¿Parlajunallachu capanchi?

1. Eclesiastés 3:7​pica ¿imatata yachachin?

HUAQUIN huauquipanicunaca parlanajunllami. Cutin huaquingunaca parlanataca na yapata gushtanllu. Imashinami cai temapa textopica ricuchin, parlangapaj o na parlangapapash shuj tiempomi chayan (Eclesiastés 3:7, liingui). Huaquinbica huaquin huauquipanicuna ashtahuan parlachunmi munapanchi. Cutin huaquingunaca ama yapata parlajuchunmi munapanchi.

2. Jehová Diosca parlai ushachunmi rurashca, shinaca ¿imatata paica yachachin?

² Ñucanchitaca parlai ushachunmi Jehová Diosca rurashca (Éx. 4:10, 11; Apoc. 4:11). Chaimi Bibliapica imashina, imahora parlana cashcata Jehová Diosca yachachin. Cai temapica punda tiempopi causashca Jehovata sirvijcunamandami imahora parlana o na parlana cashcata yachajupashun. Shinallata ñucanchi parlocunamanda Jehová Dios imata yuyajtapashmi yachajupashun. Cunanga imahora parlana cashcatami yachajugripanchi.

¿IMAHORATA PARLANA CAPANCHI?

3. Romanos 10:14​pi nishca shinaca Jehová Diosmanda, paipa Reinomandapash ¿imahorata parlana capanchi?

³ Jehová Diosmanda, paipa Reinomandapash siempremi parlana capanchi (Mat. 24:14; Romanos 10:14, liingui). Shinami Jesuspa chaquita catijushcata ricuchipashun. Jesús cai Alpaman shamushpaca paipa Taitamandami yachachishpa purirca (Juan 18:37). Ñucanchicunaca pihuanbash parlajushpaca respetohuan parlana cashcatami yarina capanchi. Shinallata Jehová Diosmanda parlajushpaca ‘pipash tapuchijpi, ama jariyashpa ali shunguhuan tigrachingapami’ gentecunapa imata crishcata, imata pensashcatapash ali ali ricuna capanchi (1 Ped. 3:15). Villachinajushpa intindirinalla shimicunahuan parlashpaca gentecunapa shungumanmi chayai ushapashun.

4. Proverbios 9:9​pi nishca shinaca ¿imashinata anciano huauquicunaca consejana can?

⁴ Anciano huauquicunaca shuj huauqui o shuj pani imapash consejota minishtijujta ricushpaca uchallami consejana can. Shinapash shuj huauquipanicunapa ñaupajpica na consejanachu can. Shinami paicunataca na pingaipi saquinga. Shinallata pitapash consejajushpaca anciano huauquicunaca respetohuanmi siempre parlana can. Shinapash Bibliapa yachachishcacunahuanmi paicunataca consejashpa ayudana can (Proverbios 9:9, liingui). Parlana cajpica ¿imamandata huauquipanicunahuanga na manllashpa, respetohuan parlanalla capanchi? Chaipaca cai ishcai ejemplocunamanda yachajupashun. Paicunaca na igual pensanllu carca. Pundapica Elí jarimandami yachajupashun. Paica paipa ishcai churicunataca na tacurinllu carca. Jipaca Abigaíl huarmigumandami yachajupashun. Paica Taita Diosta sirvij shuj reyhuanmi parlana carca.

5. Sumo sacerdote Elica paipa churicunata tacurishpapash ¿imatata na rurarca?

⁵ Elí jarica sumo sacerdotemi carca. Paica ishcai churicunatami charirca. Paicunataca ninandami juyan carca. Elipa churicunaca Jehová Diostaca na respetanllu carca. Paicunaca tabernáculo carpa huasipimi sacerdotecuna carca. Sacerdotecuna cashpapash shuj shuj huarmicunahuanmi huainayana juchapi urmanajurca. Shinallata Jehovaman carashca sacrificiocunatapash yangatami ricun carca (1 Sam. 2:12-17, 22). Moisesman cushca Leypica Elipa churicunaca huañunami carca. Shinapash Elí jarica paicunata tacurishpapash, nima nimata na rurarcachu. Ashtahuangarin Jehovapa tabernáculo carpa huasipi sacerdotecuna cashpa catichunmi saquirca (Deut. 21:18-21). Chaita ricushpaca Jehová Diosca Elí jaritaca cashnami nirca: “Cambaj churicunatara ñucatapash yali alicachishpami” ricushcangui nishpa. Chaimi Jehová Diosca, paicunaca huañungami nirca (1 Sam. 2:29, 34).

