Sansón runataca Jehová Diosmi ayudarca

Israelitacunaca cutinmi yanga dioscunata adoranajurca. Chaimi Jehová Diosca paicunataca filisteocunapa maquipi saquirca. Shina cajpipash Manóah shinami, huaquin israelitacunaca Jehovata adoranajurca. Manoahpash, paipa huarmipash huahuacunataca na charircachu. Shuj punllaca Jehovami shuj angelta Manoahpa huarmiman cashna nichun mandarca: ‘Vijsayu tucushpami, shuj jari huahuaguta ungungui’. ‘Paimi israelcunataca, filisteocunapa maquimanda quishpichinga’. Paica ‘Taita Diospalla causaj nazareo nishcami canga’ nirca. ¿Picuna nazareo cashcata yachanguichu? Nazareocunaca Jehovatalla sirvingapaj agllashcacuna, ajchatapash na muchunachu carca.

Tiempohuanga ‘Manóah runapa huarmica, jari huahuaguta ungushpami, Sansón shutita’ churarca. Chai huahua viñajpica, Jehová Diosmi paimanga fuerzata curca. Chaimi paipa maquihuan shuj leonda huañuchirca. Shuj viajeca Sansón runaca 30 filisteocunatami huañuchirca. Shina huañuchichunga ni pipash na ayudarcachu. Chaimandami gentecunaca paita na ricunayachishpa, imashina huañuchinata ricunajurca. Shuj tutaca, Gaza shuti pueblopi Sansón puñujujpimi paipa contracunaca ‘tucui tuta pacalla chapanajurca’. Punllayajpimi paitaca huañuchishun ninajurcami. Chaimi ‘Sansón runaca, chaupi tuta jatarishpa chai pueblopa punguta Ilujchirca’. ‘Shina llujchishpaca, rigra jahuapi churashpami, Hebrón shuti pueblo urcuman apashpa vichai rirca’.

Chai jipaca filisteocunaca Dalila huarmipaman shamushpami cashna ninajurca: ‘Sansón imashpa ninan shinlli cajta, paita imashna mishai ushanata tapui. Chashna tapujpica, tucuicunami ashtaca culquita canman cushun’. Paitaca carcelpi vichangapami munanchi nishpa. Dalilaca chai culquita japinamandami filisteocuna nishcata rurarca. Sansón imamanda fuerzata charishcataca Dalilamanga na villangapaj munarcachu. Chai huarmi cutin cutin nirijujpillatami Sansonga cashna villarca “Ñucaca nacirishcamandapacha Taita Diosta sirvingapaj separashca nazareo cashcamandami ñuca ajchatapash nunca na muchushcani. Si ñuca ajchata muchunica fuerza illami quidasha. Chaimi shuj gentecunashna débil tucusha” nircami. Shina villashpaca Sansonga ¿alitachu rurarca?

Chai jipallami, Dalilaca filisteocunaman cashna nirca: Cai rato shamuichi, cunansi Sansonga tucuitami villahuashca nirca. Jipamanga ‘Dalila huarmica Sansonda paipa migllapi puñuchishca jipami Sansonba 7 trenzacunata muchuchun shuj runata cayarca. Chai jipaca, Dalilaca “Sansón filisteocunaca caipimi can” nishpami caparirca. Chaita uyashpa Sansón rijcharishpaca ñana fuerzata charishcatami cuenta japirca. Chaimi, ‘filisteocuna paita japishpaca, ñavita lluchishpa prezu churarca’.

Shuj punllaca ashtaca filisteocunami “Dagón shuti yanga diosman shuj jatun ofrendata cushpa celebrangapaj tandanajurca”. Chaimi cashna caparinajurca: “Ñucanchi diosmi, ñucanchipa contra Sansón runataca ñucanchi maquipi churashca. Sansonmanda burlaringapaj paita apamugrichi” nirca. Chai jipaca Sansonda ishcai pilar chaupipi shayachishpami ninanda burlarinajurca. Chaimi Sansón runaca cashna caparirca: “Taita Dioslla, cai viajella cutin fuerzata carahuai por favor”. Paipa ajcha cutin viñashca cajpimi ‘tucui ushaihuan chai ishcai pilarcunata faquirca’. Chaimi chai huasi urmashpa ‘filisteocunata, chaipi tucui gentecunatapash llapijpi’ huañurca. Sansonbashmi chaipi huañurca.