Jesuspa Chaquita Catishpa Causashunchi Yachachishunchi Tandanajuipi imashina yachachingapaj yuyaicuna

Cai yuyaicunami tian

1. Cai hojapi yuyaicunaca Jesuspa Chaquita Catishpa Causashunchi Yachachishunchi Tandanajuipi partecunata charijcunatami ayudanga. Paicunaca paicunapa asignaciongunata nara prepararishpallatami Tandanajuipi Yachajungapaj Hojapi yuyaicunata, caipi tiashca yuyaicunata yachajuna can. Tucui publicadorcunata cai tandanajuipi asignaciongunata yachachichunmi animana can. Shinallata tandanajuiman siempre shamujcunaca publicadorcuna nara cashpapash Bibliapi yachachishcacunata cazushpa, chaicunata pactachishpami cai tandanajuipi asignaciongunata charita ushan. Pipash nara publicador cashpapash cai tandanajuipi asignaciongunata charingapaj munashpaca Jesuspa Chaquita Catishpa Causashunchi Yachachishunchi Tandanajuipa superintendente huauquihuanmi parlana can. Chai huauquimi ima requisitocunata pactachina cashcata paihuan parlanga. Chai jipaca cai tandanajuipi asignaciongunata charita o na charita ushashcatami paiman villana can. Cai huauqui paihuan parlajujpica paita Bibliamanda yachachij huauqui o pani o paipa Testigo taita o mamapashmi chaipi cana can. Pipash cai tandanajuipi asignaciongunata charingapaj munashpaca nara bautizarishca publicadorcunapa requisitocunatallatami pactachijuna can (od cap. 8 párr. 8).

TANDANAJUITA CALLARINGAPAJ YUYAICUNA

2. (1 minuto). Cada semanami canticota candashca, Jehovata mañashca jipaca Jesuspa Chaquita Catishpa Causashunchi Yachachishunchi Tandanajuipa presidente huauquica tandanajuipi ima yuyaicunamanda yachajugrinajushcataca parlanga. Shinallata chai yuyaicuna huauquipanicunata imashina ayudanatapashmi ricuchinga.

BIBLIAPA VALISHCA YUYAICUNA

3. Discurso (10 minutocuna). Tandanajuipi Yachajungapaj Hojapica shuj temapash, ishcai o quimsa minishtirishca yuyaicunapashmi tian. Cai discursotaca shuj anciano o aliguta yachachij siervo ministerial huauquimi yachachina can. Bibliapa shuj mushuj librota yachajui callarijushpaca Bibliapa librocunamanda videocunatami ricuchinga. Shinallata discursota cuj huauquica chai videomanda yuyaicunatami yachachita ushan. Shinapash Tandanajuipi Yachajungapaj Hojapi minishtirishca yuyaicunamanda yachachingapami segurarina can. Shinallata ashtahuan importante yuyaicunata yachachingapami dibujocunata, fotocunataca utilizana can.

4. Bibliapa Valishca Yuyaicunata Mascashunchi (10 minutocuna). Cai asignacionda callarijushpapash, tucuchijushpapash na imatapash ninachu can. Tapuicunatalla rurashpami yachachina can. Cai asignaciondaca shuj anciano o aliguta yachachij siervo ministerial huauquimi yachachina can. Chai huauquica cai partepi tucui tapuicunatami rurana can. Shinallata tapuicunapi tiashca tucui textocunata liinata o na liinatami ricuna can. Huauquipanicunaca 30 segundocunapillami comentana can.

5. Bibliata liipashunchi (4 minutocuna). Caipica shuj jarimi Bibliata liina can. Shinapash Bibliata liingapaj callarijushpa, tucuchijushpapash na imatapash ninachu can. Tandanajuipa presidente huauquica, cai asignacionda charij huauqui Bibliata liijujpi intindirinalla, aliguta liichun, respetohuan, minishtirishca yuyaicunata intindichishpa liichunmi ayudana can. Bibliata liipashunchi nishca partepica ashalla versocunata o ashtaca versocunatami liina tucun. Chaimi Jesuspa Chaquita Catishpa Causashunchi Yachachishunchi Tandanajuipa superintendente huauquica aliguta ricushpa cai asignaciondaca cuna can.

