24 ABIGAÍL
Shuj jatun llaqui tianatami jarcarca
ISHCAI runacuna culira cashcamandami Abigailca shuj difícil situacionbi carca. Paipa cusa Nabal runaca shujcunata nali trataj, imatapash na aliguta pensarishpa ruraj, nali runami carca. Cutin Davidca Jehová Diosta sirvij ali runagumi carca. Paica Israel llactapimi cati rey tucugrijurca. Nabalca nalicunata rurashpami Davidta culirachishcarca. Chaimandami Nabalhuan y Abigailhuan causajcunapash peligropi carca. Abigaíl juyalagu, aliguta pensarij huarmigu cashpapash cai situacionbi pipash ama llaquichi tucuchunga na manllaj cashcatapashmi ricuchina tucurca.
Abigailca paipa sirvij villashcamandami ima llaqui tiagrijujtaca yachaj chayarca. Davidca paipa 400 soldadocunahuanmi Nabalta y “paipa huasipi tucui causajcunata” huañuchingapaj rijurca. ¿Imamandata chaita ruragrijurca? Davidca Nabaltaca paiman micunaguta carachunmi mañashcarca. Y shina rurashpaca na yapata mañashcarcachu. Porque Davidpash y paipa soldadocunapash Nabalta, paipa michijcunata y paipa llamagucunata ama imapash pasachunmi cuidashca carca. Rey Saúl Davidta yangamanda catijpipash Davidca israelitacunataca shuacunamanda, llactata japingapaj munajcunamandami difindirca. Shina rurajujpipash David Nabalta micunaguta mañajpica Nabalca Davidta y paipa soldadocunatapashmi nalicachishpa caparishpa rimarca. Shinallata Davidmanda parlashpaca: “Paica yanga sirvientellamari, paipa amomanda escaparishpami purijun” nircami.
Nabalpa sirvijca Nabal na cambianataca alimi yacharca. Chaimandami: “Nabalca millanai runamari, paihuanga parlaitallapash na parlai usharinllu” nirca. Shinapash Abigaíl paita uyashpa, aliguta pensarishpa imatapash ruranataca chai sirvijca alimi yacharca. Shinaca Abigaíl imata rurashcata ricupashunchi.
Abigailca na turbarircachu. Chaipa randica, Davidman y paipa soldadocunaman carangapami ashtaca micunaguta uchalla tandachirca. Chai tucui micunacunata burrocunapa jahuapi apachishpami paipa sirvijcunataca chai regalocunahuan ñaupashpa richun mandarca. Abigailca paipa propio burropimi paicunata catishpa rirca. Shinapash alita rurachun Nabal talvez jarcanata yachaimandami paimanga nimata na villarca.
Abigailpa cusa juizu illa cashcamandami Davidta y paipa soldadocunata culirachirca. Shinapash Abigailca na manllashpami paicunata tuparingapaj rirca
Abigailca urcutami pacalla urai rijurca. Chaimandami David y paipa soldadocunapash Abigailpaman quimirinajushpapash paitaca nara ricui usharca. Shinapash ña tuparishpaca ¿imata pasarca? Abigailca burromanda ñapash uriajushpami Davidpaman rirca. Davidca culirapachami carca. Shinapash Abigailca Davidpa ñaupapi alpacaman cumurishpami paita uyachun rogarca. Abigaíl shina humildepacha cashcata ricushpami Davidca paita uyangapaj munarca.
Abigailca: “Ñucata culpahuai” nishpami rogarca. Shinallata Nabal juizu illa cashcamanda David culiraringapaj razonda charishcatami Abigailca reconocirca. Ashtahuanbash Abigailca David Jehová Diospi shinlli feta charishcatami yarichirca. Chaimi na culpata charij gentecunata huañuchichun y chaita rurashcamanda arripintirishpa, llaquilla causachun Jehová Dios na munashcata nirca. Shinallata Abigailca Davidmanga Jehová Dios mandana autoridadta paiman cunata, paipa familiamandacuna reycunashna mandashpa catinata y paipa contracunata mishanatami nirca. Shinaca Abigailca Jehová Dios Israel llactapi cati rey cachun Davidta agllashcataca alimi yacharca.
