo cachun randirca. Shinapash Jehová Diosca siempremi Joseta cuidarca. Potifarca José alipacha trabajador cajta, paipi confiai ushashcatami cuenta japirca. Asha tiempo jipaca pai tucui ima charishcacunata José ricuchunmi mingarca.

Potifarpa huarmica José juyailla, shinlli cajta ricushpami cutin cutin ñucahuan puñushun nijurca. Shina nijujpica Joseca ¿imatata rurarca? Joseca nimamanda na chai huarmitaca uyarcachu. Chaimi cashna nirca: “Ñuca amoca tucuitami ñuca maquipi saquihuashca. Pero quiquinga, paipa huarmi cashcamandami ñucapaca prohibido capangui. Shinaca ¿imashamanda cai jatun nalitaca rurashayari? ¿Imashamanda Taita Diospa ñaupapipash pecadota rurashayari?”.

Shuj punllaca, Potifarpa huarmica Josetaca paipa ropamanda aisashpami paihuan puñuchun obligangapaj munarca. Shina nijujpimi Joseca calpashpa llujshirca. Shinapash Potifar huasiman chayajpica chai huarmica llullashpami: Josemi paihuan puñuchun obligangapaj munahuarca nirca. Chaita uyashpami Potifarca ninanda culirashpa Josetaca carcelpi vicharca. Shinapash Jehová Diosca Josetaca siempremi cuidarca.