Jesusca ashtacacunamanmi micunata caran

Huata 32​pi Pascua fiesta nara chayamujpimi apostolcunaca villachishpa Jesuspaman tigranajurca. Apostolcuna shaijushca cajpimi Jesusca shuj canoapi Betsaida puebloman samachun pushajurca. Ña chai puebloman chayanajushpaca, ashtaca gentecuna chaiman catishcatami Jesusca ricurca. Jesusca paipa apostolcunahuanlla cangapaj munashpapash gentecunataca juyaihuanmi chasquirca. Shinallata ungushcacunatapash jambirca y ashtaca cosascunatapashmi yachachirca. Tucui punllami Diospa Reinomanda gentecunaman yachachijurca. Ña chishajujpimi apostolcunaca Jesustaca: ‘Gentecunaca yarjachingamari, ladolla pueblocunapi imapash micunaguta randigrichun cachapayari’ nirca.

Chaimi Jesusca: “Paicunaca na rinachu can. Cangunami paicunamanga micunaguta carana capanguichi” nirca. Apostolcunaca Jesustaca: “Cai tucui gentecuna micuchunga ¿maipita tandagutaca randishunyari? nishpa tapunajurca. Chaimi Felipepash: Ashtaca culquita charishpapash tucuicunaman tandata randitaca na usharingachu nirca.

Shina nijpimi Jesusca: Micungapaca ¿imatata charinchi? nishpa tapurca. Chaimi Andresca: Caipica 5 tandagucunata, ishcai pescadogucunatallami charinchi”. Cai tucui gentecunaman carangapaca na pactangachu nirca. Chaita uyashpami Jesusca: Chaigutallapash caiman apamuichi nirca. Chai jipaca ‘gentecunataca 50, 50 tandanajushpa jihuapi tiarichun mandarca’. Chaipimi Jesusca 5 tandatapash, ishcai pescadotapash japishpa, jahua cieloman ricushpa Jehová Diosta mañarca. Jipamanga paipa apostolcunataca chai tandacunata y pescadocunatapash asha asha chaupishpa tucuilla gentecunaman carachunmi mandarca. “Chaipica cazi 5 mil jaricunami carca”. Shinallata ashtaca huarmicunapash y huahuacunapashmi na munangacaman micunajurca. “Chai jipaca 12 canasto jundatami puchushcataca tandachirca”. Chai milagroca alipachami carca.

Tucui gentecuna chaita ricushpaca Jesús paicunapa rey cachunmi munanajurca. Shinapash Jehová Diosca Jesús rey cachunga nara munarcachu. Chaitaca Jesusca alimi yacharca. Chaimi gentecunata paicunapa huasicunaman cacharca. Shinallata paipa apostolcunatapash Galilea cucha chimbaman richun mandarca. Chaimi paicunaca canoapi rirca. Cutin Jesusca paillami shuj urcuman rirca. ¿Imamandata Jesusca pailla rirca? Jesusca Jehová Diosta mañangapami pailla rirca. Jesusca ocupado cashpapash siempremi Jehová Diosta mañangapaj tiempota llujchin carca.