Llaqui punllacuna nara chayamujpillata Jehová Diostaca sirvipai

1, 2. a) Rey Salomonga ¿imatata jovengunamanga escribirca? b) ¿Imamandata 50 yali huatacunata charij huauquipanicunapash Eclesiastés 12:1​pi consejota catita ushan?

JEHOVÁ DIOSMI rey Salomondaca jovengunaman cashna escribichun yarichirca: ‘Canda Ruraj Diostaca chairalla viñai cashpallata yaringui. Nara llaqui punllacuna chayamujpillata yaringui’ nishpa. Shinapash ¿imatata llaqui punllacuna nijurca? Llaqui punllacuna nishpaca ña ruculla tucujpi quirucunapash urmajta, ñavipash na ricujta, chaquicunapash na puri ushajta, yuraj ajcha tucujta, curcuyai callarijtami shina nijurca. Jehová Diosta sirvi callaringapaca chai llaqui punllacuna chayamuchunga na shuyanachu canchi (Eclesiastés 12:​1-5, liingui).

² Ashtaca huauquipanicunaca 50 o ashtahuan huatacunata charishpapash, ña yuraj ajcha tucunajushpapash shinllillacunarami can. Chaimandami llaqui punllacuna nara chayamujpillata paicunapash paicunata ‘Ruraj Diosta yarita’ ushan. Shinapash ¿imashinata yarita ushan?

3. Ñucanchita ‘Ruraj Diosta yarishpaca’ ¿imatata rurana capanchi?

³ Ashtaca huatacunata Jehovata sirvijushpapash huaquinbi huaquinbica Jehová Dios imata rurashcata yarinami canchi. Jehová Diosca gentecunata animalcunata alipachami rurashca. Shinallata gentecuna cushilla causachunga ashtaca cosascunatami cushca. Jehová Dios imacunatalla rurashcata ricushpaca pai ashtacata juyajta, poderta charijta, sabiduriata charijtami ashtahuan cuenta japishun (Sal. 143:5). Shinallata Jehová Diosta yarishpaca, Jehovapa munaita rurajunichu nishpami pensarina capanchi. Chashna pensarishpami ñucanchi tucui causaipi Jehovata tucui shunguhuan sirvingapaj munanchi (Ecl. 12:13).

TAUCALLA HUATACUNATA CHARIJCUNACA ¿IMA OPORTUNIDACUNATATA CHARIN?

4. a) Taucalla huatacunata charij huauquipanicunaca ¿imapita pensarita ushan? b) ¿Imamandata shina pensarina can?

⁴ Ña taucalla huatacunata charishpaca pensarinami capangui: ¿Imatata shinllilla cashpallata rurai ushani? nishpa. Quiquinga ashtacatami ayudaita ushangui. Jehovamanda imata yachajushcata jovengunaman parlashpa, quiquinba experienciacunata parlashpami shujcunatapash animaita ushangui. Rey Davidca Jehová Dios paita ali tratashcata shujcunaman parlangapaj munashpami Jehovata mañashpaca nirca: ‘Taita Dioslla ñucataca chairalla viñai cashcamandapachami yachachihuarcangui. Rucuyashpa yuraj ajcha tucujpipash ama jichuhuanguichu. Canba ninan ushaita tucui jipa miraicunaman villangacaman ama jichuhuanguichu’ nishpa (Sal. 71:​17, 18).

5. Taucalla huatacunata charij huauquipanicunapash ¿imashinata shujcunata ayudaita ushan?

⁵ Quiquinba causaipi yachajushcacunataca ¿imashinata shujcunaman parlaita ushapanguiman? Jovengunata huasiman invitashpa ali experienciacunata parlashpaca alimi canman. Shinallata, villachingapaj llujshina ali cashcata ricuchunga, villachingapaj cumbahuangui ninapash alimi canman. Ñaupa tiempocunapica Elihú shuti runaca nircami: ‘Ashtaca punllacunata causajcunara rimachun. Unai huatacunata charijcunami ali yachaihuan rimanga’ nishpa ( Job 32:7). Apóstol Pablopash taucalla huatacunata charij panigucunataca nircami: ‘Payalla mamacunapash aliguta ruranata’ yachachichun nishpa (Tito 2:3).

