Jonatanga Davidpa ali amigomi carca

Saulpa punda churica Jonatanmi carca. Paica na manllashpa ali macanajujmi carca. Jonatanmanda parlashpaca Davidca: ‘Jatun angatapash yali ñapash calpaj, leongunatapash yali shinllimi carca’ nircami. Shuj punllaca Jonatanga Filistea llactamanda soldadocuna loma jahuapi shayanajujta ricushpami, macanajuna espadata, escudota apashpa purij paita sirvij runataca: Paicunahuanga macanajushunllami. Shinapash chai filisteocuna ‘vichai shamuichilla nijpillami, paicunapaman vichai rishun’. Shinami Jehová Dios paicunata ñucanchi maquipi churashcata yachashun nirca. Chai jipaca filisteo runacunaca cashnami nirca: ‘Macanajungapaj vichai shamuichi’ nishpa. Chaimi Jonatanbash, paita sirvij runapash vichai rishpa ‘20 filisteo soldadocunata catishpa huañuchirca’.

Saulpa primer churi caimandami Saúl huañujpica, Jonatán israelitacunapa rey tucuna carca. Shinapash Saulpa jipa rey cachun, Jehová Dios Davidta agllashcataca Jonatanga alimi yacharca. Shinapash Jonatanga, Davidtaca na envidiarcachu. Chaipa randica Jonatanga, Davidhuan ali ali amigocuna tucushpami ishcandimi imapipash ayudarishun nishpa prometirirca. Ali amigocuna cashcata ricuchingapami ‘Jonatanga, jahualla pai churajushcata Ilujchishpa, paipa espadatapash, pai macanajuna arcotapash, pai chumbilirina caratapash Davidman cararca’.

Saúl huañuchingapaj munajpi David pacajushpa rijpica, Jonatanga Davidta ricungapaj rishpami: “Ama manllaichu, ñuca taitaca candaca na taringachu. Canmi Israel llactapa rey tucugringui. Cutin ñucaca candami apoyasha. Chaitaca ñuca taitaca alimi yachan” nircami. ¿Jonatanshna shuj ali amigota charingapaj munanguimanllu?

Jonatanga paipa amigo Davidta ayudanamandaca tauca viajemi paipa causaita peligropi churarca. Jonatanga paipa taita Saúl, Davidta huañuchingapaj munashcata yachashpaca Saultaca: ‘Quiquinda sirvij Davidtaca ima nalitapash na ruranachu capangui. Davidca quiquindaca ima nalitapash na rurashcachu’ nirca. Shina nijpica Saulca, Jonatanhuan ninandami culirarca. Huaquin huatacuna jipaca Saulpash, Jonatanbash shuj macanajuipimi ishcandi huañurca.

Jonatán huañushca jipaca Davidca Mefibóset shuti runagutami mascarca. Paica Jonatanba churimi carca. Mefibóset runaguta tarishpaca: ‘Canba taita Jonatanda juyashcamandami, candaca llaquishpa ayudasha. Canbash ñuca mezapimi tucui causaipi micushpa causangui’. Ñuca causaj huasipillatami causangui nircami. Shinami Davidca paipa amigo Jonatanda nunca na cungashcata ricuchirca.