ALI YACHACHIJCUNA CASHUNCHI

6. (15 minutocuna). Cai parteca ashtahuan ali parlachun, predicachun, Bibliamanda ali yachachichunmi ayudanga. Minishtirijpica ancianocunapashmi cai asignaciongunataca charita ushan. Estudiantecunaca Tandanajuipa Hojapi asignaciongunata pactachingapaca chai asignaciongunapa ladopi tiajuj lecciongunatami pactachina can. Chai lecciongunaca Juyaimandami Bibliamanda yachachipanchi o Aliguta yachachipangui nishca folletocunamandami japishca can. Huaquinbica cai partepica huaquin tapuicunatalla rurashpa asignaciongunatami yachachina canga. Chashna asignaciongunataca shuj anciano o aliguta yachachij siervo ministerial huauquimi yachachina can (huaquin tapuicunatalla rurashpa yachachina partecunamanda ashtahuan yachangapaca párrafo 15ta ricupangui).

7. Parlai callaripashunchi. Cai asignaciondaca jari cashpa o huarmi cashpapashmi pactachita ushan. Shuj jari cai asignacionda pactachina cajpica shuj jarillata o shuj familiallatami ayudana can. Cutin shuj huarmi cai asignacionda pactachina cajpica shuj huarmillata o shuj familiallatami ayudana can. Cai asignaciondaca ishcandillata shayanman o tiarishcami yachachita ushan (cai asignacionda imashina pactachinata ashtahuan yachangapaca párrafo 12 y 13ta ricupangui).

8. 8. Revisitata rurapashunchi. Cai asignaciondaca jari cashpa o huarmi cashpapashmi pactachita ushan. Shuj jari cai asignacionda pactachina cajpica shuj jarillatami ayudana can. Shinallata shuj huarmi cai asignacionda pactachina cajpica shuj huarmillatami ayudana can (km-S 5/97 pág. 2). Cai asignaciondaca ishcandillata shayanman o tiarishcami yachachita ushan. Cai asignacionda charijcunaca Bibliamanda yachajungapaj munaita charijcunata imashina cutin visitana cashcata ricuchina can (cai asignacionda imashina pactachinata ashtahuan yachangapaca párrafo 12 y 13ta ricupangui).

9. Jesusta catijcuna tucuchun ayudapashunchi. Cai asignaciondaca jari cashpa o huarmi cashpapashmi pactachita ushan. Shuj jari cai asignacionda pactachina cajpica shuj jarillatami ayudana can. Shinallata shuj huarmi cai asignacionda pactachina cajpica shuj huarmillatami ayudana can (km-S 5/97 pág. 2). Cai asignaciondaca ishcandillata shayanman o tiarishcami yachachita ushan. Shuj asignacionbi shuj leccionda ña yachachi callarishca cashpa shuj parteta yachachina tucujpica shuj yuyaicunata nishpa callarinaca na minishtirinllu. Shinallata tucuchigrijushpapash shuj yuyaicunamanda parlanaca na minishtirinllu. Folletopa leccionbi parlai callaringapaj o parlai tucuchingapaj imatapash nina cashcata ricuchijpillami chaitaca rurana can. Shinallata publicacionmanda informacionda liinalla cajpipash tucuita liinaca na minishtirinllu.

10. Ñucanchi crishcacunamanda parlapashunchi. Cai asignación shuj discurso cajpica shuj jarimi pactachina can. Cutin shuj demostración cajpica jari cashpa o huarmi cashpapashmi pactachita ushan. Shuj jari cai asignacionda pactachina cajpica shuj jarillata o shuj familiallatami ayudana can. Cutin shuj huarmi cai asignacionda pactachina cajpica shuj huarmillata o shuj familiallatami ayudana can. Temapa tapuita contestangapaca chaipi tiajushca informacionmanda japishpami respetohuan, intindirinallaguta contestana can. Asignacionda cujushpaca chai información ima publicacionbi tiajujta parlanata o na parlanataca paillatami decidita ushan.

11. Discurso. Cai asignaciondaca shuj jarimi shuj discursota cujunshna yachachina can. Discursota cungapaj Juyaimandami Bibliamanda yachachipanchi nishca folletopa apéndice A partepa shuj yuyaita yachachina cashpaca chaipi tiajuj versocuna predicangapaj imashina ayudajtami ricuchina can. Por ejemplo, chai versota ima hora utilizanata, imata ningapaj munashcata, o shuj personaman chai versota imashina intindichinatami ricuchita ushan. Cutin discursota cungapaj Aliguta yachachipangui nishca folletopa shuj leccionmanda imapash yuyaita yachachina cashpaca chai yuyaita predicacionbi imashinata pactachinatami ricuchina can. Shinallata pai yachachishca temata ashtahuan intindichingapaj leccionba punto 1pi tiashca ejemplo o leccionbi tiashca textocuna ayudanata ricushpaca chaicunataca utilizanallami can.

