Jesuspa oracionbi mañashcata pactachishunchi

1, 2. Huata 33​pi Pascuata yarishca jipaca ¿imatata Jesusca paipa 11 ali apostolcunamanga nirca?

JESUSCA huata 33​pa 14 de nisán nishca punllatami paipa yachajujcunahuan Pascuata yaringapaj tandanajurca. Pascuataca Egiptomanda llujchishpa Jehová Dios salvashcata yarishpami ruran carca. Shinapash cayandi punllaca shuj ashtahuan jatun salvacionmi tiana carca. Chai punllapica contracuna na ricunayachishpa huañuchijpipash, Jesusca paipa jucha illaj causaita cushpami gentecunataca juchamanda, huañuimanda salvana carca (Heb. 9:​12-14).

² Paipa tucui catijcunata juyashcata yarichunmi Jesusca shuj mushuj pactota callarichirca. Pascuata ñana yarishpa chai mushuj pactota yarichunmi, Jesusca levadura illaj tandata paipa 11 ali apostolcunaman yalichishpa nirca: ‘Caica cangunapa ali cachun ñuca cuerpomi. Ñucata yarishpa cashna rurashpa catinguichilla’ nishpa. Chai jipaca shuj vino copata yalichishpami nirca: ‘Cai vino copaca cangunapa ali cachun jicharina ñuca yahuarmi. Caihuanmi Diosca, gentecunahuan shuj mushuj [pactota] pactachigrin’ nishpa (Luc. 22:​19, 20).

3. a) Jesuspa punllacunapica ¿ima cambiota tiana carca? b) Jesuspa oracionmanda yachajunajushpaca ¿ima tapuicunapita pensarina capanchi?

³ Ñaupa punllacunapica israelitacunahuanmi Jehová Diosca shuj pactoca rurashca carca. Shinapash chai israelitacunaca na Jehovata tandanajushpa adoranajurcachu. Diospa shutitapash mapayachinajurcami (Juan 7:​45-49; Hech. 23:​6-​9). Chaimandami Jesuspa punllacunapica shuj mushuj pacto tiagrijurca. Chai pactotaca Jehová Diosmi Jesusta catij ungidocunahuan ruragrijurca. Ungidocuna tandanajushpa Jehovapa shutita alicachichun munashpami Jesusca shuj juyailla oracionguta rurarca (Juan 17:​1-26; callari dibujota ricupangui). Shinaca Jesús imata mañashcata yachajupashun. Shinapash chai oracionmanda yachajunajushpaca tapuripashunchi: “Paipa Churi Jesús mañajpica ¿Taita Diosca contestarcachu? ¿Ñucaca Jesuspa oracionbi mañashcata pactachijunichu?” nishpa.

JESUSPACA ¿IMATA ASHTAHUAN IMPORTANTE CARCA?

4, 5. a) Jesuspa oracionbi callari shimicunamandaca ¿imatata yachajupanchi? b) Jesús paimandallata mañajpica ¿imashinata Jehová Diosca contestarca?

⁴ Jesusca tutacamanmi paipa catijcunamanga Taita Diosmanda aliguta yachachijurca. Chai jipallami jahua cieloman ricushpa Jesusca cashna mañarca: ‘Ñuca Taitalla ñucata japichina horasca ñamari chayamushca. Canba Churi ñucataca punchapambagumi cangui nihuayari. Canba Churi ñucapash punchapambagumi cangui ningapaj. Tucuicunata mandachunmi canba ushaita carahuarcangui. Can ñucaman carashca tucuilla gentecunamanbash causaita causagrinatami carani. Can ñucaman imata rurachun mingashcataca ñami pactachircani. Shinami cai pachapica punchapambami cangui nijuni. Ñuca Taitalla nara cai pachata churashpallatami, punchapambagumi cangui nijpi canhuanga tiajurcani. Cunanbash chashnallata punchapambagumi cangui nihuayari’ nishpa (Juan 17:​1-5).

