Jesusca yacu jahuatami purijun

Jesusca unguita charij gentecunatami jambirca y huañushca gentecunatapashmi causachita usharca. Shinallata huairata, tamiatapashmi jarcaita usharca. Urcupi Diosta mañashca jipaca, Jesusca mar de Galileapi ninanda huairahuan tamiajujtami ricurca. Shina ninanda tamiajujpimi apostolcunaca canoapi ritaca na ushanajurca. Chaimi Jesusca yacu jahuata purishpa canoaman quimirijurca. Apostolcunaca yacu jahuata shuj runa shamujujta ricushpami ninanda manllarinajurca. Chaimi Jesusca: “Ama manllaichichu. Ñucami cani” nirca.

Shina nijpimi Pedroca: “Señor Jesús, ciertopacha can cashpaca, yacu jahuata purishpa canbaman richun saquihuayari” nirca. Chaimi Jesusca, “shamuilla” nirca. Shina nijpimi Pedroca canoamanda uriajushpa, yacu jahuata purishpa Jesuspaman ri callarirca. Shinapash ninanda huairajujta ricushpami Pedroca ninanda manllarirca. Ña pambarijushpami, “Señor Jesús salvahuayari” nishpa caparirca. Chai ratomi Jesusca Pedrotaca maquimanda japishpa: “Na tucui shunguhuan crij runa. Imashpata dudajunguiyari” nirca.

Jesuspash, Pedropash canoapi vitsashca jipami huairaca casilla quidarca. Chaita ricushpaca apostolcunaca ¿imashinashi sintirirca? Paicunaca: ‘Canga ciertopacha Taita Diospa Churimi cangui’ nirca.

Jesusca shuj viajecunapashmi huairata y tamiata jarcashca carca. Shuj punllaca paipa apostolcunandi mar yacuta canoapi rinajupimi Jesusca puñushpa quidashcarca. Jesús puñujujpimi ninanda huairashpa tamiai callarirca. Shinallata canoapipash yacu jundai callarirca. Chaimi apostolcunaca Jesustaca: “Yachachij ayudahuayari, huañugrinchimari” nishpa caparinajurca. Shina ninajujpimi Jesusca jatarishpa, huairata y mar yacutapash “upallai, casilla cai” nirca. Chaimi huairapash, mar yacupash tucuilla casilla quidarca. Chai jipami Jesusca paicunataca: “¿Imamandata ninanda manllarinajunguichi? Taita Dios ayudanataca ¿nachu cringuichi?” nirca. Shina nijpimi paicunaca: “Paica ¿pipachata can yari? Huairapash y mar yacupash paitaca cazunllamari” ninajurca. Chaipimi apostolcunaca Jesuspi tucui shunguhuan confiashpaca, na manllana cashcata yachajurca.