12. Asignaciongunata imashina pactachinamanda yuyaicuna. Cai parrafopi y cati parrafopi yuyaicunaca “Parlai callaripashunchi” y “Revisitata rurapashunchi” nishca asignaciongunapami can. Estudiantecunaca gentecunata ayudaj Bibliamanda facillla temacunatami yachachina can. Shinallata chai personata cutin visitai ushangapaj imata rurana cashcatapashmi ricuchina can. Shinapash cai asignaciongunata pactachingapaj shuj yuyaicuna tiajpica chai yuyaicunatami pactachina can. Estudiantecunaca cada llactapi ima temata parlana ali cashcata ricushpami agllana can. Cada estudiantemi Yachachingapaj Publicacionguna nishca partemanda shuj publicacionda saquinata o shuj videota utilizanata decidita ushan. Cai asignaciongunata de memoria yachajunapa randica gentecunahuan ali parlanata yachajungapami prepararina can. Chaipaca asignaciongunapica gentecunamanda ciertopacha preocuparishcatami ricuchina can. Shinallata shungumandami parlana can.

13. Shuj shuj formacunapi villachingapaj yuyaicuna. Estudiantecunaca cada llactapi gentecuna imashina causajta ricushpami cai partepi asignaciongunata pactachina can. Por ejemplo:

(1) Huasin huasin predicana: Cai asignacionbica en persona, telefonopi o cartacunahuan imashina predicanatami ricuchina can. Shinallata huasin huasin predicashpa tarishca personata imashina revisitanatami ricuchina can.
(2) Informalmente predicana: Cai asignacionbica imagutapash parlajushpa imashina predicai callarinatami ricuchina can. Vecinocunahuan parlajushpa, shinallata trabajopi, escuelapi, colegiopi, buspi cashpa o maipi cashpapash Bibliamanda asha yuyaiguta imashina parlanatami ricuchita ushan.
(3) Predicación pública: Cai asignacionbica predicangapaj cochecunahuan, negociocunapi, callecunapi, parquecunapi, parqueaderocunapi o gentecunata tarinalla pushtucunapi imashina predicanatami ricuchina can.

14. Videocunata y publicaciongunata imashina utilizana. Cada estudiantemi paipa asignacionbica shuj videota o shuj publicacionda utilizanata decidita ushan. Shinapash paipa asignacionbi shuj videota utilizana cashpa o paillata shuj videota utilizanata agllashpaca chai videotaca na ricuchinachu can.

JESUSPA CHAQUITA CATISHPA CAUSASHUNCHI

15. Cai partepica shuj canticota candashpami callaringa. Callari 15 minutocunapica shuj o ishcai asignaciongunami tianga. Cai asignaciongunaca, tandanajuiman rishcacuna imashina Taita Diospa nishcacunata paicunapa causaipi pactachinata yachachunmi ayudanga. Cai asignaciongunataca shuj anciano o aliguta yachachij siervo ministerial huauquimi yachachina can. Pero Congregacionba minishtirishcacunataca ancianocunallami yachachina can. Shinapash asignaciongunata pactachingapaj shuj yuyaicuna tiajpica chai yuyaicunatami pactachina can. Cai temacunata huaquin tapuicunatalla rurashpa yachachina cashpaca yachachij huauquica asignacionbi tiashca tapuicunatami rurana can. Shinallata temapa importante yuyaicunamandapashmi shuj tapuicunata ruraita ushan. Ashtahuan importante yuyaicunata yachachi ushangapaj, shinallata huauquipanicuna comentariocunata cuita ushachunga yachachij huauquica ashalla shimicunahuanmi callarina can. Usharijpica, shuj entrevista tiajpica entrevistashca huauqui o paniguca paipa asientomanda parlanapa randica, plataformaman vitsashpami parlana can.