6. ¿Sumo sacerdote Elishnachu cangapaj munapanchi?

⁶ ¿Sumo sacerdote Elishnachu cangapaj munapanchi? Ñucanchicunaca shuj familia o shuj huauqui o pani imapash juchata rurashcata yachaj chayashpaca uchallami paicunahuan parlana capanchi. Shinallata Bibliapi nishcashnami imata ruranatapash yarichina capanchi. Chai jipaca Jehovapa agllashca huauquicunahuan parlachunmi animana capanchi (Sant. 5:14). Ñucanchicunaca Elí jarishna cangapaca na munapanchichu. Familiata o shuj huauquita o shuj panita alicachinapa randica Jehová Diostami ashtahuan alicachina capanchi. Chaimandami pandarigrijuj familiahuan o pandarigrijuj shuj huauquihuan o panihuanga na manllashpa parlanalla capanchi. Paicunahuan parlashpaca paicunatallatami ayudashun. Cunanga Abigaíl huarmigumanda yachajupashunchi.

7. Abigailca ¿imatata rurarca?

⁷ Abigailca Nabal jaripa huarmigumi carca. Nabal jarica charij charijmi carca. Davidpash paita sirvijcunapash rey Saulmandami pacajushpa rinajurca. Shina pacajushpa rinajushpami Davidca Nabalpa sirvijcunata, Nabalpa animalcunatapash ama shuhuachun cuidashpa ayudarca. Shina cuidashpa ayudashcajpipash Nabalca na Davidta agradicircachu. Chaipa randica yacuta, micunata Davidpa sirvijcuna mañangapaj rijpica Nabalca ushashcata culirashpami plitushpa cacharca (1 Sam. 25:5-8, 10-12, 14). Chaita uyashpami Davidca ninanda culirashpa Nabalta, paita sirvijcunatapash huañuchingapaj rijurca (1 Sam. 25:13, 22). Chai llaqui ama pasachunga Abigailca ¿imatata rurarca? Abigailca chai rato parlana cashcatami cuenta japirca. Chaimandami na manllashpa Davidhuan, paipa 400 sirvij jaricunahuanbash uchashpa parlangapaj rirca.

8. Abigaíl huarmigumandaca ¿imatata yachajupanchi?

⁸ Abigailca na manllashpa, respetohuanmi, ama nalitaca ruraichu nishpa Davidtaca nirca. Abigaíl culpata na charishpapash pairami Davidtaca perdonahuai nirca. Quiquinga ali cualidadcunatami charipangui, ama chai llaquitaca ruraichu nircapashmi. Abigailca, Jehová Dios ayudanataca segurapachami carca (1 Sam. 25:24, 26, 28, 33, 34). Abigailshnallatami ñucanchicunapash pipash nalita ruragrijujpica na manllashpa, uchalla paicunahuanga respetohuan parlanalla capanchi (Sal. 141:5). Paicunahuan uchalla parlashpaca paicunata juyashcata, paicunapa ali amigocuna cashcatapashmi ricuchipashun (Prov. 27:17).

9, 10. Anciano huauquicunaca ¿imashinata shujcunataca consejana can?

⁹ Shuj huauqui o shuj pani pandarishca cajpica, huauqui ancianocunaca na manllashpa, respetohuanmi paihuanga parlanalla can (Gál. 6:1). Huauqui ancianocunaca humildecuna caimandami paicunapash pandarijlla cashcataca ali yachan. Shinallata imahorapash paicunatapash consejachun minishtinataca alimi yachan. Pero shuj huauqui o shuj pani pandarishcata yachaj chayashpaca, pandarishcanguimi nishpa consejanataca na saquinllu (2 Tim. 4:2; Tito 1:9). Anciano huauquicunaca pitapash consejajushpaca juyaihuan, na culirashpami consejan. Shina rurashpaca paicunata juyashcata, ayudangapaj munashcatami ricuchin (Prov. 13:24). Anciano huauquicunaca Jehová Diospa mandashcacunata cazushpami Jehovata alicachishcata ricuchin. Shinallata congregacionbi huauquipanicuna ali cachunmi munan (Hech. 20:28).