⁵ Shinaca ¿ima quimsa cosascunamandata Jesusca mañashpa callarirca? Primero, Jesusca paipa Taita punchapambagu cachun o alicachi tucushca cachunmi ashtahuanga munarca. Chai shimicunaca Padrenuestro oracionbi mañashca cuendami can. Padrenuestro oracionbica Jesusca nircami: ‘Jahua pachapi tiajuj ñucanchi Taitalla canba jucha illaj shutiguca, alicachi tucushca cachun’ nishpa (Luc. 11:​2). Shinallata, paipa catijcunapash causaita causagrichun o unai unaicaman causachun munashpami Jehovataca mañajurca. Chai ishcai cosascunata mañashca jipami Jesusca paimandallata mañashpa paipa Taitataca nirca: ‘Ñuca Taitalla nara cai pachata churashpallatami, punchapambagumi cangui nijpi canhuan tiajurcani. Cunanbash chashnallata punchapambagumi cangui nihuayari’ nishpa. Shina nishpa mañajpica ¿Jehová Diosca contestarcachu? Ari, Jesuspa oracionda uyashpami Jehová Diosca ‘angelcunapa shutitapash yali ashtahuan juyailla shutiguta’ Jesusmanga curca (Heb. 1:​4).

‘NA LLULLAJ SHUJLLA TAITA DIOSTA’ RIJSISHUNCHI

6. a) Unai unaicaman causangapaj munashpaca ¿imatata apostolcunaca rurana carca? b) ¿Imashinata yachanchi apostolcuna aliguta pactachishpa causanajushcata?

⁶ Oracionda rurajushpaca Jesusca nircapashmi, causaita causangapaj o unai unaicaman causangapaca Taita Diosta, Jesucristotami ‘rijsina’ canguichi nishpa (Juan 17:​3, liingui). Ñucanchicunapash unai unaicaman causangapaj munashpaca Taita Diosta, Jesustami ashtahuan rijsina canchi. Shinallata imata yachajushcatami ñucanchi causaipi pactachina canchi. Jesusca paipa apostolcunamanda mañajushpaca nircami: “Ñuca villachun can mingashca shimicunataca, paicunaman villajurcanimi. Chaita villajpimi paicunaca chasquirca” nishpa (Juan 17:​8). Shinaca paipa apostolcunaca imata yachajushcata pactachishpami causanajurca. Shinapash huañushpa jahua cieloman ringacamanga Jehovapa nishcacunapi, consejocunapi aliguta pensarishpami cada punlla pactachishpa causana carca. Aliguta pactachishpa causanajujpimi paicunapa shutitaca jahua pacha Mushuj Jerusalenba 12 jatun rumicunapi escribishpa cuenda churarca (Apoc. 21:14).

7. a) Diosta ‘rijsinaca’ ¿imata can? b) Diosta ‘rijsinaca’ ¿imamandata minishtirishcapacha can?

⁷ Griego shimita estudiajcunaca ninmi, “rijsina” shimitaca “rijsishpa catina” nishpapash traducinallami can nishpa. Shinaca Diosta rijsingapaca ashtahuan ashtahuan yachajushpa catijunallami canchi. Shinapash na Taita Dios imashina cajta, imata ruranata yachajushpallachu quedana canchi. Taita Diosta ‘rijsishpa catingapaca’ paita juyaimandami paipaman ashtahuan quimirishpa paipa ali amigo cuenda tucuna canchi. Ñucanchi huauquipanicunahuanbash alimi llevarina canchi. Bibliaca ninmi: ‘Na juyashpa causashpaca Taita Diostaca na rijsinllu’ nishpa (1 Juan 4:8). Taita Diosta rijsini nishpaca cazunami canchi (1 Juan 2:​3-5, liingui). Jehovata sirvijpuracunahuan tandanajunaca shuj jatun bendicionmi can. Shinapash na Judas Iscariote cuendachu Jehovata saquina canchi. Ashtahuangarin shinllita esforzarishpami Jehovaman ashtahuan quimirina canchi. Shinami unai unaicaman cushilla causaita ushashun (Mat. 24:13).

“CANBA SHUTIMANDA”

8, 9. a) Jesuspaca ¿imata ashtahuan importante carca? b) Jesús cai Alpaman shamushpaca ¿imatata nalicachishpa ricurca?

⁸ Imashinami Juan capítulo 17​pi ricunchi, Jesusca paipa apostolcunatapash, jipa punllacunapi catijcunatapash ninanda juyaimandami paicunataca salvarca (Juan 17:20). Shinapash paipa Taitapa shutita santificana, alicachinami Jesuspaca ashtahuan importante carca. Chaimandami Nazaretpi cashpaca cashna nishpa profeta Isaiaspa escribishcataca liirca: ‘Jatun Diospa espiritumi ñucapi causajun. Imagutapash na charijcunaman villachunmi Taita Diosca aceiteta talishpa javihuashca’ nishpa. Cai shimicunata liijushpaca Jesusca paipa Taitapa shutimandapash parlashcangami (Luc. 4:​16-21).