Abigaíl ali pensarishpa aliguman parlashcamandami Davidca ñana culira carca. Chaimi Davidca: “Israel llactapa Jehová Dios alabai tucushca cachun. Porque paimi cai punllaca ñucahuan tuparichun candaca cachamushca” nirca. Shinallata aliguta pensarishpa imatapash ruraj cashcamandami Abigailtaca alicachirca. Ashtahuangarin Abigailpa consejotaca alicachishpa, na jariyashpami chasquirca. Chaimandami Davidca: “Can nishcataca uyashcanimi. Can imata mañashcataca rurashallami” nirca.
Nabalca ima pasashcataca nimata na yacharcachu. Chai tutaca Nabalca shuj fiestata rurashpami “machashcapacha” quidarca. Chaimandami Abigailca pacaringacaman shuyashpa Nabal ña maillayajpi tucuita villarca. Abigailca: “Nabalca ñucata rimashpa, macaitapashmi macahuanga” yashpami pensarianga. Shinapash chaipa randica, Nabalca ‘huañushcashnami quidarca. Paipa cuerpopash shuj rumishnami ñana cuyurirca’. “Jehová Diosca 10 punllacuna jipami Nabaltaca huañuchirca”. Jehová Diosca David rey cachunmi agllashcarca. Shinaca Nabal Davidta nali tratashcamandami Jehová Diosca Nabaltaca shina castigarca. Shinallata nali cusahuan ñana causashpa catichun ayudashpami Abigailtaca bendiciarca.
Pero Jehová Diosca Abigailtaca ashtahuanmi bendiciagrijurca. Davidca Nabal huañushcata yachaj chayashpaca Abigailtaca paihuan cazarachunmi mañarca. Abigailca ari nircami. Callaripica Davidca Judá llactapa reymi tucurca. Shinapash jipamanga tucuilla Israel llactapimi rey shina mandarca. Ña rey cashpami Abigailhuan shuj churita charirca. Shuj viajeca israelitacunapa contracunaca Abigailta apashpami rirca. Davidca na manllaj, ali cusa cashcamandami jaicata paita salvangapaj rirca.
Bibliapi ima nijta liipai
¿Imatata nipanguiman?
Abigailca ¿imashinata na manllashcataca ricuchirca?
Ashtahuan informacionda mascapai
1. ¿Imamandata Abigailca Nabal runahuanga cazarashcanga? (ia 77 párr. 6).
2. Davidca Nabaltaca llamacunapa milmata rutunajuj tiempopimi micunaguta mañarca. Chai tiempopica gentecunaca ¿imatata ruran carca? (w97 1/7 14 párr. 4). A
Dibujo A: Llamacunapa milmata rutuna tiempopica jatun cushijuimi tiarca.
Dibujo A: Llamacunapa milmata rutuna tiempopica jatun cushijuimi tiarca
3. Nabalca ¿imamandata Davidta y paipa soldadocunataca agradicina carca? (ia 77, 78 párrs. 9, 10). B
Hanan Isachar/Alamy Stock Photo
Foto B: Carmelo llacta muyundi alpacunaca chaquishca, pata y pugrumi carca.
4. 1 Samuel 25:29pa notapi shimicunata nishpaca Abigailca ¿imatata ningapaj munarca? (it “Vida” párr. 45).
Imata yachajushcapi pensaripai
Davidca Abigailpa consejotami catirca. Cusacunaca David rurashcamandaca ¿imatata yachajuita ushan? C
Foto C
Panigucuna Jehová Diosta na sirvij cusahuan cazarashca cashpaca Abigailmandaca ¿imatata yachajuita ushan?
¿Imashinata Abigailpa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Abigaíl causarijpica ¿imatata paita tapungapaj munaiman?
Ashtahuan yachajupai
Shuj huauqui o shuj panigu na Testigo cusahuan o huarmihuan ashtahuan ali causangapaca ¿imatata ruraita ushan?
Abigailca David controlarichunmi ayudarca. Ñucanchita pipash culirachijpi imashina controlarita ushashcata ricupai.
“Ama ñapash culirangapaca aliguta pensarinami capanchi” (w14 1/12 12, 13)