Josuetaca Jehová Diosmi agllarca

Ashtaca huatacunatami Moisesca israelitacunata ñaupaman pusharca. Pai ña ruculla caimandami huañuna punlla chayagrijurca. Chaimi Jehová Diosca Moisestaca: Israelitacunataca ñuca carasha nishca alpamanga na pushagringuichu. Shinapash israelitacunaman carasha nishca alpata can ricuchun saquishami nirca. Chaimi Moisesca Jehová Diosta: ‘Tandanajushca israelitacunata pushachun, shuj runata churapai’ nirca. Shina nijpimi Jehová Diosca: ‘Josuemi ñuca espirituta charin, paita pushamushpa paipa umapi canba maquita churai’ nirca.

Moisesca israelitacunataca: Ñucaca ñallami huañusha. Chaimi Jehová Diosca cangunata Canaán alpaman pushachun Josueta agllashca nircami. Shinallata Moisesca Josuetaca: “Ama manllaichu”. Jehová Diosca “candaca napacha saquingachu” nircami. Asha tiempo jipaca Moisesca ‘Nebo shuti urcumanmi vichai rirca’. Chaipimi Jehová Diosca ‘Abrahanman, Isaacman, Jacobman carasha nishpa juramentushca llactata’ ricuchirca. Moisesca 120 huatacunata charishpami huañurca.

Jehová Diosca Josuetaca: ‘Cunanga canbash y cai gentecunapash Río Jordanda yalishpa israelitacunaman ñuca carashca alpacunaman yaicuichi. Imashinami Moisesta ayudarcani, shinallatami candapash ayudasha. Ashtahuanbash Leytaca tutapash y punllapashmi liina cangui. Shinallata shinlli tucungui y ama manllaguichu. Porque ñucami canba Jehová Dios cani. Ñucami can maiman rijpipash canhuan casha’ nircami.

Josueca ishcai jaricunatami Jericó llactata ricuchun cacharca. Chaitaca chaishuj capitulopimi yachajushun. Chai ishcai jaricuna Jericó llactamanda tigramushpaca, Canaán llactaman yaicungapaca cunanmi ali can nircami. Chaimi cayandi punllaca Josueca israelitacunataca carpa huasicunata alzaichi nishpa mandarca. Pundapica sacerdotecunataca Arca del Pactota Río Jordanman apaichi nirca. Río Jordán junda junda cajpipash sacerdotecuna yacu manñaman chayashpa chaipi sarujhuanmi yacuca de golpe shayarirca. Chaimi sacerdotecunaca yacu chaquishca chaupicaman rishpa tucuilla israelitacuna yacuta yalingacaman shinlli shayanajurca. Imata yuyangui, chaita ricushpaca israelitacunaca Jehová Dios ¿Mar Rojopi rurashca milagrota yarircacha?

Ashtaca huatacuna jipami, israelitacunaca Jehová Dios carasha nishca alpaman chayarca. Ña chaiman chayashpaca pueblocunata, huasicunatami rurana carca. Shinallata uvascunata, imacunatapash tarpushpa, cosechashpami causana carca. Chai llactapica lechepash, mielpashmi tiarca.