20 SANSÓN
Fuerza illa quidashpapash na manllashcatami ricuchirca
SANSONGA ciego cashpapash filisteo gentecuna paimanda burlarinajujta, paita rimanajujtami uyaita usharca. Sansonga ¿imamandata chashna llaquipi carca? Na aliguta pensarishpalla Taita Dios shinlli shinlli cachun imashina ayudashcata villashcamandami shina llaquipi carca. Chaita villashca jipaca paita japishpaca ciegota saquishpa, huatashpa, preso churashpami esclavota rurarca. Cunanga filisteocunaca paimanda burlarishpaca paipa Dios Jehovamandapashmi burlarinajushcanga. Sansonga paipa culpamandallata chashna llaquipi cashcataca alimi yacharca. Shinallata pai siempre na manllaj cashca cashpapash cunanga fuerza illami quidashcarca. Fuerza illa quidashpapash ¿na manllaj cashcataca cutin ricuchi ushagrijurcachu?
Sansonga 20 huatacunatami israelitacunapa juez cashcarca. Shinapash paica Barac, Gedeón, Jefté y shuj juezcunamandaca diferentemi carca. Chaishuj juezcunaca Taita Diospa contracunahuan macanajungapaca ashtaca soldadocunatami pushan carca. Cutin Sansonga paillami macanajungapaj rin carca. Jehová Diosca ashtaca ashtaca filisteocunata huañuchingapaca Sansondami utilizarca. Sansón imashina chaita rurai ushashcata ashtahuan yachangapaca pai nara nacirijpillata ima pasashcata ricupashun.
Shuj ángel shuj cusahuarmiman ricurishpami paicunamanga shuj churiguta charinata, chai churigu Sansón shuti cana cashcata y Jehová Dios chai churigu nazareo shina paipa tucui causaipi sirvichun munashcata villarca. Sansonga nazareo caimandami paipa ajchataca nunca na muchurin carca. Sansón nazareocunapa requisitocunata pactachijujpica Jehová Diosca ninan fuerzata carashpami paitaca bendiciarca. Chaimi shuj viajeca paipa maquihuanlla shuj leonda chaupishpa huañuchirca. Filisteocunahuanbashmi macanajuita usharca. Israelitacuna Jehovata sirvinata cutin saquishcamandami Jehová Diosca filisteocuna paicunata llaquichichun saquirca.
Shuj viajeca filisteocunata manllaimandami israelitacunallata Sansonda huatashpa paicunamanga entregarca. Shinapash Sansonga huatashca cabiacunataca lino puchatashnami fitirca. Chai jipaca shuj burro quijada tulluhuanmi mil filisteocunataca huañuchirca. Jipamanga Sansón Gaza llactapi cajpica paipa contracunaca punllayajpi paita huañuchingapaj munashpami tuta entero llactapa yaicuna pungupi shuyarca. Shinapash Sansonga chaupi tutata jatarishpami chai llactapa jatun pungutaca ishcai pilarcunandi tucuillata llujchishpa saquirca. Chaicunataca hombrospi churashpami más o menos 60 kilometrocuna caruta rishpa Hebrón llacta ñaupapi tiashca urcu jahuacaman aparishpa rirca.
Sansonga cutin cutinmi filisteocunataca misharca. Paica Jehovata ali sirvij runaguta mishangapaj Dagón y filisteocunapa shuj yanga dioscunapash nimata na rurai ushashcatami ricuchirca. Shinapash filisteocunaca Sansonda mishangapaca Dalila huarmitami utilizarca.
Sansonga Dalilamandami enamorarirca. Shinapash Dalilaca llulla, pailla beneficiaringapaj shujcunata umachij huarmimi carca. Filisteocunaca Sansón imamanda shinllipacha cashcata villachunmi Dalilamanga ashtaca culquita curca. Dalila cada punlla Sansonda tapujujpillami Sansonga ña shaijushpa imamanda shinllipacha cashcata paimanga villarca. Sansonga: “Ñuca ajchata muchujpica fuerza illa quidashpami caishuj runacunashna casha” nircami. Chai jipaca Sansón puñushpa quidajpimi Dalilaca paipa ajchata rutuchun shuj runata cayarca. Bibliapica: “Jehová Dios Sansonda saquijpimi, Sansonga fuerza illa quidarca” ninmi. Filisteocunaca ñapash yaicushpami paita japishpa ñavitapash llujchirca.