16. Diospa Shimimanda Yachajushunchi (30 minutocuna). Cai asignaciondaca ali yachachij anciano huauquimi yachachina can (ashalla ancianocuna tiaj congregaciongunapica ali yachachij siervo ministerial huauquicunatami cai asignacionda yachachichun utilizanalla can). Cuerpo de ancianos huauquicunami picunalla cai asignacionda yachachichun agllanga. Cai asignacionda cuj huauquicunaca 30 minutocunapimi yachachina can. Cai tiempomandaca na yalinachu can. Shinallata cai asignacionda cuj huauquica Bibliapa minishtirishca textocunata intindichina, yachajushca yuyaicunatapash imashina pactachinatami ricuchina can. Cai asignacionda yachachichun aprobashca huauquicunaca imashina yachachinata ashtahuan yachangapaca tapuicunahuan, respuestacunahuan partecunata imashina yachachinata llujshishca yuyaicunatami catina can (w23.04 pág. 24, recuadro). tucui informacionda ali intindichishca cashpaca 30 minutocunata pactachinaca na minishtirinllu. Usharijpica cada semanami cai asignaciondaca diferente anciano huauqui yachachina can. Shinallata liichunbash shuj shuj huauquicunatami utilizana can. Tandanajuipa presidente huauqui cai asignacionda uchalla tucuchichun mañajpica, cai asignacionda yachachij huauquillatami imashina uchalla tucuchinata ricuna can. Chaipaca huaquin parrafocunata na liinami ali canman.

TANDANAJUITA TUCUCHINGAPAJ YUYAICUNA

17. (3 minutocuna). Tandanajuipa presidente huauquimi tandanajuipi yachajushca alipacha yuyaicunata cutin yarichinga. Chaipaca tiempo pactajpica ima puntocunalla ñucanchita ayudajta comentachunmi huaquipanicunata mañaita ushan. Tiempo tiajpica picunalla asignacionda charijcunapa shuticunatapash ninallami can. Cai parteta nara tucuchishpallatami imapash villaicunata villanga. Cartacuna tiajpica liinallami can. Shinapash villachingapaj horascunata, Salón del Reinota picuna fichanataca na villanachu can. Chai villaicunataca tablero de anuncios nishcapimi churana can. Cartacunata liingapaj o shuj minishtirishca yuyaicunamanda villangapaj tiempo na tiajpica, “Jesuspa chaquita catishpa causashunchi” nishca partepi asignaciongunata charij huauquicunatami, uchalla tucuchipangui nishpa mañanga (párrafo 16 y 19ta ricupangui). Shuj canticota candashpa, Jehovata mañashpami tandanajuitaca tucuchinga.

CONSEJAJUSHPA

18. “Bibliata liipashunchi” nishcapi, “Ali yachachijcuna cashunchi” nishcapi cada asignacionda cushca jipaca, Tandanajuipa presidente huauquica cada asignacionbi ima leccionda pactachina cashcata ricushpami asignacionda charijcunataca felicitana, consejana can. Chaipaca shuj minutotallami parana can. Tandanajuipa presidente huauquica “Bibliata liipashunchi”, “Ali yachachijcuna cashunchi” nishcapi cada asignacionda cugrijuj estudiantecunata cayashpaca paicuna ima leccionda pactachinajushcataca na ninachu can. Cada asignacionda tucuchishca jipa, paicunata felicitashca jipami ima leccionda pactachinajushcataca villaita ushan. Shinapash chai leccionda ali pactachishcata o chai leccionmanda imapi ashtahuan ali pactachina cashcatami juyaihuan nina can. Ashtahuanbash Tandanajuipa presidente huauquica asignacionda pactachijcunata y shujcunata ayudanata ricushpaca imapash asignacionda imashina pactachishcamanda shuj yuyaicunatapashmi parlaita ushan. Tandanajui jipa cashpa o shuj punlla cashpapash Tandanajuipa presidente huauquica Juyaimandami Bibliamanda yachachipanchi, Aliguta yachachipangui nishca folletocunamanda o Benefíciese libromanda yuyaicunahuanmi imapi ashtahuan mejorana cashcata paicunahuan parlanalla can (Jesuspa Chaquita Catishpa Causashunchi Yachachishunchi Tandanajuipa presidente huauqui, consejero auxiliar huauquipash imata rurana cashcata ashtahuan yachangapaca párrafo 19, 24, y 25ta ricupangui).

TIEMPO

19. Tandanajuipi tucui asignacionda charijcunapash, tandanajuipa presidentepash tiempotaca na yalinachu can. Tandanajuipi Yachajungapaj Hojapi cada asignación mashna tiempota parana cashcata ricuchijpipash tucui informacionda ali intindichishca cashpaca menos tiempopi pactachinallami can. Shuj asignacionba tucuilla tiempota utilizangapalla ashtahuan yuyaicunamanda parlanaca na minishtirinllu. Imapash asignacionda charijcuna tiempota yalijpica Tandanajuipa presidente huauqui o consejero auxiliar huauquimi tandanajui jipa cada unohuan parlana can (párrafo 24 y 25ta ricupangui). Tandanajuitaca canticocunata candashpa, Jehovata mañashpapash 1 hora y 45 minutocunapillami tucuchina can.

