Jerusalén llactaca llaquichi tucurcami

Judá llactamanda gentecunaca Jehovata cutin cutin na cazushpami yanga dioscunata adoranajurca. Chai huatacunapica Jehová Diosca tauca profetacunata cachashpami paicunata ayudangapaj munarca. Shinapash gentecunaca na cazushpami profetacunataca asishpa ricun carca. Jehová Diosca yanga dioscunata adoranataca tucuchingapami munajurca. ¿Imashinashi tucuchigrijurca?

Babiloniamanda rey Nabucodonosorca shuj shuj llactacunatami mishajurca. Punda viaje Jerusalén llactata llaquichishpaca rey Joaquinda, paipa cati mandajcunata, macanajuita ali yachajcunata, imacunatapash rurashpa trabajajcunatapashmi Babilonia llactaman aparca. Shinallata Jehová Diospa templo huasimanda valishca cosascunatapashmi aparca. Chai jipaca Nabucodonosorca Judá llactata mandachunga Sedequiastami churarca.

Callaripica rey Sedequiasca, Nabucodonosortaca tucuipimi cazurca. Shinapash yanga profetacuna, Jerusalén llacta ladollacunapi causaj gentecunapash Sedequiastaca, Babilonia llactata mandajtaca na cazunachu cangui ninajurcami. Shina nijpimi Jeremiasca: Babiloniamanda reyta na cazujpica “gentecunaca espadahuan, yarjaihuan, jatun ungüihuanmi huañunga” nirca.

Ocho huatacuna jipaca rey Sedequiasca, Babiloniapa contrami shayarirca. Chaipaca Egipto llactamanda soldadocunatami ayudata mañarca. Chaimi Nabucodonosorca paipa soldadocunata Jerusalén llactata llaquichichun cacharca. Babilonia llactamanda soldadocunaca Jerusalenba muyundipimi carpacunata shayachirca. Chaimi Jeremiasca Sedequiastaca: ‘Babilonia llactamanda soldadocuna canda mishachun saquijpica canbash y canba pueblopash salvaringa. Na shina rurajpica Jerusalendapash rupachishpami, candapash preso apanga’ nirca. Shina nijpipash Sedequiasca Jehová nishcataca na cazurcachu. Chaimi paica: Ñucaca na mishachun saquishachu nirca.

Shuj huata chaupi jipaca Babiloniamanda soldadocunami Jerusalén llactapa jatun pircacunata utujurca. Chaita yaicushpami Jerusalén llactataca rupachirca. Shinallata Diospa templo huasita rupachirca, ashtaca gentecunata huañuchirca y ashtacacunataca preso aparca.

Sedequiasca Jerusalén llactamanda pacajushpa llujshircami. Shinapash Babiloniamanda soldadocuna Sedequiasta catishpa Jericó llacta ladopi japishpami rey Nabucodonosorpaman aparca. Chai jipaca rey Nabucodonosorca, Sedequías runapa churicunata, imashina huañuchijta ricuchunmi obligarca. Jipamanga ‘Sedequiastaca ishcandi ñavita llujchishpami’ preso churarca. Chaipimi Sedequiasca huañurca. Shinapash Jehová Diosca Judá llactamanda gentecunataca: ‘70 huatacuna pactajpica, cangunataca’ Jerusalén llactaman tigrachimushami nirca.

Babilonia llactaman apashca jovengunahuanga ¿imata pasagrijurca? ¿Jehovata tucuipichu cazushpa catigrinajurca?