Jehová Diosmi Joseta cuidarca

José carcelpi cajpica Egiptopi mandaj faraonga pipash na intindinalla muscuitami charirca. Chaimi faraonda sirvij shuj jarica, Josemi chai muscuitaca intindichita ushan nishpa villarca. Chaimi faraonga Joseta uchalla apamuichi nirca.

Chaimi faraonga Josemanga: ‘Shuj muscuitami charircani. ¿Chai muscui ima significadota charijtaca villaita ushahuanguichu?’ nishpami tapurca. Shina nijpi Joseca: ‘Egipto llactapica 7 huatacunatami ashtaca granocuna tianga. Chai jipaca 7 huatacunatami yarjai tiempo tianga’. Chaimi ‘Egipto llactapi pipash ama yarjaimanda huañuchunmi aliguta pensarinata yachaj, aliguta yachajushca runaguta mascashpa cozechacunata tandachichun paipa cargo saquina capangui’ nirca. Chaimi faraonga Josetaca: “Ñuca huasitaca canmi a cargo quidagringui. Ñuca llactapi gentecunaca candami tucuipi cazunga. Rey cashcamandaca solo ñucallami canda yalica ashtahuan importante casha” nircami. Shinapash faraón muscushcataca ¿imamandata Joseca yacharca? Jehová Dios ayudajpimi chai muscuicuna ima cajta yacharca.

Joseca 7 huatacunatami granocunata alichijurca. Jipamanga José villashca shinami yarjai tiempo chayamurca. Chaimi tucui ladomanda gentecuna granocunata randingapaj Egiptoman rinajurca. Chaipi ashtaca granocuna tiajta yachaj chayashpami Josepa taita Jacobca paipa 10 churicunata Egiptopi granocunata randichun cacharca.

Jacobpa churicunaca Joseta ricungapami rirca. Joseca paicunataca ñapashmi rijsirca. Shinapash Josepa huauquicunaca paitaca na rijsircachu. Chaimi José joven cashpa muscushca shina, paipa ñaupajpi urai cumurinajurca. Joseca paipa huauquicuna cambiashcata o na cambiashcata yachangapaj munashpami: “Cangunaca pacalla ricuchun cachamushcacunami canguichi. Ñucanchi llactata maita atacanalla cashcata ricungapami shamushcanguichi” nircami. Chaimi Josepa huauquicunaca nirca: ‘Ñucanchi amolla, na shinachu capan. Quiquinda sirvij ñucanchicunaca 12 huauquipuracunami capanchi. Ñucanchi taitaca Canaán alpacunapimi causajupan. Último huauquica ñucanchi taitahuanmi quidaparca. Cutin shuj huauquica huañushcami capan’. Shina nijpimi Joseca cashna nirca: Cangunapa último huauquita caiman apamujpillami cangunataca crisha. Chaimi paicunaca cutin taitapaman tigrarca.

Jacobpa familia grano illa quidajpimi, Jacobca paipa churicunata cutin Egiptoman randichun cacharca. Cai viajeca paipa último huauquitami pushashpa rirca. Joseca paipa huauquicuna imashina cajta yachangapami Benjaminba grano costalpi paipa copa de platata churarca. Shina rurashpami paicunataca shuashcanguichi nishpa juchachirca. Joseta sirvijcunaca Benjaminba costalpimi Josepa copa de platata tarirca. Chaita ricushpami Benjaminba huauquicunaca ninanda manllarishpa Josetaca “ñucanchitarapash castigahuai pero Benjamindaca ama imatapash rurapaichu” ninajurca.

Chaimi Joseca paipa huauquicuna ña cambiashcata ricushpa Joseca ninanda huacashpami: “Ñucaca Josemi cani. ¿Ñuca taitaca causajupanrachu?” nishpa tapurca. Chaimandami paipa huauquicunaca ninanda manllarinajurca. Shinapash Joseca: “Ñucata jatushcamandaca, ama nali sintirinajunguichichu. Porque Taita Diosmi gentecuna yarjaimanda ama huañuchun, ñucataca cangunata ñaupashpa shamuchun caiman cachamuhuashca”. Chaimi Joseca paipa huauquicunata “uchalla rishpa ñuca taitata caiman apamugripaichi” nircami.

Shinami Josepa huauquicunaca paicunapa taita Jacobman ima pasashcata villangapaj rirca. Villashca jipallami Egiptoman paicunapa taitata pusharca. Shinami ashtaca huatacuna yalishca jipa Joseca paipa taitahuan cutin tuparirca.