QUIQUINGA NINANDAMI AYUDAITA USHANGUI

6. Taucalla huatacunata charij huauquicunaca ¿imashinata ayudaita ushan?

⁶ Taucalla huatacunata charishpaca ninandami ayudaita ushapangui. Pensaripai: 30 ó 40 huatacunata huashaman yarishpaca ¿nachu cunan punllacunapica ashtaca cosascunata yachajupashcangui? Ashtaca experienciatami charipangui. Quiquinga Bibliapa consejocunata causaipi imashina pactachinatami yachajushcangui. Chaimandami Bibliapi consejocuna gentecunapa shunguman chayachun imashina parlanata ashtahuan ali yachajuriangui. Congregacionbi anciano cashpacarin, huauquicuna pandarijujta ricushpa imashina ayudanatapash alimi yachajuriangui (Gál. 6:1). Congregacionda imashina ñaupajman pushanata, Jatun Tandanajuicuna tiajpi o Tandanajui Huasicunata ruranapi imashina ñaupajman pushanatapash tal vez yachajurianguimi. Shinallata, yahuar illaj ima tratamientocuna ali cashcata doctorcunahuan aliguta parlanatapash yachajurianguimi. Chairalla bautizarishca cashpapash huahuacunata imashina ali viñachina experienciata charipanguimi. Imashinami ricupanchi taucalla huatacunata charij huauquicunaca, imashina yachachinata ricuchishpami animashpa huauquipanicunata ninanda ayudaita ushan (Job 12:​12, liingui).

7. Taucalla huatacunata charij huauquipanicunamandaca ¿imatata jovengunaca yachajuita ushan?

⁷ Ashtahuan ayudangapaj munashpaca, gentecunaman Bibliata imashina yachachi callarinatami jovengunamanga ricuchita ushapangui. Taucalla huatacunata charij panigucunapash joven panicunata ayudanallami capanguichi. Shinapash ¿imashinata ayudaita ushapanguichi? Joven panicuna huahuacunata viñachishpapash espiritual cosascunata ama descuidarichunmi ayudaita ushapangui. Cutin, taucalla huatacunata charij huauquicunaca jovenguna ashtahuan ali discursocunata cuchun, cushijushpa villachichun, ruculla huauquigucunata visitashpa imashina animanatami yachachita ushapanguichi. Pundashna na fuerzata charishpapash jovengunata ayudangapaj ashtaca oportunidacunatami charipangui. Bibliapica ninmi: ‘Chairalla viñaicunaca shinllicuna cashpami alicachirishpa purinajun. Rucucunaca ña rucuyashpami juyailla ricurinajun’ nishpa (Prov. 20:29).

ASHTAHUAN MINISHTIRISHCA LLACTACUNAPI ¿SIRVI USHANGUICHU?

8. Ashata mayorlla cashpapash ¿imatata apóstol Pabloca rurarca?

⁸ Apóstol Pabloca ashata mayorlla cashpapash paipa tucui fuerzacunahuanmi Jehovataca sirvirca. Huata 61pi Roma carcelmanda llujshishpaca ñami ashtaca llaquicunata aguantashcarca. Munashpaca Roma llactapillata ali causangapaj quedanallami carca (2 Cor. 11:​23-27). Romapi quedashpa chai llactapi huauquicunahuan villachingapaj llujshijpica chai huauquicunaca ninandami cushijunman carca. Shinapash shuj llactacunapi villachinami ashtahuan minishtirishca carca. Chaimandami Pabloca Timoteohuan Titohuan Éfeso, Creta llactacunapi villachishpa catingapaj rirca. Macedonia llactamanbash Pabloca rishcangami (1 Tim. 1:3; Tito 1:5). España llactamanbash Pabloca ringapaj munarcami. Shinapash Españaman rishcata o na rishcataca na cabal yachanchichu (Rom. 15:​24, 28).

9. Apóstol Pedroca ¿mashna huatacunata charishpashi ashtahuan minishtirijuj llactapi villachingapaj rirca? (Callari dibujota ricupangui.)

⁹ Apóstol Pedropash ashtahuan minishtirijuj llactapi villachingapaj rishpaca ñami 50 yali huatacunata charishcanga. Shinapash ¿imamandata 50 yali huatacunatami charishcanga ninchi? Pensaripai. Jesuspa edadta charishpa o Jesuspa ashaguta mayorlla cashpapash casi 50 huatacuna charishpami Pedroca shuj apostolcunandi Jerusalén llactapi huata 49ta tandanajushcanga (Hech. 15:7). Jipamanga Babilonia llactapi judiocunaman villachingapaj munashpami apóstol Pedroca Babiloniapi causangapaj rirca (Gál. 2:9). Chai llactapi causajushpami primera de Pedro cartata huata 62pi escribirca (1 Ped. 5:13). Shuj llactapi causangapaj rina shinlli cajpipash, paica na pensarijurcachu ñucaca ñami mayorlla tucujuni, Jehovataca ñana sirvi ushashachu nishpa.

