21 SAMUEL
Jehová Dios imata nishcata na manllashpa villaj huahuagumi carca
SAMUELCA Jeftepa ushihuan, Sansonhuanga huaquin cosascunapimi parecido carca. Paicunapa taitamamacunapa rurashcacunamandaca cai jovengunapa causaica ninandami cambiarca. Samuelca Jeftepa ushigushnami paipa tucui causaipi Jehová Diosta sirvishpa causarca (1 Sam. 2:11). Shinallata Sansón runagushnallatami Samuelca paipa tucui causaipi nazareo carca (Juec. 13:7). Ashtahuanbash quimsandimi na manllashcata ricuchina tucurca.
Ana huarmiguca Samuelta ña chuchumanda partishpaca Jehovaman prometishcashnallatami Siló llactapi tiashca tabernáculo carpa huasipi Jehovata sirvishpa causachun Samueltaca aparca. Samuelca quimsa huatacunatami charishcanga. Shinapash Anaca paipa churiguta cada huata visitangapaj rishpaca mushuj ropaguta apashpami rin carca. Samuelca tabernáculo carpa huasipi sumo sacerdote Elihuanmi viñarca. Elica mayorllagumi carca. Tabernáculo carpa huasipi causaj huarmigucunaca talvez Samuel huahuaguta cuidashpami ayudashcanga.
Tabernáculo carpa huasipica jatun nalicunatami ruranajurca. Shina pasajushcamandaca Elipashmi culpata charirca. Paipa ishcai churicuna Hofní y Finehaspash nalipacha runacunami carca. Paicunaca tabernáculo carpa huasipi Jehovata sirvij huarmicunahuanmi huainayashpa causanajurca. Shinallata Jehová Diosman carana sacrificiocunatapash na respetashcatami ricuchinajurca. Gentecuna sacrificiocunata apajpica Hofní y Finehasca tabernáculo carpa huasipi ayudajcunata chai sacrificiocunapa ashtahuan ali partecunata Jehová Diosman carachun saquinapa randica, chaicunata shuachunmi mandashcanga. Elica paipa churicuna imata ruranajushcataca alimi yacharca. Shinapash paicunataca na shinllita tacurinllu carca. Chaimi paicunaca na cazurca. Chashna nalicunapa chaupipi causashpapash Samuel viñashpaca aliguta rurashcamandami Jehová Diospa y gentecunapa ñaupapi ali ricurirca. Siló llactapi nali cosascunata tucuchina horas chayajpica Jehová Diosca paipa nishcacunata villachunmi Samuel huambragutaca agllarca.
Shuj tutaca Samuelca pichari parlajujta uyashpami rijcharirca. Jehová Diosmi paitaca cayajushcarca. Shinapash Samuelca sumo sacerdote Elí paita cayajushcata pensashpami calpashpa rishpa: “¿Imata minishtipangui?” nirca. Elica mayorlla y ciegomi carca. Paica Samuelta na cayashca caimandami cutin puñugrichun cacharca. Chai jipaca ishcai viaje masmi shinallata pasarca. Elica ima pasajujta cuenta japishpami Samuelta cutin camaman cachashpa Jehová Dios cutin cayajpi imata ninatapash yachachirca. Samuelca: “Jehová Dios ñucaca quiquinba sirvijmi capani. Ñucaca uyajupanimi parlapailla” ninami carca. Samuelca Elí nishcashnallatami rurarca.
Jehová Diosca chuscu viajetami: “Samuel, Samuel” nishpa cayarca. Samuelca: “Ñucaca canda sirvijmi capani. Ñucaca uyajupanimi parlapailla” nircami. Chaipimi Jehová Diosca paihuan parlai callarirca. Jehová Diosca Samuelmanga: “Siló llactapi nalicunata ama rurashpa catichunga canmi ayudagringui” nircami. Shinallata Elipa churicuna nalicunata ruranajujpipash yangata saquishcamandami Elí castigai tucuna cashcata nirca. Jehová Diosca Elita, paipa nali churicunata, paipa shuj familiacunatapashmi castigagrijurca. Samuelca cai tucui nishcacunatami Elimanga villana carca.