SUPERINTENDENTE DE CIRCUITO HUAUQUI VISITAJUJPI

20. Superintendente de circuito huauqui visitajujpica Tandanajuipi Yachajungapaj Hojapa programapica huaquin cambiocunami tianga. Por ejemplo, “Diospa Shimimanda Yachajushunchi” nishca asignacionga na tiangachu. Chaipa randica superintendente de circuito huauquimi shuj discursota 30 minutocunapi cunga. Shinapash nara cai discursota cujpillatami Tandanajuipa presidente huauquica chai tandanajuipi yachajushca alipacha yuyaicunata, cati semanapi imata yachajugrinajushcatapashmi parlanga. Shinallata minishtirishca villaicunatapash, cartacunatapashmi liinga. Chai jipami Tandanajuipa presidenteca discursota cuchun superintendente de circuito huauquita cayanga. Discursota cushca jipaca superintendente de circuito huauquillatami pai agllashca canticohuan tandanajuitaca tucuchinga. Superintendente huauquica tandanajuita mañaihuan tucuchichunmi shuj huauquita agllaita ushan. Superintendente huauqui visitajujpica segunda salapi asignaciongunaca na tiangachu. Shinapash shuj shimipi grupocunaca paicunapa tandanajuitaca charinallami can. Shinapash superintendente huauquipa discursocunata uyangapaca shuj shimipi parlaj grupocunaca congregacionhuan tandanajushpami chai discursocunataca uyana can.

ASAMBLEA TIAJ SEMANAPI

21. Asamblea tiaj semanapica tandanajuicunaca na tiangachu. Shinaca chai semana tandanajuipi yachajuna partecunata cada uno o familiahuan huasipillata yachajuna cashcatami yarichina can.

CONMEMORACIÓN TIAJ SEMANAPI

22. Chaupi semanapi Conmemoración tiajpica, Jesuspa Chaquita Catishpa Causashunchi Yachachishunchi tandanajuica na tiangachu.

JESUSPA CHAQUITA CATISHPA CAUSASHUNCHI YACHACHISHUNCHI TANDANAJUIPA SUPERINTENDENTE HUAUQUI

23. Chai huauquica shuj anciano huauquimi can. Chai huauquitaca anciano huauquicunallatami agllan. Chai huauquimi cai tandanajui organizado cachun, shinallata tucui huauquipanicuna cai instrucciongunata pactachinajuchun ricuna can. Shinallata Tandanajuipa superintendente huauquica, consejero auxiliar nishca huauquihuanbashmi parlarina can. Ashtahuanbash tandanajuipa superintendente huauquica Tandanajuipi Yachajungapaj Hoja llujshijhuanmi, cada partepi picunalla asignacionda charijta ishcai quillapa segurana can. Chai huauquimi tucui tandanajuicunapa asignaciongunapa y partecunapa huauquipanicunata agllanga. Shinallata Tandanajuipa presidentetapashmi agllana can. Pero “Jesuspa Chaquita Catishpa Causashunchi” partepaca anciano huauquicuna aprobashca huauquicunatami churana can (párrafo 3manda 16caman y 24ta ricupangui). Estudiantecunapa asignaciongunata agllajushpaca mashna huatata, mashna experienciata charishcata, paipa asignacionbi yuyaicunata paipa causaipi pactachijushcata o na pactachijushcatapashmi ricuna can. Tandanajuipa caishuj partecunatapash yachachichun huauquicunata agllashpaca chaitallatami ricuna can. Shinallata chai huauquillatami Jesuspa Chaquita Catishpa Causashunchi Yachachishunchi Tandanajuipa asignación hojataca (S-89) quimsa semanacuna faltajpillata entregana can. Shinallata Tandanajuipa superintendente huauquimi tandanajuipa programataca tablero de anunciospi cachun ricuna can. Cuerpo de ancianos huauquicunaca cai huauquita ayudachunmi shuj anciano huauquita o siervo ministerial huauquita mingaita ushan. Siervo ministerial huauquica “Bibliata liipashunchi” y “Ali yachachijcuna cashunchi” nishca partecunapillami huauquipanicunata asignashpa ayudaita ushan. Pero chaishuj partecunataca anciano huauquicunallami asignaita ushan.