¹⁰ Caicamanga imahora parlana cashcatami yachajupashcanchi. Cutin cunanga imahora na parlana cashcatami yachajupashun. Shinapash chaita ruranaca ¿facilchu can?

¿IMAHORATA UPALLA QUEDANA CAPANCHI?

11. Discípulo Santiagoca ¿ima chimbapuraitata churarca?

¹¹ Huaquinbica ñucanchica yapatami parlanchilla. Chaimandami discípulo Santiagoca shuj chimbapuraita churashpa cashna nirca: “Maijan runapash na pandata parlashpa na llaquichij cashpaca, ima pandatapash na ruraj cashpami, paipaj cuerpotapash jarcari ushan” nishpa (Sant. 3:2, 3). Shuj caballotaca umapi, shimi quirucunapipashmi shuj cabiata huatan. Shinami caballo jahuapi tiajuj cabiata ashata aisachijpica caballotaca maiman ringapaj munashcaman apaita ushan. Shinapash caballopa cabiata cacharishpaca, yangatami caballoca calpashpa ringa. Chaimi caballopash, caballopi tiajujpash llaqui apaita ushan. Shina cuendami ñucanchicunapash yangata na pensarishpa imatapash parlashpaca pitapash llaquichita ushapanchi. Cunanga imahora upalla quedana cashcata yachajugripanchi.

12. ¿Imamandata na tapuchijunalla capanchi?

¹² Shuj huauqui o shuj pani imapash na villana cashcata yachashcanman. ¿Ñucanchica yachangapaj munaimandalla tapuchijunachu capanchi? Por ejemplo, villachinata, tandanajunata prohibishca llactamanda shuj huauquita o panita rijsishpaca, chai llactapica imashinata villachinguichi, imashinata tandanajunguichi nishpa tapungapaj munapashcanchiman. Paicunata llaquichina munaimandaca na shina tapuchinchimanllu. Paicunata juyaimanda, preocuparimanda o paicunamanda mañangapaj munaimandami shina tapuchinchiman. Shinapash chaicunamandaca na tapuchijunachu capanchi. Cutin cutin tapuchijushpaca paicunata na juyashcata, paipi confiajcunatapash na respetashcatami ricuchinajunchiman. Villachinata, tandanajunata na saquij llactacunapi causaj huauquipanicunataca na llaquichingapaca munapanchichu. Shinallata chai llactacunapi causaj huauquipanicunaca imata yachashpapash nipiman na parlangapaj munanllu.

13. a) Proverbios 11:13​pi nishca shinaca ¿imatata ancianocunaca rurana can? b) ¿Imamandata shina rurana can?

¹³ Proverbios 11:13​pi nishca shimicunataca anciano huauquicunami ashtahuanbachaca pactachina can (chai textota liipangui). Ancianocunaca congregacionbi ima pasashcataca shujcunamanga na parlanllu. Caita pactachinaca cazado ancianocunapaca ashtahuan shinllimi can. Cusahuarmicunaca ishcandimandami imagutapash tapurin, parlarin, preocuparin. Shinapash ancianocunaca congregacionbi huauquipanicunahuan ima pasashcataca ‘na parlanllu’. Chaicunata parlajushpaca, paicunallatami nalipi quedanga o pingaipi quedanga. Shinallata shujcunapash ñana paipica confiangachu. Anciano huauquicunaca “imata parlashcatapash na shujman yalichij” canachu can (1 Tim. 3:8). Paicunaca na chismosocunachu cana can. Shuj anciano huauquica paipa huarmiguta juyashpapash, congregacionbi ima pasashcataca na parlajunachu can.

14. Ancianocuna ali ricurichunga ¿imashinata paicunapa huarmigucunaca ayudaita ushan?

¹⁴ Ancianocunataca paicunapa huarmicunapashmi paicuna ali ricurichunga ayudaita ushan. Huarmigucunaca congregacionbi huauquipanicunahuan ima pasashcataca na cutin cutin tapuchijunachu can. Shinami paipa cusata apoyashcata, paipa cusapi confiajcunatapash respetashcata ricuchin. Ancianocunapa huarmigucuna caicunata rurashpaca congregacionbi tucuicunallata shujlla shina tranquilo cashpa catichunmi ayudaita ushan. Shinami paicunaca Jehová Diosta cushichin (Rom. 14:19).

