Ali amigo cangapaca na manllashcatami ricuchina tucurca

ISHCAI jaricunaca armacunandimi shuj urcuta uchalla vitsanajurca. Paicunaca ashtaca filisteo soldadocunahuan macanajungapami rinajurca. Israel llactamanda primer rey Saulpa churimi ñaupashpa rijurca. Paica Jonatán shutimi carca. Huashataca na manllaj jovenmi Jonatanba armacunata apashpa catijurca. Jonatanga cai ayudantetaca: “Ashtacacunahuan o ashallacunahuanlla salvachunga Jehovataca imapash na jarcaita ushanllu” nishpami animashcarca. Jehová Diosca cai ishcai jaricunalla 20 soldadocunata huañuchichun ayudashpami Jonatanba shimicuna cabal cashcata ricuchirca. Chai jipaca Jehová Diosca shuj jatun macanajuipi israelitacuna filisteocunata mishachunmi ayudarca.

Cai historiahuanllami Jonatán na manllaj cashcata yachai ushapanchi. Pero paica ashtaca viajecunatami na manllaj cashcata ricuchirca. Shinallata Jonatanga pitapash yangata saquijca na carcachu. Por ejemplo, paipa taita Saultaca siempremi apoyarca. Shina cangapaca na manllaj canami minishtirin. Shinapash Saulca nali runa tucushpami Jehovatapash ñana cazurca. Chaimandami Jonatanga paipa taitata cazunapa randi Jehovata cazungapaca na manllaj cashcata ricuchina tucurca.

Jonatán más o menos 50 huatacunata charishpami Davidhuan amigo tucurca. Davidca Jonatanbaca 30 huatacuna jipami carca. Joven Davidca Filistea llactamanda jatun jatun Goliat shuti runata chairallami huañuchishca carca. Chaimi tucui gentecuna, rey Saulpash Davidtaca seguro alicachinajushcanga. Chaita ricushpaca Jonatanga ¿imashinashi sintirirca? Jonatanga na envidiashpa ricujurcachu. Chaipa randica, David ali macanajuita ushachunga paipa espadata, paipa arcota, paipa cinturondapashmi cararca. Jonatán arcota alipacha utilizan cashcamandami Davidman paipa arcota carashpaca shuj valishca regalota curca. Jonatán ashtaca huatacunata Davidpa mayor cashpapash: “Tucui causaipimi amigocuna cashun” nishpami juramenturca. Y chai prometishcataca siempremi pactachirca.

Saulpash Davidtaca callaripica ninandami juyarca. Shinapash Davidta envidiashpami paita na ricunayachi callarirca. Saulca paipa churi Jonatanbash Davidta na ricunayachichunmi munarca. Pero Jehová Dios Jonatanba randi David rey cachun agllajpipash Jonatanga Davidpa ali amigo cashpami catirca. Saúl Davidta huañuchingapaj munajpica Jonatanga Davidpa amigo cashcamandami difindirca. Chaita rurashpaca Jonatanga na manllaj cashcatami ricuchirca. Saúl ña mayorlla cashpapash macanajungapaca alipacha, shinllirami carca. Shuj viaje Jonatán Davidmanda alicachishpa parlajta uyashpaca Saulca paipa propio churi cajpipashmi shuj lanzahuan huañuchingapaj munarca. Chai lanza Jonatanbaman na chayajpipash paipa propio taita huañuchingapaj munashcamandami Jonatanga ninanda llaquirirca. Chai jipaca Jonatanga Davidpaman rishpami Saúl Davidta huañuchingapaj munashcata villarca. Shina rurashpaca ciertopacha ali amigo cashcatami ricuchirca. Shinallata Jonatanga paita imapash pasajpi paipa familiata cuidachunmi Davidtaca mañarca.

Saúl Davidta huañuchingapaj munajpimi Davidca pacajushpa rina tucurca. Saulca paipa soldadocunandimi Davidtaca catishpa rirca. Chaimandami Davidca shuj shuj pushtucunapi pacajuna tucurca. ¿Jonatanbashchu paicunahuan Davidta catishpa rirca? Bibliapica chaitaca na ninllu. Pero na shina rurariangachu. Shuj viajeca Jonatanga paipa amigo David maipi pacajushcata yachaj chayashpami paita ricungapaj rirca. Jonatanga ‘Jehová Diospi ashtahuan confiachun Davidta ayudangapami’ shina rurarca. Jonatanga Davidmanga: “Ama manllaichu, ñuca taitaca candaca na taringachu. Canmi Israel llactapa rey tucugringui. Cutin ñucaca candami apoyasha” nircami. Chai jipaca cai ishcai ali amigocuna despidirishpaca cutinga ñana tuparircachu.