⁹ Chai punllacunapi judiocunaca na Taita Diostaca shutipi parlanajurcachu. Chaimandami Jesús cai Alpaman shamushpaca ninanda paicunataca nalicachishcanga. Jesusca contracunataca nircami: ‘Ñucaca ñuca Taitapa shutipimi shamurcani. Shinapash ñucataca na chasquishpami causanguichi. Maijan cashpapash [paicunapa] shutipillata shamujpica chasquinguichimanmi’ nishpa (Juan 5:43). Huañungapaj ashalla faltajujpipash Jesusca nircami: ‘Canba shuti punchapambagu cajtaca ricuchipayari ñuca Taitalla’ nishpa (Juan 12:​28, NM). Jehová Diospa shuti importante cajpimi oracionda rurashpaca Jesusca cutin cutin Taita Diospa shutimanda parlarca.

10, 11. a) Jesusca ¿imashinata Taitapa shutita paipa catijcunaman rijsichirca? b) ¿Imamandata shinllita esforzarina capanchi?

¹⁰ Oracionda rurajushpaca Jesusca nircapashmi: ‘Cai pachapajtalla rurashpa causajcunatami, ñucaman cararcangui. Paicunamanmi canba shutita rijsichircani. Paicunataca canballa cajpimi ñucaman carahuarcangui. Shina cashpami canba shimicunata cazunajun’ nishpa. Shinallata mañarcami: ‘Cunanga cai pachapi na quedashpami canbaman shamugrini. Ashtahuangarin paicunaca cai pachapillatami quedanga. Jucha illaj Taitalla canba shutimanda can ñucaman carashcacunataca paicunapash ñucanchishnalla shujlla cachun canba ushaihuan aliguta charipangui’ nishpa (Juan 17:​6, 11, NM).

¹¹ Jesusca na paipa Taitapa shutita uyachishpallachu paipa catijcunamanga rijsichirca. Ashtahuangarin Jehová shuti ima cajta, imashina cajta, gentecunata imashina tratajtami Jesusca yachachirca (Éx. 34:​5-7). Cunan punllacunapica ñami Jesusca jahua cielopi Rey can. Mundo enteropi gentecunaman Taita Diospa shutita rijsichichunmi paica ñucanchitaca ayudajun. Chaimandami cai nali mundo nara tucurijpillata paipa catijcuna tucuchun ashtaca gentecunata tandachingapaj shinllita esforzarina canchi. Shinami nali cosascuna tucurina punllacunapica Jehová Diosca paita ali sirvijcunata salvanga, paipa shutitapash jatunyachinga (Ezeq. 36:23).

‘CAI PACHAPI CAUSAJCUNA CAN ÑUCATA CACHAMUSHCATA CRICHUN’

12. Villashpa catingapaca ¿ima quimsa cosascunatata minishtipanchi?

¹² Jesusca pai villachi callarishcata paipa catijcunapash villachishpa catichunmi Jehovataca cashna nishpa mañarca: ‘Cai pachapi causajcunaman villachunmi, ñucataca cachamuhuarcangui. Ñucapash paicunataca cai pachapi causajcunaman villachunmi cachajuni’ nishpa. Paipa catijcuna villachita ushachunga Jesusca quimsa cosascunamandami mañarca. Primeroca, ñucapa catijcuna Diablopa mapa mundopica ama chapurichun saquipanguichu nishpami mañarca. Chai jipaca, ‘can na llullashpa villajuj Shimita catishpa canballa causachun’ ayudapai nishpami mañarca. Ashtahuangarin cutin cutinmi mañarca, ñucanchishnallata paicunapash shujlla tucushpa juyarishpa causachun ayudapangui nishpa. Shinaca cada uno tapuripashunchi: ¿Jesuspa quimsa mañashcacunataca pactachishpachu causajuni? nishpa. Cai quimsa cosascunata pactachijta ricushpa, shuj gentecunapash uyangapaj munanata yachashpami Jesusca chai cosascunamanda mañarca (Juan 17:​15-21, liingui).

