Jefteca ¿imatata Jehovamanga prometirca?

Israelitacunaca cutinmi Jehovapa ñaupajpi nalita ruranajurca. Paicunaca yanga dioscunatami adorai callarirca. Shinapash chai yanga dioscunaca Ammón llactamanda gentecuna llaquichinajujpica na ayudarcachu. Chaimandami israelitacunaca ashtaca huatacunata ninanda sufrishpa causarca. Chaimi paicunaca Jehovata mañanajurca: ‘Pecadotamari rurashcanchi por favor ñucanchita salvahuai’ ninajurcami. Shinallata israelitacunaca, paicunapurapi tiaj shuj dioscunata anchuchishpami, Jehovata cutin sirvinajurca. Chaimi israelitacuna llaqui apanajujta ricushpa Jehová Diosca ninanda llaquirirca.

Israelitacunaca, ammonitacunahuan contrami carca. Chaimandami paicunahuan macanajungapaj rigrinajurca. Chaimi paicunata ñaupaman pushachun Jefté runata agllarca. Paica macanajunataca alimi yacharca. Jefteca Jehovataca nircami: ‘Ammonita gentecunata mishachun ayudajpi paicunahuan macanajushpa, imapash na pasashpa ali tigramushpaca, ñuca huasimanda ñucata chasquingapaj llujshij personataca canmanmi cupasha nishpami prometirca’. Jehová Diosca Jeftepa mañaita uyashpami ammonitacunataca paipa maquipi churarca.

Jefté macanajushpa tigrajujpica, paipa ‘shujlla ushimi panderetata huactashpa, bailashpa tuparingapaj Ilujshimurca’. Chaita ricushpaca Jefteca ¿imatashi rurarca? Paica Jehovaman imata cusha nishcata yarishpami cashna nirca: “Ñuca huahualla, canda caruta cachajuimandami shungupi ninandapacha llaquirini. Jehová Diosmanmi shuj promesata rurarcani”. Chaipaca candami Siló llactapi tiaj tabernáculo nishcapi sirvichun cachana tucuni nircami. Shina nijpimi ushiguca cashna nirca: “Ñuca papito, Jehová Diosman prometishcashna ñucahuan imata rurasha nishca cashpaca pactachipailla”. Shinapash: “Caigutallami mañangapaj munapani, nunca na cazarashpa quidana cashcamanda, ñuca amigacunahuan ishcai quillacunata urcucunapi huacangapaj richun saquihuai” nircami. Jeftepa ushiguca Jehovata tucuipi cazushpami paipa tucui causaipi tabernáculo nishcapi sirvirca. Chaimi paipa cumbacunaca cada huata paita visitangapaj Siló llactaman rin carca.