Samuelca cutinmi siririrca. Shinapash Bibliapica cutin puñushpa quidashcataca na ninllu. Ña punllayajpica tabernáculo carpa huasipa patiopa pungucunata pascangapami jatarirca. “Samuelca Taita Dios imata villashcata Eliman villanataca manllajurcami”. Elica Samuelta cayashpami: “Taita Diosca ¿imatata nirca?” nishpa tapurca. Samuel manllajujtami cuenta japishcanga. Chaimandami: “Por favor tucuita villahuai” nirca.
Samuelca huahualla cashpapash Jehová Dios sumo sacerdote Elita castigagrijujtami villana carca
Jehová Dios imata nishcata Eliman villanaca Samuelpaca shinllipachami cashcanga. Samuelca Elitaca talvez paipa propio abuelotashnallatami respetan cashcanga. Imasha cashca cajpipash Elí Israel llactapi sumo sacerdote cashcamandami Samuelca paitaca ninanda respetarca. Shina cajpipash ‘Samuelca nimata na pacashpami tucuita Elimanga villarca’. Shinami Elica jatun llaqui japina cashcata yachaj chayarca. Shinapash Elí paipa churicuna nalicunata ama rurashpa catichun ayudashcataca nimaipi na villanllu.
Samuel na manllashcata ricuchishcamandaca Jehová Diosca ninandami bendiciarca. Bibliapica: “Jehová Diosca paitaca bendiciashpami catijurca” ninmi. Chai tiempopica Samuelca Jehová Diospa profetami tucurca. Y Samuel villashca tucui profeciacunami pactarirca. Tiempohuanga Elimanda y Elipa churicunamanda nishca Samuelpa tucuilla profeciacunami pactarirca. Jehová Diosca israelitacunata ñaupaman pushangapaca Samueltami utilizarca. Samuelca ashtaca huatacunatami profeta y juez shina Jehová Diostaca sirvirca. Samuelca huahua cashpallatami Jehová Diospa ayudahuan na manllanata yachajushcarca. Ña viñashpapash Jehovapa ayudahuanllatami ashtaca huatacunata na manllashcata ricuchishpa cushilla causarca.
Bibliapi ima nijta liipai
¿Imatata nipanguiman?
Samuelca ¿imashinata na manllashcataca ricuchirca?
Ashtahuan informacionda mascapai
1. Jehová Diospa tabernáculo carpa huasi tiashca Siló llactaca ¿imashinata carca? (w92 1/11 8, 9). A
Todd Bolen/BiblePlaces.com
Foto A: Ñaupa tiempopi tiashca Siló pushtu.
2. Samuelpa causaica tabernáculo carpa huasipica ¿imashinata carca? (ia 60-62 párrs. 9-13). B
Dibujo B
3. ¿Imamandata Bibliapica “Samuelca Jehová Diostaca nara ali rijsishcarcachu” nin? (1 Sam. 3:7; w02 15/12 8 párrs. 5, 6).
4. Elí runapa familiamanda parlaj profeciaca ¿imashinata pactarirca? (it “Elí, I” párrs. 5-7).
Imata yachajushcapi pensaripai
Jovengunaca Samuelpa ejemplota ricushpaca ¿imatata yachajuita ushapan...
... cazunamanda? (1 Sam. 3:5).
... shujcunata ayudanamanda y respetanamanda? (1 Sam. 3:6-10).
... mingashca responsabilidadcunata aliguta pactachinamanda? (1 Sam. 3:15). C
Foto C
¿Ima situaciongunapita jovengunaca ima ali cashcata difindingapaca talvez na manllashpa parlana tucunga? Paicunataca Samuelpa ejemploca ¿imashinata ayudaita ushan?
¿Imashinata Samuelpa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Samuel causarijpica ¿imatata paita tapungapaj munaiman?
Ashtahuan yachajupai
¿Ima pasajpita jovengunapash, mayorcunapash alita rurangapaca na manllashcata ricuchina tucunga?
Shuj gentecuna Taita Diosta na cazujpipash Samuelca alita ruranatami decidirca.
“Samuelca Jehová Diosta sirvinatami agllan” (ijwis tema 15)