ÑUCANCHI PARLOCUNAMANDACA ¿IMATATA JEHOVÁ DIOSCA YUYAN?

15. a) Jobta cushichingapaj rishca quimsa jaricunamandaca ¿imatata Jehová Diosca pensarca? b) ¿Imamandata shina pensarca?

¹⁵ Job libropica imahora parlana cashcata, imata, imashina nina cashcatapashmi yachajupanchi. Job runaguca tauca llaquicunatami charirca. Chaimi paita consolangapaj, paita consejangapaj chuscu jaricuna rirca. Cai jaricunaca imatapash na nishpami upalla ricunajurcalla. Chai chuscu jaricunamanda quimsaca Elifaz, Bildad, Zofar shuticunami carca. Paicunaca Jobta ayudangapaca tiempotaca na aprovecharcachu. Chaipa randica Job runagutaca imapash nalicunata rurashcamandami cai llaquicunataca charingui ninajurcami. Chai nishcacunaca na tucuichu cabal carca. Cai quimsa jaricunaca Job runagumanda, Jehová Diosmandapash ashtaca llullacunatami ninajurca. Ninanda juchachishpami respetashcatapash na ricuchinajurca (Job 32:1-3). Chaita ricushpaca ¿imashinashi Jehová Diosca sintirishcanga? Jehová Diosca ninandami chai quimsa jaricunahuanga culirarca. Chaimi paicunataca cangunamanda mañachunmi Job runagutaca mañana canguichi nishpa mandarca (Job 42:7-9).

16. Elifaz, Bildad, Zofar jaricunapa parlashcamandaca ¿imatata yachajupanchi?

¹⁶ Elifaz, Bildad, Zofar jaricunapa parlashcamandaca cai yuyaicunatami yachajupanchi. Primero, ñucanchi huauquipanicunata na yangata juchachinalla cashcata (Mat. 7:1-5). Chaipa randica nara imatapash nishpallatami paicunataca ali ali uyana capanchi. Shinami paicunata ima pasajushcata intindi ushapashun (1 Ped. 3:8). Segundo, imagutapash ninajushpaca ciertopacha ali cajpi, cabal cajpimi imatapash parlana capanchi (Efes. 4:25). Y tercero, Jehová Diosca ñucanchicuna shujcunaman imata nijujtaca ali alimi uyajun.

17. Elihú jarigumandaca ¿imatata yachajupanchi?

¹⁷ Job runagutaca Elihú jarigupashmi visitarca. Paica Abrahanba familiami carca. Chaishuj quimsa jaricunahuan Job parlajujpica Elihú jariguca ali alimi uyajurca. Paica chaishuj quimsa jaricuna imata nishcata ali uyaimandami, Job runagu ama pandacunata yuyajuchunga alipacha consejai usharca (Job 33:1, 6, 17). Elihú jariguca pai shujcunapa ñaupajpi ali quedangapaca na rimarcachu. Chaipa randica paipa nishcacunahuanga Jehová Diostami alabarca (Job 32:21, 22; 37:23, 24). Elihú jarigupa ejemploca na parlashpa ali ali uyana cashcatami ñucanchitaca yachachin (Sant. 1:19). Shinallata pitapash consejajushpaca ñucanchira alipi quedanapa randica, Jehová Diostara alabana cashcatami yachachin.

18. Parlai ushashcamandaca ¿imashinata Jehová Diosta agradicishcata ricuchi ushapanchi?

¹⁸ Bibliapi imahora parlana cashcata, imata nina cashcata yachajushpa, chaicunata pactachishpami parlai ushashcamandaca Jehová Diosta agradicishcata ricuchipanchi. Rey Salomonga nircami: “Aliguta yarishpa rimashca shimicunaca, oro manzanapi culquita churashpa, juyaillaguta rurashcashnami” can nishpa (Prov. 25:11). Nara parlashpallatami ali ali uyana capanchi. Shinami ñucanchi parlocunaca cai oro manzanacunashna caita ushanga. Ashtacata parlanata gushtashpapash o na yapata parlanata gushtashpapash ñucanchi parlocunahuanmi shujcunataca ayudai ushapanchi. Shinallata Jehová Diostapashmi cushichipashun (Prov. 23:15; Efes. 4:29). Caicunata rurashpami Jehová Diostaca ñucanchicuna parlai ushashcamanda agradicishcata ricuchi ushapanchi.