Jesusca shuj huarmiguhuanmi parlarca

Pascua fiesta yalishca jipaca, Jesusca paipa discipulocunandimi Galilea llactaman cutin tigrarca. ‘Samaria llactapi tiaj Sicar shuti pueblomanmi chayarca’. Paipa discipulocuna pueblopi micunata randingapaj ringacamanmi Jesusca Jacobpa pozo nishca ladopi samangapaj tiarirca.

Chaipi tiajujpimi, Samaria llactamanda shuj huarmiguca, yacuta Ilujchingapaj shamurca. Chai huarmigutami Jesusca: “Yacuguta carahuai” nirca. Chai huarmiguca: “Ñucaca Samaria llactamandami capani. ¿Imashpata quiquinga judío cashpapash ñucataca yacuguta carahuai nijuhuangui?” nircami. Shina nijpimi Jesusca: Ñuca pi cashcata yachashpaca, quiquinrami ñucamanga yacuguta carahuai nishpa shamunguiman nirca. Chaimi chai huarmiguca: “¿Imashpata shina ningui?” “Quiquinga, yacuta llujchingapaca na imagutapash charinguica” nirca. Shina nijpimi Jesusca: “Ñuca carana yacugumanda ufiajcunaca, nunca más ñana yacunayachingachu” nirca. Chaimi chai huarmiguca: ‘Chai yacuta carahuailla’ nirca.

Chai huarmigutaca Jesusca: “Quiquinba cusata pushashpa caiman tigramugripai” nirca. Chaimi “chai huarmiguca, cusataca na charinichu” nirca. Shina nijpimi Jesusca: “Cusataca na charipanichu nishpaca cabaltami nijungui. Porque quiquinga 5 cusatami charishcangui. Shinapash cunanbi quiquinhuan causajuj jarica, na quiquinba cusachu can” nirca. Chaimi chai huarmiguca: ‘Quiquinga profetami capangui yarin. Ñucanchi punda taitamamacunaca, cai urcupimi Taita Diostaca adoran carca. Cutin judiocunaca Taita Diostaca Jerusalenbillami adorana canchi ninmi. Shinapash Cristo nishpa rijsishca Mesías shamunataca alimi yachapani. Pai shamushpami tucuita ñucanchimanga aliguta intindichinga’ nirca. Jesusca nipiman na villashcatami chai huarmigumanga villarca: Ñucami Mesías cani nirca.

Chai huarmica puebloman rishpami samaritanocunaman cashna villajurca: Jacuchi, shuj runaguta ricunguichi. Paica, ñuca tucui imata rurashpa causashcataca, tucuillatami yachashpa villahuarca. “¿Nacha paica Cristo can?” nirca.Shina nijpimi gentecunaca pozo yacu ladoman rishpa Jesús yachachijta uyanajurca.

Samaritanocunaca “Jesusta ricungapaj rishpa, ñucanchihuan caipi quidapayari nishpami roganajurca. Chaimi Jesusca ishcai punllata chaipi quidarca”. Chaipimi Jesús yachachijpi ashtaca gentecuna paipi crinajurca. Chai gentecunaca chai huarmitaca: “Ñana quiquin parlashcamandallachu crinchi. Sino ñucanchipacha uyaimandami, gentecuna salvarichunpai ayudanataca yachanchi” ninajurca.