Bibliamanda Yachachingapaj Escuela tandanajui 2015mi ashtahuan aliguta yachachichun ayudanga

¹ Rey Davidca nircami: “Mandaj Dioslla Jatun Rumishna ñuca Dioslla, ñucata quishpichijmi cangui. Ñuca shimihuan nishcacunapash, ñuca shungupi yarijushcapash, cambaj ñaupajpica chasqui ushanalla cachun” nishpa (Sal. 19:14). Ñucanchicunapash rey Davidshna parlashpami Jehová Diospa ñaupajpica ali ricuringapaj munanchi. Shinallata, villachingapaj llujshishpapash congregacionbi cashpapash Bibliapa ali yachachishcacunata parlanataca ninandami alicachinchi. Ñucanchicuna aliguta villachichunga Bibliamanda Yachachingapaj Escuelatapashmi Jehová Diosca cushca. Cai escuelami cada semana mundo enteropi 111 mil yali congregaciongunapi huauquipanicunataca na manllashpa, ashtahuan aliguta villachichun ayudajun (Hech. 19:8; Col. 4:6).

² Escuela 2015pa programapica mushuj cambiocunami tianga. Cai huataca Introducción a la Palabra de Dios folletomanda, Perspicacia para comprender las Escrituras libromandami yachajushun. Shinallata Bibliata Liingapaj nishca partepipash, asignación número 1 nishcapipash tiempoca bajarishcami. Shinaca cai mushuj cambiocunamanda ashtahuan yachajushpa shuj shuj asignaciongunatapash imashina pactachinata ricupashunchi.

³ Bibliata Liingapaj. Cai asignacionda charij huauquicunaca, chai semanapa Bibliata liina capitulocunamanda shujlla ali yuyaita parlangapami ishcai minutocunatalla charin. Ishcai minutocunapilla congregación minishtijushca yuyaita yachachingapaca aligutami prepararina can. Chai jipaca shujcunapash comentachunmi 6 minutocuna tianga. Ñucanchi alicachishca yuyaita comentangapaca 30 segundocunatallami charinchi. 30 segundocunamanda na yalishpa ali comentariocunata cungapaca aligutapachami prepararina canchi. Shina rurashpami aliguta, ñapash comentanata yachajushpa shuj huauquipanicunapash paicuna imata investigashcata comentachun tiempota saquishun.

⁴ Asignación número 1. Cai asignacionda charijcunaca quimsa minutocunapilla o menospimi Bibliapi liina nishca textocunataca liina can. Aliguta intindirijta liingapaca cutin cutin uyarijta liishpami repasana can. Liishpapashmi Jehová Diostaca ali adoranajunchi. Chaimandami testigo de Jehovacunaca tucuicunallata ali liingapaj esforzarina canchi. Congregaciongunapi huahuacunapash ali liijta ricushpaca cushijunchimi. Taitamamacunatapash paicunapa huahuacunata aliguta liichun ayudajushcamandaca agradicinami canchi.

⁵ Asignación número 2. Shuj panimi 5 minutocunapilla shuj demostracionda rurana can. Chai paniguca paiman cushca tematami aliguta pactachina can. Introducción a la Palabra de Dios folletomanda asignacionda rurana cajpica, villachijujpi, revisitata rurajujpi, yachachijujpi o territoriopi cierto ima pasajta ricuchishpami aliguta demostraciondaca rurana can. Cutin Perspicacia libromanda informacionda japishpa Bibliapi gentecunamanda parlana cajpica, maijan paginapi informacionda mascana cashcata ricushpa, liishpami asignación hojapi temataca pactachina can. Maijan textocunata liina cashpapash agllanallami can. Shinallata Bibliapi parlashca gentecunamanda imata yachajushcatapash ricuchinami can. Munashpaca chai temamandallata parlaj shuj textocunatapash japinallami can. Escuelapa superintendentemi asignacionda pihuan ruranataca ninga.

