“Paipa shungupica” Jehová Diosta cushichingapaca decididomi carca

DANIELCA paipa llactamanda caru carutami apai tucurca. Babiloniocunaca paipa familiatapash, shujcunapa familiatapashmi Judá llactamanda Babiloniaman prezo aparca. Paicunaca chai caru llactaman chayangapaca talvez chuscu quillatami purishcanga. Chai jipaca soldadocunaca Danielta, shuj joven jaricunatapashmi Babiloniamanda reypa palaciopi causachun aparca. Shinaca chai jovengunaca ñana paicunapa familiahuan causashpa catita usharcachu. Danielca Hananías, Misael y Azarías quimsa hebreo jovengunahuanmi ali amigocuna tucurca. Chai chuscu jovengunaca babiloniocuna paicunahuan imata rurangapaj munashcatami cuenta japirca. Babiloniocunaca chai jovenguna paicunashna tucuchunmi munanajurca.

Chai jovenguna palacioman chayashcandimi Nabucodonosorca paipa sirvij Aspenaz shuti runataca paicunapa shuticunata cambiachun mandarca. Hebreocunaca paicunapa shuticunahuanga Jehová Diostami jatunyachin carca. Por ejemplo, Daniel shutica, “Taita Diosmi ñucapa juez can” ningapami munan. Cutin babiloniocunaca paicunapa shuticunahuanga paicunapa yanga dioscunatami jatunyachin carca. Por ejemplo, Danieltaca Beltsasar nishpami shutichirca. Cai shutica, “Reypa causaita cuidapai” ningapami munarca. Chai shimicunataca yanga dios Belta mañangapami utilizan carca. Ashtahuangarin Babiloniamanda reyca cai hebreo jovenguna babiloniocunashna pensai callarichun, imatapash rurai callarichunmi munarca. Chaimi paipa sirvijcunataca hebreo jovengunaman babiloniocunapa idiomata liinata y escribinata yachachichun mandarca. Shinami paicunaca jipamanga reypa palaciopi sirvita ushagrinajurca. Shinapash Babiloniamanda reyca Daniel y paipa amigocunapash ¿ima ashtahuan rurachunda munarca?

Rey Nabucodonosorca Aspenaztami chai hebreo jovengunata yachachichun mingarca. Reyca paiman carashcashnallata chai jovengunamanbash Babiloniamanda ashtahuan ali micunata, ashtahuan ali vinota carachunmi mandarca. Huaquin jovengunaca chashna tratai tucushpaca talvez cushillami sintirishcanga. Shinapash Danielca paipa quimsa hebreo amigocunandi cuidadota charina cashcatami cuenta japirca. ¿Imamandata cuidadota charina carca?

Danielca Taita Diospa Leypi nishcashna yahuarhuan aichata, shinallata babiloniocunapa huaquin micunacunatapash na micuna cashcataca alimi yacharca. Shinallata huaquin micunacunata yanga dioscunata adorangapaj utilizan cashcamandami Danielca cuidadota charina carca. Y yapa vinota ufiashpapash ali pensarishpa imatapash deciditaca na ushanmanllu carca. Shinaca Danielca babiloniocuna paicunapa micunata, vinota carashpaca hebreocuna Jehová Diosta na cazuchun munanajushcatami cuenta japishcanga.a

Danielca imata ruranata yachangapaca Jehová Diostami ninanda mañashcanga. Paipa amigocunahuanbashmi parlashcanga. Danielca “paipaj shungupica” Jehová Diosta cushichingapaca decididomi carca. Chaimandami Aspenaztaca paipash, paipa amigocunapash rey carashca micunata ama micungapaj respetohuan permisota mañarca. Jehová Dios Danielta ayudajushcamandami Aspenazca Danielhuanga na culirarca. Shinapash Aspenazca: “Daniel y paipa amigocunaca rey carashca micunata na micushpaca irquiyangami” yashpami pinarijurca. Shina pasajpica reyca paita castiganmanmi carca. Danielca pliturijunapa randica, imata rurai ushashcatami pensai callarirca. Chaimi na manllashpa Aspenaz churashca guardiahuan parlarca. Paitaca 10 punllacunata aicha illa micunata, yacugutalla carachunmi mañarca. Shinallata 10 punllacuna yalishca jipa chaishuj jovengunahuan comparachunmi mañarca. Guardiaca Daniel mañashcashna rurachunmi saquirca.