10, 11. ¿Imashinata shuj huauquica taucalla huatacunata charishpapash ashtahuan minishtirijuj llactapi sirvingapaj rirca?

¹⁰ Cunanbica tauca huauquipanicunami 50 yali huatacunata charin. Paicunapa causai cambiashcamandami Jehová Diosta ashtahuan sirvi ushan. Chaimandami tauca huauquipanicunaca ashtahuan minishtirijuj llactapi villachingapaj rishca. Robertpa ejemplota ricupashun. Paica ninmi: “Ñuca huarmipash ñucapash casi 55 huatacunata charishpaca, Jehovata ashtahuan sirvingapami tauca oportunidadcunata charircanchi. Ñucanchi shujlla churipash ñana ñucanchihuan causajurcachu. Ñucanchi taitamamacunapash huañushcami carca. Asha herenciatapash japircanchimi. Chaimandami pensarircanchi, ñucanchi huasita jatushpaca hipotecata pagaita tucuchishunmi, jubilación culquita ñucaman cungacaman mantiniritapash ushashunmi nishpa. Shinallata Bolivia llactapi ashtaca gentecuna Bibliata yachajungapaj munajujta, chai llactapi cosascuna baratolla cajtami uyarcanchi. Chaimandami chai llactapi causangapaj rircanchi. Estados Unidospi causana fácil cajpipash Boliviapi causanaca shinllimi carca. Shinapash Jehová Diosca ninandami ñucanchitaca bendiciarca”.

¹¹ “Congregacionbica ocupado ocupadomi canchi. Huaquingunata bautizarichunbash ayudashcanchimi. Shuj familiaca Tandanajui Huasimanda caru carupimi causan. Shinapash tucui semanacunami tandanajuicunaman shamun. Paicuna ashtahuan ñaupajman catijpi, paicunapa rucu churi precursor tucujpicarin ninandapachami cushijurcanchi”.

SHUJ SHIMITAPASH YACHAJUNALLAMI CAN

12, 13. ¿Imashinata shuj huauquica jubilarishca jipa Jehovata ashtahuan sirvirca?

¹² Taucalla huatacunata charij huauquipanicunapash shuj shimita parlaj congregaciongunapi grupocunapica ninandami ayudaita ushan. Paicunapash ashtaca bendiciongunatami charin. Inglaterra llactamanda Brian shuti huauquipa ejemplota ricupashun. Paica ninmi: “Ña 65 huatacunata charimanda, jubilarishca caimandaca ñuca huarmindi solollacunami sintirircanchi. Ñucanchi huahuacunapash ñana huasipi causanajurcachu. Villachingapaj llujshijpipash ñucanchi territoriopi gentecunaca na uyanajurcachu. Shuj punllaca cai llacta universidadpi shuj investigador chinotami rijsircani. Tandanajuiman shamungui nijpica tandanajuiman shamurcami, Bibliatapash ñucahuan yachajui callarircami. Huaquin semanacuna jipaca shuj investigador cumba chinotami pushamurca. Chaimanda ishcai semana jipaca shuj cumbatapash pushamurca. Chai jipaca shuj chinotapash tandanajuiman pushamurcami.

¹³ “Ña pichapura chinocunami tucurca. Paipash Bibliata yachachihuai nijpica yarcanimi: “65 huatacunata charishpapash Jehovata sirvinamandaca na jubilarinachu cani” nishpa. Chaimandami ñuca huarmitaca nachu chino shimita yachajungapaj munanguiman nishpa tapurcani. Paica ishcai huatacunatallami ñucamandaca jipa can. Ari yachajushunlla nijpica casetpi grabashca cursocunata uyashpami chino shimita yachajui callarircanchi. Ñami 10 huatacuna yalishca. Shuj shimita yachajushpa villachishpaca jovenmi sintirinchi. Cunangamanga ñami 112 chinocunaman Bibliata yachachishcanchi. Taucacunami tandanajuicunaman shamushca. Shuj china paniguca ñami precursora can.”

IMAGUTA RURAI USHASHPAPASH CUSHIJUSHPA RURAPANGUI

14. a) Taucalla huatacunata charij huaquin huauquipanicunaca ¿imamandata na llaquirijuna can? b) Apóstol Pablopa ejemploca ¿imashinata animan?

