33 JEHOIADÁ
Jehová Dios agllashca reytami difindirca
JEHOIDACA ña mayorllagu cashpapash shinllirami carca. Shinallata Jehová Diostaca tucui shunguhuanmi sirvishpa catijurca. Paica Jerusalenba templopimi sacerdote principal shina sirvijurca. Chaimandami paica israelitacuna Jehovata ali adorachun ayudana responsabilidadta charirca. Shinapash chai tiempopi israelitacuna yanga dioscunata adorashpa, nalita rurashpa causanajuimandami chaita pactachinaca shinlli carca.
Atalía huarmipa culpamandapashmi israelitacunaca ashtaca nali cosascunata rurai callarishca carca. Ataliaca rey Acabpa y reina Jezabelpa ushimi carca. Paicunaca Israel llactatami mandanajushcarca. Paicuna nalipacha cashcamandami Jehová Diosca: “Paicunapa tucui familiacunami huañunga” nishcarca. Ataliaca Judá llactamanda reyhuan cazarashca cashpapash Jehovata adoranataca nimamanda na alicachircachu. Ataliapa cusa huañujpica paipa churimi mandai callarirca. Shinapash Jehová Dios nishcashnami paipa churica huañuchi tucurca. Chaimi Ataliaca paipa munai Judá llactapa reina tucurca. Shinapash chaica Jehovapa ñaupapica na ali ricurircachu. Porque Jehová Diosca israelitacunata mandachunga solo Davidpa familiamandallami agllachun mandashca carca. Shinallata reycunaca jaricunallami cana carca. Chaimandami Ataliapa nietocunapuramanda shuj rey llujshina carca. Pero Ataliaca paipacha reina cangapaj munaimandami paipa tucuilla nietocunata huañuchichun cacharca.
Shuj nali huarmi shuj huahuaguta ama huañuchichunmi shuj sacerdote principal y paipa huarmigupash paicunapa causaita peligropi churarca
Jehoiadá runaguca Jehoseba huarmihuanmi cazarashca carca. Chai huarmigutaca Jehosabeat nishpapashmi rijsin carca. Paica na manllaj, joven huarmigu, shinallata Judá llactamanda shuj reypa ushimi carca. Jehová Dios nishcashna Davidpa miraimanda shuj runagu para siempre mandana cashcataca Jehoiadá y Jehosebaca alimi yacharca (2 Sam. 7:12, 13). Chaimandami paicunaca Davidpa miraimanda tucui huahuacunata Atalía huañuchichunga na saquigrinajurca. Chaimi Jehoseba huarmiguca Jehoás shuti huahuaguta pacanata decidirca. Chai huahuagumi rey tucuna carca. Jehoasca ni shuj huatagutallapash nara charircachu. Jehosebaca na manllashpami chai huahuaguta, huahuata viñachij mamandi reypa palaciomanda pacalla llujchishpa, paipa cusa Jehoiadapaman aparca. Chai jipaca cai cusahuarmica Jehoás huahuagutaca templo huasipa shuj cuartopimi pacarca.
Jehoiadá y paipa huarmigupash 6 huatacunatami Jehoastaca Taita Diospa templo huasipi pacashpa charirca. Atalía chaita yachaj chayashpaca seguromi paicunataca huañuchinman carca. Chaimandami chai huatacunaca paicunapaca shinlli cashcanga. Shinapash chai 6 huatacuna yalishca jipaca Jehoiadaca cutin na manllashcata ricuchishpami Jehovata ali sirvij soldadocunapa picha jefecunata tandachirca. Paicunamanga: “Davidpa miraimanda Israel llactapa rey tucuna shuj huahuaguca tianrami” nishpami villarca. Chai jipaca chai soldadocunapa jefecunataca templopi y templo muyundipi 500 soldadocunata churachunmi mandarca. Chai soldadocunaca lanzacunata, escudocunata japishpami Jehoás huahuaguta protegingapaj paipa muyundipi shayarirca. Chaipimi Jehoiadaca Jehoastaca reyta rurarca. Chaimi gentecunaca cushijuimanda caparishpa, maquitapash huactanajurca. Chaita uyashpami Ataliaca templo huasiman calpashpa chayarca.
Ataliaca templopa patioman chayashpaca jaicatami ima pasajujtaca cuenta japirca. Chaimi Jehoasta ama reyta rurachun jarcangapaj munashpa: “Umachihuashcamari, umachihuashcamari” nishpa caparijurca. Shinapash paillatami reina tucungapaj shujcunata umachishcarca. Chaimi Ataliataca pipash na ayudagrijurca. Jehoiadaca na manllashpami soldadocunapa jefecunataca Atalía huarmita templomanda llujchichun mandarca. Paicunaca Jehoiadata cazushpami Ataliataca templomanda llujchishpa huañuchirca. Acab y Jezabelpa huahuacunamandaca talvez Ataliallami chai tiempopica causajurianga. Shinaca Ataliata huañuchijpimi Jehová Dios nishcashnaca “Acab runapa” familiaca chaipi tucurirca (2 Rey. 9:8).
