1 ENOC
Taita Dioshuanmi purirca
ENOC runaguca pai causajuj tiempopi gentecunahuan diferente caimandami sololla sintirishcanga. Bibliapi chai tiempopi causanajuj gentecunamanda parlashpaca Enocmandallami cashna nin: “Taita Dioshuan purishpami catirca” nishpa. Enoc shuj yanga runalla cashpapash ¿imashinata Taita Dioshuan purita usharca? Enoc runagu na manllaj cashcamandaca ¿imatata yachajuita ushapanchi?
Enoc imata na rurashcata, shinallata imata rurashcata yachajushpami Taita Dioshuan purishcata yachai ushapanchi. Paica ¿imatata na rurarca? Paica pai causajuj tiempopi nali gentecunashnaca na cangapaj munarcachu. Adán y Evapa miraipuracunamandaca siete miraicuna jipami nacirirca. Chai tiempopi Adán ña rucu rucu cashpapash todavía causajurcarami. (“Punda taitacunapa punllacunamanda, juezcunapa punllacunacaman” línea de tiempo nishcata ricupangui). Cazi tucui gentecunami Taita Diosta na cazushpa Adán y Evapa ejemplota catishcarca. Adán y Evapa Caín shuti churicarin paipa propio huauqui Abeltami huañuchirca. Abel runaguca Taita Diosta tucui shungu crij primer personami carca. Cainba miraicunamanda huaquingunacarin paishnallata o paimanda yali ashtahuan nalicunami carca (Gén. 4:23, 24). Shinapash Enoc runaguca na manllaj cashcamandami nali gentecunapa ejemplotaca na catirca. Chaipa randica tranquilo, ali cashcamandami Taita Diosta cushichirca.
Enoc nara nacirijpillatami, “gentecunaca Jehová Diospa shutita utilizai callarirca” (Gén. 4:26). Shinapash Jehová Diosta adoranapa randica, paipa shutitaca na respetashpa yanga dioscunata adorangapami utilizan carca. Shina cajpipash Enocca Jehová Diospa shutita juyaimanda, tucui shunguhuan respetaimandami na paicunashna rurarca. Shinami diferentepacha cashcata ricuchirca.
Enoc predicashcata na uyangapaj munashpami nali gentecunaca paita huañuchingapaj munarca. Shinapash Jehová Diosca Enoctaca cuidarcami
Enoc runaguca ¿imatata rurarca? Jehová Diosca Enocmanga profeta cana importante asignaciondami mingarca. Jehová Diosca Enoc runagu pai causajuj tiempopi nali gentecunaman villachichunmi munarca. Chaimandami Enocca paipa asignacionda pactachingapapash na manllaj cashcata ricuchina carca. Shinapash chai nali gentecunamanga ¿imatata villachina carca? Paicunamanga: ‘Ricuichi, Jehová Diosca paipa ashtaca ashtaca angelcunahuanmi shamurca. Paicuna nalicunata rurashcamandami Taita Diosca [tucuicunata juzgangapaj] shina rurarca. Shinallata, Taita Diosta na respetajcuna, paita nalicachishpa o na ricunayachishpa rimaj pecadorcuna [cashcata ricuchingapami shamurca]’ nishpami villachina carca.
Enocca Jehová Dios nali gentecunata juzgashpa chai profeciata ña pactachishcatashnami parlarca. Shinaca Enocpa shimicunaca pactarinapachami carca. Enocpa shimicunaca gentecuna nalitapacha rurashcamanda Jehová Dios ninanda culira cashcatami ricuchirca. Enocca nali gentecuna Taita Diosta na respetashcataca cutin cutinmi nirca. Chaimandami chai gentecunaca Enoctaca seguro na ricunayachishcanga. Shina cajpipash Enocca Jehová Dios mingashca shimicunataca paicunamanga na manllashpami villachirca.
Chai shimicunata uyashpaca gentecunaca ¿imatata rurarca? Chaitaca na ali yachapanchichu. Pero Enocpa causaica peligropimi cashcanga. ¿Imashinata chaitaca yachapanchi? Bibliapica: “Paitaca nunca más ñana pipash ricurcachu. Porque paitaca Taita Diosmi apashcarca” ninmi. Nali gentecunaca Enocta catiriashpa llaquichingapami munashcanga. Shinapash Jehová Diosca paipa amigo Enocta llaquichichun o huañuchichunga na saquircachu. Chaipa randica, Jehová Diosca Enoc runaguta ninanda juyaimandami paita aparca. ‘Paita aparca’ nishpaca Jehová Dios Enocta peligrocunamanda jarcashpa, huañushpa puñujunshna samachun saquishcatami nijun. Shinami Enoctaca pipash ñana llaquichi ushana carca. Shinallata Jehová Dios paita yarishpami shuj punlla paita causachita ushanga.
Bibliapica: “Enoc nara apai tucujpillatami, Taita Diosca Enochuan cushijushca cashcata ricuchirca” ninmi. Shinaca Jehová Diosca Enocta nara apashpallatami shuj juyailla regaloguta caranshna shuj muscuipishna shamuj punllacunapi paraíso alpagupi shuj tranquilo, ali causaita chari ushanata ricuchishcanga. Chaimandami Enoc nara huañushpallata Jehová Dios paita juyashcata, shinallata shinlli feta charishcamanda, na manllaj cashcata ricuchishcamanda Jehová Dios paita bendiciashcataca seguro carca.
Bibliapi ima nijta liipai
¿Imatata nipanguiman?
Enocca ¿imashinata na manllashcataca ricuchirca?
Ashtahuan informacionda mascapai
1. Gentecunaca ¿imashinata Jehová Diospa shutita utilizai callarishcanga? (Gén. 4:26; w01 15/9 29 párr. 3).
2. Enoc runaguca Taita Diospa primer profetami carca. Paica ¿imatata rurarca? Paipa asignacionda pactachichunga ¿imata ayudarca? (w01 15/9 31 párr. 5).
3. Enoc runaguca nara profeta cashpallatami jipa punllacunapi na manllaj cashcata ricuchina tucunataca ña yachashcanga. ¿Imamandata shina nipanchi? (w06 1/10 19 párrs. 13, 14). A
Dibujo A
4. Huaquingunaca Enoc runagu jahua cieloman rishcatami crin. Chai na cierto cashcataca ¿imashata ricuchipanguiman? (Juan 3:13; Heb. 11:5, 13).
Imata yachajushcapi pensaripai
¿Ima situaciongunapita predicangapaca na manllana minishtiringa? Enocpa ejemploca ¿imashinata ñucanchitaca ayudan? B
Foto B
Jehová Dioshuan na manllashpa purijpica paica ¿imashinata sintirin? (Prov. 27:11; Heb. 11:5).
¿Imashinata Enocpa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Enoc causarijpica ¿imatata paita tapungapaj munaiman?
Ashtahuan yachajupai
Nali, millai gentecunapurapi causajujpica ¿imashinata Enocpa ejemploca quiquindaca ayudaita ushan?
Jehová Diospi ashtahuan feta charichun Enoc runaguta ima ayudashcata ricupai.
“Cai nali punllacunapi Taita Dioshuan puripashunchi” (w05 1/9 13-17)