Chai 10 punllacuna jipaca Daniel y paipa amigocunapash chaishuj jovengunamanda ashtahuan yali ali, sano cashcatami ricunalla carca. Chaimi chai punllamandapacha aicha illa micunata micushpa, yacugutalla ufiashpa catichun saquirca. Shinami Daniel y paipa amigocunapash Jehovapi confiashcamanda, na manllaj cashcamanda Jehová Dios paicunata bendiciajujta cuenta japirca. Paicunaca Jehová Dios bendiciashcataca nunca na cungarcachu.

Cati capitulopica Danielpa quimsa amigocuna jatun peligropi cashpapash na manllashcatami ricugripanchi. Cutin Danielca más o menos 100 huatacunatami causarca. Paipash ashtaca viajecunatami peligropi cashpapash na manllaj cashcata ricuchirca. Por ejemplo, Jehová Dios Nabucodonosorman huaquin muscuicunata muscuchijpica Danielca na manllashpami: “Chai muscuicunaca llaquicuna ricurimuna cashcatami ricuchin” nishpa villarca. Shinallata ashtaca huatacuna jipaca rey Belsasar mandajujpica Jehová shuj milagrota rurajpimi shuj maqui ricurishpa shuj pircapi escribi callarirca. Danielca na manllashpami chai escribishca shimicuna Belsasar tucuchi tucuna cashcata ricuchijta villarca. Y ña mayorllagu cashpa leongunapa utujuman shitai tucushpaca huañuna peligropimi carca. Chai tucui llaquicunata chimbapurashpaca Danielca joven cashca horaspishnallatami na manllaj cashcata ricuchishpa catirca. Chaimandami Jehovapa shuj angelca Danielmanga: “Canga ninanda juyai tucushca runami cangui” nirca.

Bibliapi ima nijta liipai

• Daniel 1:​1-21; 5:12; 10:11

¿Imatata nipanguiman?

Danielca ¿imashinata na manllashcataca ricuchirca?

Ashtahuan informacionda mascapai

1. 1. Daniel 1:1​pi y Jeremías 25:1​pi diferenciacunataca ¿imashinata intindichita ushapanchi? (dp 18, 19 párrs. 14, 15).

   Respuesta

2. 2. Daniel 1:2​pica Nabucodonosorpa diospa valishca cosascunamanda o tesoromandami parlan. Babiloniamanda shuj escribishcapica ¿imashinata chai tesoro ciertopacha tiashcataca ricuchin? (it “Tesoro” párr. 3). A

   Respuesta

   

   © The Trustees of the British Museum. Licensed under CC BY-NC-SA 4.0. Source. Modifications: Box added.

3. 3. “Yachajcuna” o magiata ruraj sacerdotecunaca Babilonia llactapica ¿imatata ruran carca? (Dan. 1:20; it “Magia y hechicería” párrs. 2-6). B

   Respuesta

   

4. 4. Danielpash, paipa quimsa amigocunapashmi aicha illa micunata micurca. Shinaca paicunaca ¿imatallata micushcanga? (Dan. 1:12; dp 40 párr. 25).

   Respuesta

Imata yachajushcapi pensaripai

• Jovengunaca na paicunapa familiahuan cashpapash ¿imashinata Danielpa ejemplota catita ushan?

  Respuesta

• Llaquicunata na manllashpa chimbapurachunga Danieltaca ¿imata ayudarca? (Dan. 1:8). ¿Imashinata paipa ejemplota catita ushapanchi? C

  Respuesta

  

• ¿Imashinata Danielpa ejemplota catishpa na manllashcata ricuchita ushapangui?

  Respuesta

Ima pasashcapi pensaripai

• Cai historiaca Jehová Diosmandaca ¿imatata yachachihuan?

  Respuesta

• Cai historiaca Jehovapa voluntadhuan y Bibliapa temahuanga ¿imatata ricunata charin?

  Respuesta

• Daniel causarijpica ¿imatata paita tapungapaj munaiman?

  Respuesta

Ashtahuan yachajupai

Bibliamanda cai historiapi ima pasashcataca cai videopi ricupai.

Danielca Taita Diospi tucui shunguhuanmi crirca (parte 1) (uchilla video) (13:07)

¿Imashinata jovengunaca Danielshna na manllashcata, Jehovata tucuipi cazushcatapash ricuchita ushan?

“Danielpa ejemplota catipashunchi” (w23.08 2-7)