JESUSPA CHAQUITA CATISHPA CAUSASHUNCHI YACHACHISHUNCHI TANDANAJUIPA PRESIDENTE HUAUQUI

24. Cada semanami shuj anciano huauqui Jesuspa Chaquita Catishpa Causashunchi Yachachishunchi Tandanajuipica presidente shina yachachinga (ashalla ancianocuna tiaj congregaciongunapica ali yachachij siervo ministerial huauquicunatami Tandanajuipa presidente shina yachachichun utilizanalla can). Tandanajuipa presidente huauquimi tandanajuita callaringapapash, tandanajuita tucuchingapapash huaquin yuyaicunata ninga. Tandanajuipa presidente huauquica, cada asignacionda charijcunatami cayanga. Shinallata ashalla anciano huauquicuna tiajpica, tandanajuipa presidente huauquimi talvez tandanajuipi shuj asignaciondapash yachachina tucunga. Por ejemplo, huaquin asignaciongunapica videocunata ricuchinallami can. Chaitaca presidente huauquimi ruranalla can. Tandanajuipi cada asignaciongunaman yalingapaca, tandanajuipa presidente huauquica ashagutallami parlana can. Huauqui ancianocunami picunalla Tandanajuipa presidente shina yachachi ushashcata ricunga. Cada semanami diferente huauquicuna Tandanajuipa presidente shina yachachita ushan. Jesuspa Chaquita Catishpa Causashunchi Yachachishunchi Tandanajuipa superintendente huauquica talvez tauca viajemi Tandanajuipica presidente shina yachachina tucunga. Shinallata “Diospa Shimimanda Yachajungapaj” nishca partepi shuj anciano huauqui yachachingapaj aprobashca cajpica chai anciano huauquipashmi Tandanajuipa presidente caita ushan. Shinapash Tandanajuipa presidente huauquica tandanajuipi asignacionda charijcunataca felicitanata, juyaihuan minishtirishca consejocunata cunatapashmi yachana can. Shinallata tandanajui a tiempo tucurichunbashmi ricuna can (párrafo 17 y 19ta ricupangui). Tandanajuipa presidente huauqui munashpaca plataformapi lugar tiajpica atril ladopi shuj microfonota shayachichun ninallami can. Shinami chai microfonomanda asignacionda charijcunata cayaita ushan. Shinallata “Bibliata liipashunchi” nishcapi, “Ali yachachijcuna cashunchi” nishca partepi tandanajuipa presidente huauqui tiarichunga shuj mesaguta, shuj sillaguta churanallami can. Shina rurashpami tandanajui a tiempo tucurichun ayudaita ushan.

CONSEJERO AUXILIAR

Minishtirishca cajpica consejero auxiliar huauquimi Jesuspa Chaquita Catishpa Causashunchi Yachachishunchi Tandanajuipi yachachij ancianocunata, siervo ministerialcunatapash consejanga. Shinallata discursocunata cuj huauquicunata, Villajun revistata yachachij huauquita, “Diospa Shimimanda Yachajushunchi” nishca partepi yachachij huauquita, Villajun revistata liij huauquita, librota liij huauquitapashmi consejero auxiliar huauquica consejaita ushan párrafo 19ta ricupangui.

TANDANAJUIPI SEGUNDA SALA

25. Congregacionbi taucacuna cajpica segunda salapi asignacionguna tiachunmi ricuna can. Segunda salapica ali yachachij shuj anciano huauquimi yachachina can. Na cashpaca ali yachachij shuj siervo ministerial huauquimi yachachinata ushan. Chaipaca anciano huauquicunami picunalla segunda salapi yachachichun agllanga. Chai huauquipashmi párrafo 18pa nishcatami catina can. Shinallata “Bibliapa Valishca Yuyaicunata Mascashunchi” nishca parte tucurishca jipami segunda salapi asignacionda charijcunaca segunda salaman rina canga. “Ali yachachijcuna cashunchi” nishca partemanda último asignación tucurishca jipami cutin primera salaman tucuicuna tigrana can.

VIDEOCUNA

26. Chaupi semana tandanajuipica videocunamandami yachachinga. Chai videocunaca JW Library® aplicacionbi caimandami computadorapi, celularpi o tabletpi descarganalla can.

S-38-QII 9/25