⁶ Asignación número 3. Cai asignaciondaca 5 minutocunapimi shuj huauqui o shuj pani rurana can. Panicuna rurana cashpaca asignación 2​pi instrucciongunatami catina can. Cutin huauquicuna cashpaca ¿imatata rurana can? Perspicacia libromanda informacionda japishpa Bibliapi gentecunamanda parlana cajpica, shuj discursotami cuna can. Chaipica asignación hojapi churashca tematami pactachina can, textocunatapash maijan ali cana cashcata ricushpami agllanalla can, Bibliapi gentecunamanda imata yachajushcatapashmi ricuchina can.

⁷ Asignación número 3​ta pactachingapaca ¿ima mushuj yuyaita tian? Tema ñaupajpi shuj asterisco tiajujpica chai asignaciondaca shuj huauquimi Familihuan Adorana Tutapi yachachijunshna o villachijunshna shuj demostracionda rurana can. Pi ayudanata, ima marco de circunstanciaspi ruranataca casi siempremi escuelapa superintendente ninga. Ayudanteca demostracionda rurajujpa huarmi, o huahuacuna, o congregacionmanda shuj huauquimi cana can. Munashpaca chai temamandallata parlajuj shuj textocunatapash japinallami can. Huaquinbica asignación 3​ta rurachunga shuj anciano huauquitami churana can. Chai ancianoca paillatami pi ayudanata, ima marco de circunstanciaspi ruranatapash agllanalla can. Shinami congregacionbi huauquipanicunaca anciano huauqui paipa familiaman o shuj huauquiman imashina aliguta yachachijta ricushpa ninanda animaringa.

⁸ Consejo. Escuelapa superintendenteca ishcai minutocunapimi asignacionda cushca huauquita o panitaca imagupipash animashpa, Benefíciese libromanda imapash ali yuyaita japishpa imapi mejorana cashcataca aliguman nina can. Escuelapa superintendenteca maijan huauqui o pani ima temamanda parlagrijujta nishpapash ima aspecto de la oratoriata pactachina cashcataca na ninachu can. Shinapash asignacionda tucuchishca jipami ali shimigucunata nishpara ima aspecto de la oratoriata pactachina cashcata nina can. Ashtahuangarin, chai aspecto de la oratoriata imashina ali pactachishcata o ali pactachingapaj imapi mejoranatami aliguman nina can.

⁹ Maijan aspecto de la oratoriata pactachina cashcata yachangapaca Benefíciese libropimi aspectos de la oratoria nishcata 79-81 paginacunapi ricuna can. Tandanajui jipaca escuelapa superintendente huauquimi asignacionda cuj huauquipa o panipa libropica imata anotana cashcata anotana can. Shinallata tapunami can ¿aspecto de la oratoria nishcapi ejerciciocunata ruraparcanguichu? nishpa. Usharijpica chai ratopillata o shuj punllami animashpa, imapi ashtahuan mejoranatapash nina can. Escuelapi asignacionda charijcunaca paicunapallata ali cana cajpimi consejocunataca aliman chasquina can (1 Tim. 4:15).

¹⁰ Escuelapi asignacionda charijcuna tiempomanda yalinajujpica ¿imatata rurana can? Tiempo yalijujta cuenta japichunga escuelapa superintendente o pai agllashca ayudajmi imapash timbreta huacachina can o lapizhuan maipipash alillaguta huactachina can. Chaita uyashpaca tiempo yalijujta cuenta japishpami asignacionda charijcunaca parlajushca oracionda uchalla tucuchishpa plataformamanda uriajuna can (Benefíciese libropi página 282 párrafo 4​ta ricupangui).

¹¹ Bibliamanda Yachachingapaj Escuelapi matricularingapaj requisitocunata pactachijcunataca chaipi uchalla matricularichunmi animanchi (Benefíciese libropi página 282 párrafo 6​ta ricupangui). Cai escuelapi yachachishcacunami Jehová Diosta sirvijcunataca ayudashca Diospa Reinomanda ali villaicunata tucui shunguhuan crishpa, juyaihuan, ali villachichun, shujcunaman yachachichunbash. Escuelapi mushuj yuyaicunata pactachishpa paita alabajta ricushpaca cushijushpami Jehová Diosca ricujunga (Sal. 148:12, 13; Is. 50:4).