13. Jesús mañajpica ¿imashinata Jehová Diosca contestarca?

¹³ Hechos libropi nishca shinaca, Jesús mañajpica Jehová Diosca contestarcami. ¿Imashinata yachanchi? Yaripashun. Chai punllacunapica judiocuna, na judiocuna, charijcuna, pobrecuna, esclavocunami congregacionbi carca. Diablopa mundopi cashpaca na tucuicuna tandanajushca caita ushanmallu carca. Shinapash Diospa espíritu santopa ayudahuanmi paicunaca shujlla cuerpo cuenda tandanajushca carca. Jesusmi paicunapaca uma cuenda carca (Efes. 4:​15, 16; 1 Cor. 3:​5-7).

14. Jehová Diosca ¿imashinata Jesuspa oraciondaca contestarca?

¹⁴ Congregacionbi tucuicuna tandanajushpa sirvinajushca cashpapash, apostolcuna huañushca jipaca taucacunami pandacunata yachachi callarirca. Chaimandami Jesusta catinchi nij tucuj religiongunaca ashtacata mirarca (Hech. 20:​29, 30). Shinapash huata 1919​pica paipa ungidocunata panda religiongunamanda llujchishpami Jesusca ‘tucuicuna imapipash na pandarishpa aliguta causanata’ yachachirca (Col. 3:14). Ungidocunaca uchilla grupogu cashpapash ‘tucui llactamanda, shuj shuj shimita parlaj’ 7 millón yali gentecunatami paicunahuan shujlla cuenda tucushpa sirvichun ayudajushca (Juan 10:16; Apoc. 7:​9). Shinami Jehová Diosca Jesuspa cai mañashcata contestarca: ‘Can ñucata cachamushcatapash cai pachapi causajcunaca yachangami. Canga ninandami juyahuangui. Shinallatami paicunatapash juyajungui’ nishpa (Juan 17:23).

ALIGUTA MAÑASHPAMI JESUSCA TUCUCHIRCA

15. Jipa punllacunapi ungidocunamandaca ¿imashinata Jesusca mañarca?

¹⁵ Jesusca 14 de nisán tutapimi, paipa catijcunapash jahua pachapi mandachun shuj pactota rurarca (Luc. 22:​28-​30; Juan 17:22). Chai jipaca, jipa punllacunapi ungido tucunacunamandapashmi cashna nishpa mañarca: ‘Ñuca Taitalla cai pachata nara rurashpallatami, ñucataca ninanda juyashpa charihuarcangui. Can ñucata punchapambagumi cangui nijta ricuchunmi, can ñucaman carashcacunaca ñuca maipi cani chaipillata paicunapash ñucahuan cachun munani’ nishpa (Juan 17:24). Cai Alpapi causana munaita charijcunaca ungidocuna jahua pachaman rinataca na envidianllu. Shinami tucuicuna tandanajushca cashcata ricuchin.

16, 17. a) Oracionda rurai tucuchijushpaca ¿imatata Jesusca rurashpa catishami nirca? b) ¿Imata rurangapata esforzarina capanchi?

¹⁶ Panda religionguna pandachijpimi ashtaca gentecunaca nin, maitashi tandanajushpa Diosta ali adoraj organizacionga tianga nishpa. Chashna gentecuna Jesuspa tiempopipash tiajpimi Jesusca cashna nishpa oraciondaca tucuchirca: ‘Ñuca Taitalla canga [alita] rurajmi cangui. Cai pachapi causajcunaca candaca na rijsinllu. Ñucallami candaca rijsini. Paicunaca can ñucata cachamushcataca alimi yachan. Paicunamanmi, canba shutita ña rijsichircani, ashtahuan rijsichisharami. Shinami, can ñucata juyajunshna, paicunapash juyarishpa causanga’ nishpa (Juan 17:​25, 26).

¹⁷ Jesusca paipa oracionbi imata mañashcata pactachishpami causarca. Paica congregacionba uma cuenda caimandami ñucanchitaca Jehovapa munaita rurachun, Jehovapa shutimanda shujcunaman parlachunbash ayudajun. Shinaca Jesuspa mandashcata cazushpa gentecunamanga tucui shunguhuan villachishpa yachachishpa catipashunchi (Mat. 28:​19, 20; Hech. 10:42). Shinallata congregacionbi tucuicuna tandanajushca cangapaj esforzaripashunchi. Shinami Jesuspa oracionda pactachishpa, Jehovapa shutita jatunyachishpa unai unaicaman cushilla aliguta causashun.