Filisteocunaca Sansondaca granocunata cutashpami trabajachirca. Chaita ruranaca shinllipachami carca. Filisteocunapa ashtahuan shinlli contra runaca cunanga paicunapa esclavomi tucushcarca. Chaimi filisteocunaca ninanda cushijunajushpa paicunapa yanga dios Dagonda adorangapaca shuj jatun fiestata rurarca. Chai fiestapica ashtaca ashtaca gentecunami shuj jatun templopi tandanajurca. Chai templopa terrazapillami más o menos 3 mil gentecuna cashcanga. Filisteocunaca Sansonmanda burlaringapaj munashpami carcelmanda llujchishpa chai templota charijuj ishcai jatun columnacunapa chaupipi churarca. Chai tiempopica Sansonba ajchaca cutinmi viñashcarca. Shinallata paica nalita rurashcamandaca arripintirishcami carca.
Sansonga pandarishcamandami carcelpi churai tucurca. Shinapash Jehovata difindingapami paipa ninan fuerzataca último viajeta utilizarca
Columnacunata tacarishca jipaca Sansonga Jehovataca: “Ñucata yarihuayari por favor. Taita Dioslla, cai viajella cutin fuerzata carahuai por favor” nishpami mañarca. Chai jipaca: “Filisteocunandimi huañugrini” nishpami caparirca. Sansón tucui fuerzahuan columnacunata tangajpimi columnacunaca cuyuri callarirca. Filisteocuna Sansón chai columnacunata urmachichun na jarcaita ushajpimi chai temploca chaipi tiashca tucui gentecunapa jahuapi urmarca. Sansonga paipa fuerzataca último viajemi ricuchirca. Sansonga paipa tucui causaipica Taita Diospa ashtaca contracunatami huañuchishcarca. Shinapash chai ratopillami chaita yali ashtahuan contracunata huañuchirca.
Ashtaca huatacuna jipaca apóstol Pabloca shinlli feta charij jaricunamanda, huarmicunamanda parlashpaca Sansonmandapashmi parlarca. Shinallata fuerza illa quidashpapashmi “fuerzayucuna tucurca” nishpaca na manllaj Sansón runagupipashmi pensarijushcanga (Heb. 11:32-34).
Bibliapi ima nijta liipai
¿Imatata nipanguiman?
Sansonga ¿imashinata na manllashcataca ricuchirca?
Ashtahuan informacionda mascapai
1. Sansonga huañushcacunata tacarishpapash ¿imamandata nazareo cashpa catita usharca? (w05 15/1 30, 31).
2. Sansón jatun punguta pilarcunandi Gaza llactamanda Hebrón llactacaman aparishpa ringapaca ¿imamandata Taita Diospa espíritu santota minishtirca? (w04 15/10 15 párrs. 7, 8). A
Dibujo A
3. ¿Imamandata Dalilaca talvez israelitami cashcanga nipanchi? (w05 15/3 28 párr. 3).
4. Hebreo shimipi Jueces 16:28pica Sansón shuj ñavimandalla vengaringapaj munashcatami ricuchin. Shina nishpaca ¿imatata ningapaj munarca? (it “Sansón” párr. 10).
Imata yachajushcapi pensaripai
Dalilaca na villai ushanata villachun cutin cutin nijushcamandami Sansonga pai yachangapaj munashcataca villarca. Ancianocunapash, paicunapa huarmigucunapash ¿imatata caimandaca yachajuita ushan? B
Foto B
Sansón nalita rurashca cajpipash jipamanga Jehová Diosca na crinayai ruraicunata rurachunmi Sansondaca ayudarca. Ñucanchi nalita rurashca cajpipash Jehová Diosta sirvishpa catichunga ¿imashinata Sansonba ejemploca ayudaita ushan?
¿Imashinata Sansonba ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Sansón causarijpica ¿imatata paita tapungapaj munaiman?
Ashtahuan yachajupai
Sansón imamanda shinllipacha cashcata quiquinba huahuacunaman yachachipai.
“Espíritu santomi Sansón fuerzata charichunga ayudan” (ijwis tema 14)
Sansonmandaca ¿imatata ashtahuan yachajuita ushapanchi?
“Sansón runagushna Jehová Diospi confiapashunchi” (w23.09 2-7)