¹⁴ Ashtaca huauquipanicunaca 50 huatacunata o ashtahuan huatacunata charishpapash ashtahuanmi Jehovataca sirvi ushan. Shinapash shujcunaca ungushcami can, taitamacunata o uchila huahuacunatapash cuidanami can. Chai responsabilidadcunata charishpaca ama llaquiripaichu. Quiquinguna ashagutalla rurai ushajpipash Jehová Diosca cushijushpami ricujun. Llaquirijunapa randica imaguta rurai ushashpapash cushijushpa rurapaichi. Shinallata apóstol Pablota yaripaichi. Paica huasi ucupillata tauca huatacunata preso causaimandami shuj llactacunaman rishpa villachitaca na usharca. Shinapash, paita visitangapaj rijcunaman Taita Diospa Shimita villachishpa, paicunapa feta shinlliyachishpami cushijurca (Hech. 28:​16, 30, 31).

15. ¿Imamandata mayorlla huauquipanicunamanda ninanda cushijunchi?

¹⁵ Rey Salomonga nircami, llaqui punllacuna shamujpira Jehovata sirvi callarinaca nalichu canman nishpa. Shinapash, mayorlla huauquipanigucuna paita alabangapaj esforzarijujta ricushpaca ninandami Jehová Diosca cushijun (Luc. 21:​2-4). Ashtaca huatacunata sirvishca mayorlla huauquipanicunapa ejemplota ricushpaca, shujcunapash congregacionbica ninandami cushijun.

16. a) Anaca ¿ima bendiciongunatata na chari usharca? b) Jehová Diosta sirvi ushangapaca ¿imatata Anaca rurai usharca?

¹⁶ Bibliapica Ana shuti mamagumandami parlan. Jesús nacishca horasca viudami carca, ñami 84 huatacunata charirca. Jesusta catingapaj, ungida cangapaj, ali villaicunata shujcunaman villachingapaca na causashcangachu. Chai bendiciongunata charita na ushashpapash ‘paica Diospa huasipi sirvishpa tutandi punllandi na micushpa, Diosta mañashpami causajurca’ (Luc. 2:​36, 37). Chai tiempocunapi sacerdoteca cada tutamanda cada tutami inciensota Jehovaman nishpa cushnichin carian. Chai horasca canlla patiopi shuj gentecunahuan tandanajushpami Anaca media horatashna Taita Diostaca shungu ucupilla mañajurianga. Shuj punllaca Jesusta ricushpami Anaca ‘Jerusalenbi causajcuna’ Jesusmanda ‘quishpichi tucunata tucui gentecunaman villai’ callarirca (Luc. 2:38).

17. Ungushca o mayorlla huauquipanigucunapash ñucanchihuan tandanajushpa Jehovata sirvichunga ¿imashinata ayudaita ushapanchi?

¹⁷ Cunanbipash ungushca o mayorlla huauquipanigucunata ayudangapaca listomi cana canchi. Huaquingunaca Jatun Tandanajuicunaman o congregacionbi tandanajuicunaman ringapaj munashpapash huaquinbillami rita ushan. Huaquin congregaciongunapica ungushca o mayorlla huauquipanigucunata ayudangapami tandanajuicunata telefonopi uyachun arreglocunata ruran. Tandanajuicunapi na cashpapash, ungushca o mayorlla huauquipanicunaca Diosta mañashpami congregación ñaupajman catichun ayudanajun (Salmo 92:​13, 14, liingui).

18, 19. a) ¿Imashinata mayorlla huauquipanigucunaca shujcunata ayudaita ushan? b) ¿Picunallata ‘canda Ruraj Diosta yaringui’ nishca shimicunata pactachita ushan?

¹⁸ Mayorlla huauquipanigucuna cangunaca ninandami shujcunata animanajupanguichi. Anapa ejemplota yaripaichi. Paica mayorllagu cashpapash Jehová Diostaca alimi sirvirca. Jipa huatacunapi shuj huauquipanicunata animangapaj paipa ali ejemplota Bibliapi escribinataca Anaca yaitallapash na yashcangachu. Ana paita juyashcataca Jehová Diosca na cungarcachu. Chaimandami cunan tiempopipash animachun paipa ali ejemplotaca Bibliapi escribichirca. Mayorlla huauquipanicuna canguna Jehová Diosta juyajtaca shuj huauquicuna panicunapash ricunajunmi, paicunaca na cangunataca cungangachu. Bibliapica ninmi: ‘[Alita] rurashpa causajcunaca, rucu cashpapash ali cajta ricuchijuj coronata churajushcashnami’ can nishpa (Prov. 16:31.)

¹⁹ Jehová Diosta sirvingapaca tucuicunallatami jarcaicunata charinchi. Shinapash shinllilla cashpallata, fuerzata charishpallatami cai shimicunataca yaria causana canchi: ‘Canda Ruraj Diostaca chairalla viñai cashpallata yaringui. Nara llaqui punllacuna chayamujpillata yaringui’ (Ecl. 12:1).