Jehoiadaca shuj ali cosascunatapashmi rurashpa catirca. Por ejemplo, reypash y israelitacunapash Jehovatalla sirvichunmi shuj promesata rurachirca. Chai jipaca Baal yanga diospa templota tucuchichun, chai templopi sirvij sacerdote runata huañuchichunmi mandarca. Jehoiadaca chai punllamandapachami Jehoastaca Jehovata sirvij ali rey cachun ayudarca. Jehoiadaca huañungacamanmi Jehoaspaca shuj ali ejemplo cashpa catirca. Paica 130 huatacunata charishpami huañurca. Shinallata Jerusalén llactata mandashca reycunapurapimi pambai tucurca. Sacerdote principalcunataca reycunapurapica na pambanllu carca. Shinaca Jehoidaca shuj jatun privilegiotami chasquirca.
Sacerdote Jehoiadá huañushca jipaca rey Jehoasca Judá llactamanda principecunapa nali ejemplota catishpami yanga dioscunata adorai callarirca. Shinallata shujcunatapashmi chai yanga dioscunata adorachun animarca. Jehovapa profetacuna paita ayudangapaj munajpipash Jehoasca na cazurcachu. Chai profetacunapuramandaca Jehoiadapa churi Zacariaspashmi paitaca ayudangapaj munarca. Zacariasca israelitacunataca: “¿Imamandata Jehovapa mandashcacunataca na cazunajunguichi?” nishpami tapurca. Shina tapujpica Jehoasca ninanda culirashpami Zacariasta huañuchichun mandarca. Shinapash Zacariasca paipa taitashnami huañungacaman na manllaj cashcata ricuchirca. Ashtaca huatacuna jipaca Jesusca Zacarías runagu alita ruraj runa cashcatami nirca. Na manllashpa alita rurajcunataca Jehová y Jesuspash nunca na cungangachu.
Bibliapi ima nijta liipai
2 Reyes 11:1-21; 12:1, 2
2 Crónicas 22:10-12; 23:1-21; 24:1, 2, 7, 15-22
¿Imatata nipanguiman?
Jehoiadaca ¿imashinata na manllashcataca ricuchirca?
Ashtahuan informacionda mascapai
1. ‘Cuidaj soldadocuna’ o “guardia caria” nishca soldadocunaca Atalía huarmita reina canamanda anchuchichunmi Jehoiadataca ayudarca. Huaquin estudiashcacunaca cai soldadocunamandaca ¿imatata nin? (2 Rey. 11:4, 19; it “Guardia de corps caria”).
2. ‘Jatun mandajcunata mandashca’ o “el Testimonio” nishcaca ¿imata carca? ¿Imamandata Jehoiadaca Jehoaspa uma jahuapi chaitaca churarca? (2 Rey. 11:12, nota; w91 1/2 31 párrs. 5, 6). A
Dibujo A
3. Jehoasca ¿imamandata Jehovapa templo huasita arreglachun mandarca? (2 Crón. 24:4-7, 11-14; it “Jehoás” núm. 1 párr. 5).
4. Zacariasca Jehoiadapa churimi carca. Shinapash Jesusca ¿imamandata Zacariastaca “Baraquiaspa churi” nirca? (Nota de estudio “hijo de Baraquías” de Mat. 23:35, nwtsty).
Imata yachajushcapi pensaripai
Jehoasta pacashca tiempopica Jehoidaca más de 100 huatacunatami charishcanga. Paipa ejemploca ¿imashinata mayorlla huauquipanicunataca animaita ushan? (Sal. 92:12, 14). B
Foto B
Jehoiadapa consejocunata catishpaca Jeohasca ali decisiongunatami agllarca. Caimandaca ¿imatata jovengunaca yachajuita ushan?
¿Imashinata Jehoiadapa ejemplota catishpa na manllashcata ricuchita ushapangui?
Ima pasashcapi pensaripai
Cai historiaca Jehová Diosmandaca ¿imatata yachachihuan?
Cai historiaca Jehovapa voluntadhuan y Bibliapa temahuanga ¿imatata ricunata charin?
Jehoiadá causarijpica ¿imatata paita tapungapaj munaiman?
Ashtahuan yachajupai
Amigocunata ali agllangapaca ¿imatata huahuacunaca Jehoiadapa ejemplomandaca yachajuita ushan?
“Jehoasca nali amigocunahuan llevarishcamandami Jehová Diostaca saquirca” (w09 1/4 24, 25)
Contribuciongunata caranamanda, ali utilizanamandaca ¿imashinata Jehoiadaca shuj ali ejemplota saquirca?
“Tucui shunguhuan carashpami Jehová Diosta cushichinchi” (w05 1/11 26, 27)