Asha tiempo jipaca Jonatanga Saulta cumbashpami ashtaca filisteo soldadocunahuan macanajujurca. Shinami Jonatanga Jehovata na saquishcata ricuchirca. Shinapash chai tiempopica Saulca Jehovata saquishpami nalipacha tucushcarca. Paica hasta demoniocunahuan parlaj o yachaj huarmipamanbashmi rirca. Chaimandami Jehová Diosca Saulta ñana bendiciajurca. Saulca filisteo soldadocunahuan macanajushpaca diunavez chugrishcapachami quidarca. Chai jipaca paillatami huañuchirirca. Chai macanajuipica paipa quimsa churicunapashmi huañurca. Paicunapurapica Jonatanbashmi carca.

Paicuna huañujpica Davidca llaquillapachami carca. Llaquillapacha cashcata, paipa amigota ninanda juyashcata ricuchingapaca Davidca “El arco” nishca llaquilla canciondami escribirca. Jonatán huaquin huatacuna huashaman paipa arcota paiman carashcata yarishpami Davidca chai shutitaca churashcanga. Davidca: “Ñuca huauqui Jonatanlla, canmandaca ninan llaquimi cani. Candaca ninandami juyarcani” nishpami escribirca. Davidca Jonatanman imata rurasha nishcata pactachingapaca ña rey tucushpaca Jonatanba familiacunata mascashpami shuj suchu churiguta tarirca. Paica Mefibóset shutimi carca. Davidca Jerusalenman apashpami chai punllamandapacha paitaca cuidarca.

Bibliapi ima nijta liipai

• 1 Samuel 13:​2, 19-23; 14:​1-15; 16:21; 18:​1-9; 19:​4-6; 20:​1-42; 23:​16-18; 28:​6-8; 31:​1-6

• 2 Samuel 1:​17-27; 9:​1-7

¿Imatata nipanguiman?

Jonatanga ¿imashinata na manllashcataca ricuchirca?

Ashtahuan informacionda mascapai

1. 1. Filisteocunaca ¿picunata carca? (w95 1/2 31).

   Respuesta

2. 2. Bibliapi 1 Samuel 13:21​pa notapica “pim” shimimi ricurin. Chai shimica Biblia cabal cashcataca ¿imashinata ricuchin? (w05 15/3 29). A

   Respuesta

   

Todd Bolen/BiblePlaces.com

1. 4. “Jonatanba familiata cuidasha” nishcata pactachingapaca Davidca ¿imatata rurarca? (it “Mefibóset” núm. 2 párr. 1).

   Respuesta

Imata yachajushcapi pensaripai

• Jonatanga paipa taita Saultapash yalimi Jehová Diostaca ashtahuan cazurca. Ñucanchicunapash ¿ima situaciongunapita shujcunatapash yali Jehovata ashtahuan cazuna tucupanchiman? C

  Respuesta

  

• Jonatanba y Davidpa causaica ¿imatata yachachin...

  • ... ali amigo canamanda?

    Respuesta

  • ... humilde canamanda?

    Respuesta

  • ... shujcunata na yangata saquinamanda?

    Respuesta

• ¿Imashinata Jonatanba ejemplota catishpa na manllashcata ricuchita ushapangui?

  Respuesta

Ima pasashcapi pensaripai

• Cai historiaca Jehová Diosmandaca ¿imatata yachachihuan?

  Respuesta

• Cai historiaca Jehovapa voluntadhuan y Bibliapa temahuanga ¿imatata ricunata charin?

  Respuesta

• Jonatán causarijpica ¿imatata paita tapungapaj munaiman?

  Respuesta

Ashtahuan yachajupai

Jonatanhuan Davidhuan alipacha amigocuna cachunga ¿imata ayudarca? Ñucanchicunapash ¿imashinata alipacha amigocunata chari ushapanchi?

“Huauquipurashna juyarishpa catipashunchi” (w21.01 20-25)

Quiquinba huahuacuna Jonatanba causaimanda imata yachajuita ushashcata ricuchun ayudapai.

“Jonatán” (ficha de personaje bíblico nishcata jw.org paginapi ricupangui)